1 ዱርዘ ላፑን ማህታሙንꬃፓ ፈታ ቡጎደራ ብእዳ። ማህ ኦይዲ ሸምፖራ የዘ መቱንꬃፓ ፈተ፥ ዳዳ ꬎገ ፋና ኦꬃራ፥ «ዮኦ!» ያጋዝን ስእዳ። 2 ይኬ ቦꬅ ፋራ ብእዳ። የ ፋራዛ ቶግደ ዶንገ አይክዳ፤ ኤስ ዎርቃ ዛዉደ እንግንትዳ። ኤዝን ጋሚ ደንድዳያ ማቂ ጋሞደስ ከዝዳ። ዛካ. 1:7

3 ማህ ዱርዘ ላምእንꬃ ማህታምዛ ቡግደ ዎደ ላምእንꬃ ሸምፖራ የዘ መትꬅዘ፥ «ዮኦ!» ጋዝን ስእዳ። 4 ማህ መለ ሱꬅ ዞቆ ፋራዛ ከዝዳ። የ ፋራዛ ቶግደስ ሳአፓ ሳሮ ꬋብሶደ ጋራን አሱንꬅ ዎል Ꮉሶደ ጋር ዎልቃን ዳማ ማሻ እንግንትዳ። ዛካ. 1:7

5 ዱርዘ Ꮉይꬕንꬃ ማህታምዛ ቡግደ ዎደ Ꮉይꬕንꬃ ሸምፖራ የዘ መትꬅዘ፥ «ዮኦ!» ጋዝን ስእዳ። ይኬ ካርꬅ ፋራ ብእዳ፤ ኤዝን ፋ ኩሽተ ምዛነ አይክዳ። ዛካ. 6:2 6 ኦይዲ ሸምፖራ የዘ መቱንꬅ ግዳፓ፥ «ፈቲ ዎደ ኦቻስ ዳሞዘ፥ ባጋ ክሎ ዛርጋ፤ ማህ ፈቲ ዎደ ኦቻስ ዳሞዘ፥ ፈቲ ክሎን ባጋ ባንጋ ማቀ። የዝን ዛይተን ዎይነ ቆህፐ» ጋዝን ስእዳ።

7 ዱርዘ ኦይድንꬃ ማህታምዛ ቡግደ ዎደ ኦይድንꬃ ሸምፖራ የዘ መትꬅዘ፥ «ዮኦ!» ጋዝን ስእዳ። 8 Ꮉይቼ ቦꬅ ፋራ ብእዳ። የ ፋራዛ ቶግደ ሱንꬅታ Ꮉይቆ፤ ኤ ሱብተ ስኦለ ካላነ። ኡንትስ ሳአ ኦይዲ ኩሸፓ ፈቲ ኩሸ ኦላራ፥ ናየራ፥ ባይኤራን ጾꬃራ ዎዽሳደ ፋናን አደትꬅ ዎልቃ እንግንትዳ። ሕዝ. 14:21

9 ዱርዘ እችንꬃ ማህታምዛ ቡግደ ዎደ ኡን ጾዘ ቃላ ኦህደ ግሾን ፋ ማርካትꬅተ አማንንትደ ግሾ ሹክንትደ አሱንꬅ ሸምፕቶ ዣርሾ በስትፓ ኦሞራ ብእዳ። 10 ኡን ፋ ቃልቶ ꬎቅ ዪዚ፥ «ኡባኖ አህዘ ላꬃዮ፥ ጌሻዮ፥ ቱርዛዮ፥ ሳአ የዘ አሳላ አፋ ነ ፍርዶሳና ኑ ሱꬅት ግሾ ኩሸ ማሆሳና አይደ የሎደስ?» ጋይዳ። 11 ኡን ፈተስ ፈተስ ቦꬅ ጳርጎ ማኦ እንግንትዳ። ኡንትን ፋና ዪእ Ꮉይቆደስ ቤዝዘ ኡን ላጉንꬅ ፋይድታ ኩሞደ ዎንꬅስ ኤራꬅ ዎደ ሸምፖደ ፋና ኡንትስ ኦህዳ።

12 ዱርዘ እዝፑንꬆ ማህታምዛ ቡግደ ዎደ ታ ብእዳ፤ ዳማ ሳአ ኤንኤ Ꮉንዳ። አዋ ኣፈ ካርቲ አዛኖ ማኦ አዝዳ። አግናን ዞቂ ሱꬅ አዝዳ። ቆን. 11:13፤ 16:18፤ ኢሳ. 13:10፤ ኤር. 2:10 13 ምንꬅ ባቆ ባቂ በለሰ ምንጻ ቃምኤ ኣፍቶ ጉፉዛን ፋና ሳሎ ጾልንቱንꬅ ሳአ ጉፍዳ። ኢሳ. 34:4 14 ሳሎ ጻጽንትደ ማጻፈ ፋና ጻጽንት Ꮉልእዳ፤ ደረን Ꮉꬃራ ተቅንትደ ሳእታ ፋ በስትፓ ꬋብዳ።ቆን. 16:20 15 ጋደ ካቱንꬅ፥ ዎርዣ አህዙንꬂ፥ ኦላ ካልꬅዙንꬅ፥ ዱሩንꬅ፥ ዎልቃሙንꬅ፥ አሩንꬅን፥ ላꬁንꬅ ዎምኦን ደረላ አፋ የዘ ላላ ዎምኦን አችንትዳ። ኢሳ. 2:19 16 ኡንትን ደረጎን ላላጎ፥ «ኑላ አፋ ዎꬎተ፤ ኑና ጌንꬆተ፤ አራትዘላ በትዳይ አፍትፓን ዱርዘ Ꮉንቅትፓ ኑና አቾተ። ሆሴ. 10:8፤ ሉቃ. 23:30 17 ይኬ፥ ዳማ Ꮉንቆ ቃማ የልዳ፤ ኦኒ ዳንዳእ ኤቆደ?» ያጋይዳ። ኤር. 2:11፤ ሚል. 3:2