Ibraawe Asuntsis
Xaafinttide Kiita
Gele
Hyay kiitize xaafinttidanna, damma madha yellin, fa ammantto ashshodes ukkide ammanze asuntsis. Hyay maxaafize xaafize, Yesuus Kiristtoosa wurssutsin turii Xoozze qonccitsi maaqqidanno Ibraawe asuntsis beezane. Yinna ammanze asuntsi fa ammantte minggode fana unttana mintsitsane. E yinne hyaydzdzii aafe qofa waanna mahi beezane.
1. Yesuusa fa ekkide madhite Ades turo kiitinttide medhina Xoozze Na7a. E Xoozze Na7a maaqqide gisho Gal77a Caaqo wode yeze nabuntsappa, kiitanchchuntsappan Museppa kattara.
2. Yesuusa Gal77a Caaqo kahinuntsappa gaama aadhize medhina kahine maaqqidanno Xoozii fa ommite markkidhida.
3. Yesuusa baggara ammanze asi nagarappa, zhashimoppan hyayqoppa attane. Yesuusa kahinunts hyalaqa maaqqidanni gaar, zaga Ibraawunts ammano wogaran hyaars zharshora dasho fana benttize atotitsito hyatte turo mahida.
Xaafize Isra7eele asuntsis taarikera gaama erinttide asunts ammano malla mahi ekkii (Zofa 11) hyay maxaafiza nabbabize asuntsana fa ammantte minggode fana qofizane. Yinnii fana, zofane 12 nabbabizuntsi fa aafto Yesuusalla afa gaddii, fa ammantte minggode fanan akko madhan waayen yellikon, un genccode gaar zorane. Wurssutsite zoren tiirize qaalara fa kiitto kusttane.
Aafe Qofuntsi
Gele qofa: Xoozii Kiristtoosara qonccidanno 1:1-3
Kiristtoosa kiitanchchuntsappa kattara 1:4—2:18
Kiristtoosa Museppan Iyyaasuppa kattara 3:1—4:13
Kiristtoosa kahinetitsita kattara 4:14—7:28
Kiristtoosa caaqita kattara 8:1—9:22
Kiristtoosa zharshita kattara 9:23—10:39
Ammanora yeze 11:1—12:29
Xoozza ufaysse 13:1-19
Anjjon xaatsi qofa 13:20-25
1
Na7ay kiitanchchuntsappa kattara
1 Zaga Xoozii, nu aduntsis nabunts baggara dumma dumma ogera gaama wode ohida. 2 Yezin hyanna wurssutsi wodite ubbanno eza laatizide mahi alamito E baggara medhdhide fa Na7ay baggara nuus ohida. 3 Na7ay Xoozze bonchcho foo7izen kumutsi Xoozze Xoozzetitsito ekkii, fa wolqqa qaalara hyanna alamito katii aykkida. Asuntsana un nagarappa geeshidannippa suuba Ubbappa kattara Xoozze mizaqi zalara salo bettida.
4 Ees ingginttide suntsita kiitanchchuntsi suntsappa kattara maaqqidanni fana E unttappa kattara. 5 Yikke, Xoozii kiitanchchuntsappa oodego,
«Neenii ta Na7a;
ta hyayno nees ade maaqqida» gaydo?
Woy mahi oodego,
«Taanii ees ade maaqqada;
ezin taas na7a maaqqada» gaydo?Maz. 2:7; 2 Sam. 7:14; 1 Zeena 17:13
6 Mahi Xoozii fa anggis Na7aya hyanna alamite kiittitera,
«Xoozze kiitanchchuntsi ubba ees goyno»
yagayda.Mahe 32:43 7 Xoozii kiitanchchuntsi baz ohitera,
«Xoozii fa Kiitanchchuntsana ayyaana,
fa aruntsana tama loxe mahine»
yagayda.Maz. 104:4 8 Yezin fa Na7ay baz ohitera,
«Xoozzayo, ne ka7itumtta medhinas yene.
Ne ka7itumtto ne xillotitsara aho.Maz. 45:6-7
9 Neenii xillotitsi kadhida; iita ixxida.
Xoozii, ne Laatstse, nena ne lagguntsappa aatsii doorida,
ufays zayte*Ufays zayte: E ka7itize wode asuntsi ufayssara loytsi eza ka7itisizanno beezane. nena tizhida»
yagayda. 10 Xoozii mahi,
«Laatstsayo, tiino neenii sa7a medhdhida;
saluntsi ne kushe oocha.Maz. 102:25-27
11 Yentses ubba dhaboda;
yezin ne yessada.
Un ubba afula fana hyal7oda.
12 Ne magaraja fana xaaxoda;
mahi un afula fana cinggoda.
Yezin neenii ubba wode nena;
ne beritan hyal7oos»
yagayda. 13 Yezin Xoozii kiitanchchuntsappa oodego,
«Taanii ne morkkuntsana ne tohita
yedhdhize bessi mahode wontsis,
hyanne taappa mizaqi zalara betto» gaydo?Maz. 110:1
14 Kiitanchchuntsi ubba atotitsi denggodes yeze asuntsana maaddodes Xoozii kiittide ayyaanuntsana baane?