Phawuloosa Teselonqe Asuntsis
Xaafide Tiino Kiita
Gele
Teselonqe, Roome gade yeze Maqedooniya awurajjas waanna katama. Phawuloosa Filphisiyusa dakkii hyanggideppa suuba Teselonqe woosa keetstsi essida. Maaqqoyezin, Ayhuduntsi ammantto ekkodes giiginttii bettide Ayhude maaqqoosse asuntsi, Phawuloosa tamaarssize, kiristtinna ammano timirttite ekkanxxide gisho Ayhudunts qanaatii, Phawuloosa timirttito ixxii phalqqida. Yinnii gisho, Phawuloosa gam77ikaayzin Teselonqe ashshii, Beeriya qitida (1:9-10). Suubappa E Teselonqe yellide wode eza maaddize Ximotiyoosa Teselonqe woosa keetstsa hyanidanno ees geeshi ohida.
Phawuloosa tiino kiitto Teselonqe asuntsis xaafide, ammanze asuntsana zorodesin mintsitsodes. E un ammanttisin un siiqitisi lo77o markkatitsito si7ide wode Xoozza galatane. Tiino E un gidda yeze wode akko fana yessi yezezako unttana tiirizane. Yinnippa Kiristtoosa lam7intsa ye7itibaz oocinttide oochitis mahe inggida. Yinna oochitippa fetta, «Kiristtoosa lam7intsa ye7itippa tiino hyayqqide ammanze asuntsi Kiristtoosa ye7ita inggize medhina de7o ekkodes dandda7ine? Kiristtoosa lam7intsa yo7ode ayde?» ga7inttizannifana. Phawuloosa yinna wottide wodito maadinttii, «Kiristtoosa lam7intsa ye7e ufayssar naagiter E yo7ode yellodes woppu ga7i yin oochito oochchote» yaga7i zorane.
Aafe Qofuntsi
Gele qofa 1:1
Phawuloosa ufayssiton galata 1:2—3:13
Ammanze asuntsana de7ogo kaalitse 4:1-12
Kiristtoosa lam7intsa ye7e baz 4:13—5:11
Wurssutsi zore 5:12-22
Xaatsi qofa 5:23-28
1
1 Phawuloosa Sillaasen Ximotiyoosa Teselonqe woosa keetstsa yeze asuntsis, Xoozze Adesin Laatstse Yesuus Kiristtoosas maaqqide asuntsis xaafide kiita.
Hawa. 17:1Aadho keehatitsin saro yinttis maaqqe.
Teselonqe asunts yessin ammanon
2 Nuunii Xooz woossize wode ubba yinttana qoppittera yin gisho ubba wode Xoozza galatane. 3 Xoozze nu Aday tiino ammanora yin oochchide oocha, siiqora yin labbide labbitsito Yesuus Kiristtoosara yeze ufayssito ekkodes yin miinggi eqqide eqito ubba wode qoppane.
4 Nu ishuntso, Xoozii yinttana kadhizannon fa baz mahi yinttana dooridanno erane. 5 Akkos gayko, nuunii Wonggele doonara xalaala baayzin wolqqara, Geeshi Ayyaanaran Wonggele mintsii ammanora yinttis ki7ida. Nuunii yinttara gam77ide wode ubba yin gisho wayzi yezezako yin erane. 6 Yin gaama madha ekkikon Geeshi Ayyaana inggize ufayssara kiitto ekkida; nunan nu Laatstsa aazizuntsana maaqqida. 7 Yinnii gisho, Maqedooniyan Akkaya awurajja yeze ammanze ubbuntsis aazize maaqqida.Hawa. 17:5-9 8 Laatstse qaala yinttappa kezii, Maqedooniyan Akkaya xalaalas baayzin Xoozii yin ammanzanna ubba bessa sinttida. Yikke, nu gawude baz akkon baaya. 9 Nuunii yinttago hyanggide wode yin nuna mokkide mokkite yin, yin eeqito ashshii turon de7o Xoozza maaddodes yin maaqqidanno un fa ommite ohine. 10 Mahi Xoozze Na7aya, Yesuusa, Xoozii hyayqoppa dentsidanno, tiinoppa yo7odes yeze Xoozze hyanqoppa nuna ashshodaya, salloppa yo7odaya yin naagizanno markkidhane.