4
1 ይኬ፥ ጾዚ ኑና ፋ ሸምፖ በስቶ ገልꬆዳ ጋይደ ቃልታ Ꮉጋ ቲኖ የዘ ግሾ ይንታፓ ኦደን ይና ሸምፖ በስቶ ገላንጽ አታመ ፋና ናግንቶዳ። 2 ኡንትስ ምስራቾ ቃላ ሳባክንትዳንፋና፥ ኑስን ሳባክንትዳ። የዝን ኡን ስእደ ቃልቶ አማኒ ኤክካይዘ ግሾ ኡንታና ማድካያ። 3 ማቅኮን፥ አላመ መꬍንትዳንፓ አይኪ ጾዘ ኦችታ ፎልንትዳ ማቅኮን፥ ጾዚ፥
«ታኒ ታ ዥሎራ ጫቅ፥
ታ ሸምፖ በስቶ ሙሎን ገሎስ»
ጋይዳንጋራ፥ ኑኒ አማንዱንꬅ ኤ ሸምፖ በስቶ ገሎዳ። ማዝ. 95:11 4 ላፑንꬆ ቃማባዝ ፈቲ በስተ፥ «ጾዚ ላፑንꬆ ቃምተ ፋ ኦቻ ኡባንፓ ሸምፕዳ» ያጋይዳ። መꬎ 2:2 5 ማህን ይና በስተ፥ «ኡን ታ ሸምፖ በስተ ሙሎን ገሎስ» ያጋይዳ። ማዝ. 95:11 6 ቲኖ ምስራቾ ቃላ ስእ ኪትንታንጽ ሸምፖ በስቶ ገልካያ። የይኮን፥ Ꮉተ ይና ሸምፖ በስቶ ገሎደ ፈቲ ፈቲ አሱንꬅ የነ። 7 ይኒ ግሾ፥ ጾዚ፥ «Ꮉይኖ» ጋእ ጼግተራ ፈቲ ቃማ ኑስ ቃጣሮ እንግ ኤርስዳ። ጋማ ዎደፓ ሱባ ጾዚ ዳዉተ ባጋራ፥
«ጾዚ ጋዘባዝ Ꮉይኖ ይን ስእዘ ዎደ
ይን ዎዝንቶ ምንꬅፐተ»
ያጋእ ኦህዳ። ማዝ. 95:7-8 8 እያሱ ኡንትስ ሸምፖ እንግደባዝ ማቅዛኮ፥ ጾዚ መለ ቃማባዝ ሱባፓ ኦሆስ የሻ። ማሄ 31:7፤ ኢያ. 22:4 9 ይኬ፥ ጾዝ አስስ ሳምባታ ሸምፖ Ꮉጋ ናግንቲ የነ። 10 ጾዘ ሸምፖ በስቶ ገልዘ ኦደን፥ ጾዚ ፋ ኦችትፓ ሸምፕዳንፋና ኤዝን ፋ ኦችትፓ ሸምፖዳ። መꬎ 2:2 11 ይኒ ግሾ፥ ኦደን የንꬅ አሱንꬅ ኪትንታንጽ እጽዳኖ ካሊ፥ ጎልአመ ፋና ጾዘ ሸምፖ በስቶ ገሎደስ ምንጎዳ።
12 ጾዘ ቃላ ደኦን ኦችዛያ። ላምእ ዛላራ ሌፍንትደ ማሻፓ አꬊ ኦጮ። ኤ ሸምፖ፥ አያና፥ ሻዣን ኮልዘን የሎደስ ገሊ ጫዳነ። ማህ አስ ዎዝንተ የዘ አችንትደ ቆፋን አሙቶ ሻኪ ፍርዳነ። 13 ጾዘ ቲኖ አችንትደ አኮ መትꬅን ባያ። ኤ ኣፍት ቲኖ ኡባ ባዝ ቆንጨን ካሎ የነ። ኑኒ ማሄ እንጎደስ ቤዘ ኤ ቲኖ።
ዳማ ካህኑንꬅ Ꮉላቃ የሱሳ
14 ይኬ፥ ሳሎ ከዝደ ዳማ ካህኑንꬅ Ꮉላቅዘ፥ ጾዘ ናአይ የሱሳ፥ ኑስ የዘ ግሾ ኑ አማንቶ ምንꬂ ናጎዳ። 15 ኑ ካህኑንꬅ Ꮉላቅዘ ኑ ላብዘ ዎደ ኑስ ይቅስንቶደስ ዳንዳእዛያ። ኤ ናጋራ ኦችካያ፥ የዝን ኑ ፋና ኡባ ባዛ ፋታንንትዳ። 16 ይኬ፥ ማሮትꬅ ኤኮደስን ማደ ኮሽዘ ዎደ አꬎ ኬሃትꬅ ደንጎደስ አꬎ ከሃትꬅታ የዘ በሳ ጾዘ ካእቱሞ አራታጎ ዣሽሞ ባይꬅ ሺቆዳ።