1 ቲኖ ጫቅትስ ጾዝ ጎይንዘ ዎጋን ሳአ ጾዘ ኬꬂ የነ። 2 ዱንካነ ኤቅዳ። እዘ ጾምፐ ጋድዘ በሲ፥ ጣርጰዛን ላꬄ ቲኖ ጋድዘ ቦራ የነ፤ ይና በስታ ጌሽ በሲ ጋእንታነ። ከዘ 26:1-30፤ 25:31-40 3 ላምእንꬃ ማጋራጃፋ ሱባ ዛላራ የዘ በስታ ኡባፓ ጌሽ በሲ ጋእንታነ። ከዘ 26:31-33 4 እ ግዳ እጻነ ጩግዘ ዎርቃ ሳጥነን ዎርቃራ ጎዝንትደ ጫቆ ታቦተ የነ። የ ጫቆ ታቦትዘ ግዳ ማና የዘ ዎርቃ ጻሮ፥ አጭደ አሮና ጉፈን ሙሴ ህገ ጻፍንትደ ላምእ ሎቼ ሹቹንꬅ የነ። ከዘ 30:1-6፤ 25:10-16፤ 16:33፤ ፋይዶ 17:8-10፤ ከዘ 25:16፤ ማሄ 10:3-5 5 የ ታቦትዘፓ ካታ ዛላራ ማሮትꬅ ጎዝꬅ ፋ ቀፍተ አችዘ ቦንቾ ክሩበለ የነ። የዝን Ꮉተ Ꮉና ኡባኖ ቆንጭዝ ኦሆደስ ዳንዳኦስ። ከዘ 25:18-22

6 Ꮉና ኡባና Ꮉንጋራ ጊግዳንፓ ሱባ፥ ካህኑንꬅ ኡባ ዎደ ፋ ኦችቶ ኦቾደስ ዱንካንትስ ቲኖ ክፍልተ ገላነ። ፋይዶ 18:2-6 7 የዝን ካህኑንꬅ Ꮉላቃ ጻላላ ዱንካንትስ ላምእንꬃ ክፍልተ በረፓ ፈቲ ቶሄ ገላነ። ኤ የይጋ ገልተራ ፋ ናጋርት ግሾን አሱንꬅ ኤርካይዛራ ኦችደ ናጋርት ግሾ ሱꬅ ዣርሾ ኤክካይዛራ ገሎስ። ሌዌ 16:2-34 8 ቲኖ ዱንካነ ኤቂ የዝን፥ ኡባፓ ጌሽ በሲ ካንግዘ ኦግታ Ꮉጋ ቡጉንትካይዛኖ ጌሽ አያና ይነ ቤዛነ።

9 ይና Ꮉና ዎድትስ አዝዘ፤ ጾዘስ እንግንትዘ እሞታን ዣርሽታ ጎይንዘ አꬄ ዎዝንቶ ጌሾደስ ዳንዳኦሳኖ Ꮉና ቤዛነ። 10 የንስ ሙንታ ባዝ፥ ኡሽባዝ ዱማ ዱማ ሜች ዎግቶ ኦህዙንꬃና። ኡን ክለ ዎጋ የኦደ ዎንꬅስ ኦችንትዘ ባለ ዎጋ።

11 የዝን ክርስቶሳ Ꮉተ ኑ ደንግደ ሎኦ ባዝስ ካህኑንꬅ Ꮉላቃ ማቂ ይእዳ። ኤ ገልደ ዱንካንታ ዳማን ፎሎ። ይና ዱንካንታ አስ ኩሸራ ኦችንትካያ ማህ Ꮉና አላምትባዝ ባያ። 12 ክርስቶሳ ኡባፓ ጌሽ በሲ ገልዘ ዎደ ዴሽ ሱꬅን ዱሮ ሱꬅ ኤኪ ገልካያ። የዝን መዽና አቶትꬅ እንጎደስ ፋ ሱꬅቶ ኤኪ ላምእንꬆሰ ኦገራ ፈቲ ቶሄ ገልዳ። 13 ዴሽ ሱꬅን ኮርማ ሱꬅ፥ ምችንትደ ኦካ ቡዶ፥ ቱንደ አሱንꬃላ አፋ ዉጹርክን ኡንታና ጌሽዘባዝ ማቅኮ፥ ሌዌ 16:15-16፤ ፋይዶ 19:9፥ 17-19 14 መዽና ጌሽ አያና ባጋራ ቦረ ባይዝን ዣርሾ ኦቺ፥ ጾዝስ ፋና እንግደ ክርስቶሳ ሱꬅታ፥ ደኦ ጾዝ ጎይኖደ ፋና Ꮉይቆ ካልꬅዘ ኦቻፓ ኑ ዎዝንቶ ዋይዝ አꬂ ጌሾሳ?

