8
Yesuusa nu kahinunts hyalaqa
1 Nuunii ohize damma bazita hyanno. Salo Ubbappa kattara Xoozze araatappa mizaqi zalar bettide hyay fana yeze kahinunts hyalaqa nuus yene.Maz. 110:1 2 E asara maaqqikaayzin Laatstsara eqqide turii dunkkaantte Xoozze Keetstsa oochchane.
3 Kahinunts hyalaqa ubbanna imon zharsho zharshodes shuumunttane. Yinnii gisho mahi, ye kahinze zharshodes fettibazi yessades koshshane. 4 Higge kiittizannifana zharshize kahinuntsi yeze gisho Kiristtoosa sa7a yeze baz maaqqizako kahine maaqqoos. 5 Un kahinetitsa oochchize dunkkaantta salo yezes aazizen dasho. Muse dunkkaane essize wode Xoozii eego, «Taanii nena derella afa beezide aazize kaallii oochcho» yagayda.Faydo 18:21 6 Yezin Yesuusa igintsize gidda maaqqide caaqo, tiino caaqoppa aadhizannifana E ekkide oochita unttisitippa aadhane. Yinna eqqidanna aadhize caaqo qaalara.
7 Tiino caaqite bala baayze baz maaqqizako lam7intsa caaqo koshshoos. 8 Yezin Laatstsii unttana borii, hyannigaara yagayda:
«Taanii Isra7eele asuntsaran Yihuda asuntsara
kille caaqo caaqqize wode ye7oda.Er. 31:31-34
9 Yinna caaqita ta un aduntsana Gibxxe sa7appa kushito aykkii,
gochchi kesside wode unttara caaqqide caaqitii gaar baaya.
Un ta caaqite ammaninttikaayze gisho
taanii unttana olii ashshida yagayda Laatstsii.
10 Yezin yikkeppa suuba Isra7eele asuntsara
ta caaqqode caaqita hyanno yagayda Laatstsii.
Taanii ta higgito un guugite gaddoda;
un wozintte xaafoda.
Taanii un Xoozii maaqqada;
unttin ta asi maaqqada.
11 Unttappa ooden fa dootsiza woy fa isha,
‹Laatstsi ero› yaga7i tamaarssoos.
Un eeratsappa damma yellodes
ubbuntsi tana eroda.
12 Taanii un qohidanno atto gawuda;
un nagartto mahi qoppoos» yagayda.
13 Xoozii hyay caaqiza «Kille» ga7i xeegittera tiinosaya gal7izida. Yikke, gal7izen cinggide dhabize wode yellida.