1 ይኒ ግሾ፥ ክርስቶስ የሱሳራ የዙንꬅ Ꮉተ ፍርዳ ባያ። 2 ክርስቶስ የሱሳ ባጋራ ኑስ ደኦ እንግዘ ጌሽ አያና ህገ፥ ታና ናጋራን Ꮉይቆ ህገ አሮትꬃፓ ከስዳ። 3 ኑ ናጋራ አሳትꬅት ባጋራ፥ ህገ ለፕደ ግሾ ኑና አሾደስ ዳንዳእካያ። ጾዚ ፋ ናአያ ናጋራንቾ አሱንꬅስ አዝዝ ናጋራስ ዣርሾ ማቆደ ፋና ኪቲ ይኖ ኦችዳ። የይዝ፥ ጾዚ ክርስቶሳ አቶትꬅት ባጋራ፥ ናጋራ ፍርድ Ꮉስዳ። 4 ጾዚ ይኖ ኦችዳና፥ ኑ አሾ አሞ ኮይዛን ፋና ባይዝን ጌሽ አያና ኮይዛን ፋና የዘ ኑላ አፋ ህገ ጽሎ ኪታ ፎልንቶደ ፋና።

5 አሾ ቆፋር የዙንꬅ አሾባዝ ቆፓነ። የዝን ጌሽ አያና ቆፋር የዙንꬅ ጌሽ አያናባዝ ቆፓነ። 6 ኑ ቆፍታ አሾ አሞስ አቅኮ Ꮉይቆ ከእነ፥ የዝን አያናስ አቅኮ ደኦን ሳሮትꬅ ከእነ። 7 አሾ አሞስ አቅዘ አስ ጾዘ ህገስ ኪትንቶደስ ኮዮሰ ግሾን ኪትንቶደስ ዳንዳኦሰ ግሾ ጾዛራ ሞርከ። 8 አሾ አሞስ አቅዙንꬅ ጾዝ ኡፋይሶደስ ዳንዳኦስ።

9 የዝን ጾዘ አያና ይንታራ የዝኮ ይንታላ አቅኮ፥ ይን አያና ቆፋ የነፕ አትን ይን አሾ አሞስ አቆስ። ክርስቶስ አያና ባይዝን ኦንን ክርስቶሳስ ማቆስ። 10 የዝን ክርስቶሳ ይን ግዳ የዝኮ፥ ይን አሳትꬅታ ናጋራ ባጋራ Ꮉይቂዳኖ። የዝን ይን አያንዘ ጽሎትꬅ ባጋራ ደኦ የነ። 11 የዝን የሱሳ Ꮉይቆፓ ደንꬅደ ጾዘ አያና ይን ግዳ የዝኮ፥ ክርስቶሳ Ꮉይቆፓ ደንꬅደ ጾዚ፥ ይንታራ የዘ ፋ ጌሽ አያናራ Ꮉይቂደ ይን አሳትꬅትስ ደኦ እንጎዳ።

12 ይኬ፥ ታ እሹንꬆ ጋለ የነ፥ ኑኒ ኑ አሾ አሞ ካሊ የሳደስ ቤዞስ። 1 ቆሮ. 3:16 13 ይን፥ ይን አሾ አሞስ የዝኮ Ꮉይቆዳ፥ የዝን ጌሽ አያና ዎልቃራ ናጋራ ኦችቶ ዎꬍኮ ይን ደኦ የሳዳ። 14 ጾዘ አያና ካልዘ ኡቡንꬅ ጾዘ ናኡንꬃና። 15 ኑኒ፥ «አቦ፥ ታ አዳዮ» ያጋእ ጼግዘ፥ ጾዘ ናኡንꬃና ማህዘ ጌሽ አያና ኤክዳፕ አትን ማህ ዣሽሞራ የሳደስ አሮ ማህዘ አያና ኤክካያ። 16 ጾዘ አያና ኑ አያናራ ማቂ ኑኒ ጾዘ ናአ ማቅዛኖ ማርክꬋነ።ማር. 14:36፤ ጋላ. 4:6 17 ኑኒ ኤ ናአ ማቅኮ ጾዛ ላቶዳ፤ ክርስቶሳራ ዎላ ይኖ ላቶዳ። ማህ ኑኒ ክርስቶሳራ ዋየ ኤክኮ ኤራ ዎላ ኤ ቦንችቶ ሻክንቶዳ።