15 ይኒ ግሾ፥ ጼግንትዱንꬅ ጾዚ እንግደ መዽና ላታ ኤኮደ ጋር ክርስቶሳ ክለ ጫቆስ ግዳ ማቂ እግንꬅዛያ ማቅዳ። ይና Ꮉንዳና አሱንꬅ ቲኖ ጫቆፓ ኦሞራ የዘ ዎደ ኦችደ ናጋራፓ ኡንታና አሾደስ ኤ Ꮉይቂዳ።

16 ይኬ፥ ኬከ የዝኮ፥ የ ኬክደ አꬄ Ꮉይቅታ ኤርንቶደስ ኮሻነ። 17 ኬክደ አꬄ Ꮉይቂኮ ኤ ኬክታ ምንጋነ። ኬክደ አꬄ Ꮉይቃንጽ አትኮ ኤ ኬክታ ኦቾስ።

18 መለ አቶ የዝን፥ ቲኖ ጫቅታን ሱꬅ ባይዝን ሚንግካያ። 19 ሙሴ ህገ ኪታ ኡባ አስስ ኦህዳንፓ ሱባ ዱሮ ሱꬅን ዴሽ ሱꬅ Ꮉꬃራ ዎርቂ፥ ዞቆ ዱሮ እስንን ህሶጰ ታሸ ኤኪ፥ ማጻፍዘ ጋልቶን አሱንꬅ ጋልቶ ዉጹርካነ። ከዘ 24:6-8 20 ሙሴ አሱንꬃጎ፥ «ይን ናጎደ ጋር ጾዚ ኪትደ ሱꬅ ጫቅታ Ꮉኖ» ያጋይዳ። 21 ይኒ ጋራ፥ ዱንካንዘ ጋልቶን ኦችዘ ሚሸ ኡባን ጋልቶ ሱꬅ ዉጹርካነ። ሌዌ 8:15 22 ቱሮን ህግታ ጋዛን ፋና ኤራꬅባዝ ፋትን ኡባ ባዝ ሱꬃራ ጌዣነ። ሱꬅ ላንትካይዝን ማሮትꬅ ባያ። ሌዌ 17:11

23 ሳሎ ባዝስ አዝዘ ማቅዱንꬅ ኡባ Ꮉርስ ዣርሾራ ጌሻደስ ኮሻነ። የዝን ሳሎ ባዝታ ፋ ኦምተ ይንፓ አꬍዘ ዣርሾራ ጌሻደስ ኮሻነ።

24 ክርስቶሳ ቱሪ ጾዘ ኬꬅስ አዝዘ ማቅደ፥ አስ ኩሸራ ኦችንትደ ኡባፓ ጌሽ በሳ ገልካያ። የዝን ኤ Ꮉተ ኑ ግሾ ጾዘ ቲኖ በንቶደስ ሳሎ ገልዳ። 25 ካህኑንꬅ Ꮉላቅዘ በርተ በርተ ፋ ሱꬅ ማቅካይዛኖ ኤኪ፥ ኡባፓ ጌሽ በሳ ገላነ። የዝን ክርስቶሳ ጋማ ቶሄ ፋና ዣርሾደስ ሳሎ ገልካያ። 26 ይኒ ጋራ Ꮉንደ ባዝ ማቅዛኮ፥ ክርስቶሳ አላመ መꬍንትዳንፓ አይኪ ጋማ ቶሄ ዋይንቶደስ ኮሻነ የሻ። የዝን Ꮉተ ዎደ ዉርሱꬅተ ናጋራ Ꮉሶደስ ፋና ዣርሺ ላምእንꬆሰ ኦገራ ፈቲ ቶሄ በንትዳ።

27 አስ ኡባ ፈቲ ቶሄ Ꮉይቆደስ ይንፓ ሱባ ፍርድንቶደስ ቤዛነ። 28 ይኒ ፋና፥ ክርስቶሳ ጋማ አሱንꬅ ናጋራ Ꮉሶደስ ፈቲ ቶሄ ዣርሽንትዳ። የዝን ኤ ናጋራ ቶኮደስ ማቅካይዝን ፋና ናግዙንꬃና አሾደስ ላምእንꬃ በንቶዳ። ኢሳ. 53:12