18 ኑኒ Ꮉተ ዋይዘ ዋይቶ፥ ቲኖፓ ኑስ ቆንጮደ ቦንቾራ የልꬅ ብእኮ፥ ዎልክሳደስ ዳንዳእንቶስ ጋእ ቆፓነ። 19 መትꬅ ኡባ ጾዘ ናአ ቆንጭꬅቶ ጋማ አሙꬊ ካፋነ። 20 መትꬅ ኡባ Ꮉሪ ማቅዳ፤ ይናን፥ መትꬅታ ዶሮር ባይዝን ኡፋይሳራ ናጎደ ፋና ኦችደ ጾዘ ቆፋ Ꮉንዳ። 21 መትꬅ ፋ ኦምተ ꬋበ አሮትꬃፓ ኬዚ፥ ጾዘ ናኡንꬃራ ዋሎ ቦንቾ ግሽንቶዳ። መꬎ 3:17-19 22 መትꬅ ዎላ Ꮉይኖ የሎደስ የሎ ꬋኤ አይክደ ማችት ፋና እንጽጸራን ኡንአራ የዛኖ ኑ ኤራነ። 23 ማህ ይኖ መትꬅት ጻላላ ባይዝን ጌሽ አያና እሞ ኤክደ ኑኒ፥ ኑ ኦምተ ኑ አሳትꬅትስ ዎዞ ማቅደ ጾዘ ናአ ማቅዘ ኡፋይስቶ ናግተራ ኑ አሳትꬅተ እንጽጻነ። 24 ይና ኡፋይስተ ኑኒ አትዳ። የዝን ኑኒ ኡፋይስ ኦችዘባዝ በንትዘ ባዝ ማቅኮ ይኖ ኦደ ኡፋይስ ኦችዘ?2 ቆሮ. 5:2-4 25 የዝን ኑ ብእካይዘ ባዝ ደንጎደስ ጋእ ኡፋይሳራ ናግኮ ይኖ ዳንዳአራ ናጋነ።

26 ይኒ ጋር ጌሽ አያና ኑ ላብꬅተ ማዳነ። ኑኒ ጾዝ ዋይዝ ዎሶደስ ቤዝዛኮ ኤሮስ፥ የዝን ጌሽ አያና ፋ ኦምተ፥ አስ ኦሆደስ ዳንዳኦሰ ቃላር ኑስ ሾባነ። 27 ማህ አስ ዎዝና ኤርዘ ጾዘ ጌሽ አያና ቆፍታ አኮ የዛኮ ኤራነ። ጌሽ አያና ጾዘ ቆፍት ጋር ጌሹንꬅስ ሾባነ።

28 ጾዛ ሲቅዙንꬅስን ኤ ቆፍት ጋር ጼግንተዙንꬅስ ጾዚ ኡባ ባዝ ሎኦስ ኦችዛኖ ኑ ኤራነ። 29 ጾዛ ኤርዱንꬅ ፋ ናአያ አዞደ ፋናን ናአይን አማንዙንꬅ ግዳ አንግስ ማቃደ ፋና ኡንታና ዶሪ ጋድዳ። 30 ጾዚ ቲኖ ዶርዱንꬃና ጼግዳ፤ ጼግዱንꬃና ጽልዝዳ፤ ጽልዝዱንꬃና ማህ ቦንችዳ።

31 ዬዝን፥ ኑ Ꮉና ኡባንስ ዋጋዉደ? ጾዚ ኑ ባጋ ማቅኮ ኑና ኦደ እጾደ? 32 ኤ መለ አቶ የዝን፥ ፋ ናአይስ ይቅስንትካይዛራ፥ ኑ ግሾ አꬂ እንግዳ። ዬዝን፥ ፋ ናአያ ኑስ አꬂ እንግደ ዋይዝ ኤ ኡባ ባዝ ጨር እንጎሶ?

33 ጾዚ ዶርዱንꬃና ኦደ ሞቶደ? ጽልዘ ጾዚ ፍርድዘ ኦደ? 34 ዬዝን፥ ኡንታላ አፋ ፍርዶደስ ዳንዳእዘ ኦደ? ኦንን ባያ። Ꮉይቆፓ ደንዲ ጾዘ ምዛቅተ በትደ፥ ክርስቶስ የሱሳ፥ ኤ ኑስ ሾባነ።

35 ይኬ፥ ኑና ክርስቶሳ ሲቆፓ ሻጎደ ኦደ? ዋየነ ዎይ ማꬋነ ዎይ ባይኤነ ዎይ ናየ ዎይ ካሎትꬆነ ዎይ ዣሽሞነ ዎይ ኦላነ? 36 ጌሽ ማጻፍተ፥

37 የዝን ኑኒ Ꮉነ ኡባ፥ ኑና ሲቅዘ ክርስቶሳራ ጋምዙንꬃፓ አꬋነ።

38 ይኒ ግሾ፥ Ꮉይቆ ማቅን ደኦ ማቅን ኪታንቹንꬃና ማቅን አህዙንꬃና ማቅን Ꮉተ የዛያ ማቅን ቲኖፓ ዮኦዳያ ማቅን ዎልቃሙንꬃና ማቅን፥ 39 ꬎቃ ማቅን ዝቃ ማቅን አኮ መትꬅ ማቅን ኑ ላꬄ፥ ክርስቶስ የሱሳራ የዘ ጾዘ ሲቆፓ ኑና ሻኮደስ ዳንዳኦሳኖ ታኒ ኤርዳ።