10
1 Muse higge yo7odes yeze lo77o bazis dasho fattin fa ommite waanna baaya. Yinnii gisho, berite berite face baayzin zharshinttize zharshita goynodes shiiqize asuntsana folo mahodes dandda7oos. 2 Higge unttana folo mahodes dandda7idebaz maaqqizako un zharsho zharshizanno ashshoda yeshsha. Mahi goynodes shiiqize asuntsi fa nagarttippa geeshshada; un wozinttan unttana bala ga7i mootoos. 3 Yezin yinna zharshuntsi berite berite nagara qofizane. 4 Akkos gayko kormma suutsin deeshi suutsi nagara dhabisodes dandda7oos.
5 Yinnii gisho, Kiristtoosa hyanna alamite yi7ide wode hyannigaara yagayda:Maz. 40:6-8
«Neenii zharshon imo koykaaya;
yezin taas asho giigizida.
6 Neenii eexize zharshon
nagara zharshite ufayttikaaya.
7 Ye wode ‹Ta gisho maxaafite xaafinttidannigaara,
Laatstso, taanii ne qoftto oochchodes yi7ida› gayda» yagaane.
8 Zharshita zharshinttode gaar higge kiittizebaz maaqqizako, Kiristtoosa tiino, «Neenii zharshon imo, eexize zharshon nagara zharsho koykaaya; unttara ufayttikaaya» yagayda. 9 Kaallin E, «Laatstso, hyaychche taanii ne qoftto oochchodes yi7ida» yagayda. Yinnii gisho, Kiristtoosa lam7intsa essodes tiinosaya shaarida. 10 Yesuus Kiristtoosa Xoozze qofa oochchii, lam7intsoose ogera fettii tohe fa ashito zharshide gisho nuunii geezhida.
11 Kahinunts ubba, nagara hyaasodes dandda7oos yinna zharshito qammite qammite zharshitera eqqii fa oochito oochchane.Keze 29:38 12 Yezin Kiristtoosa ubba wodes maaqqize fettii nagara zharsho zharshi, Xoozappa mizaqi zalara bettida.Maz. 110:1 13 Ye wodeppa aykkii E morkkuntsi E tohita yedhdhize bessi mahode wontsis naagane. 14 E lam7intsoose ogera fettii tohe fana zharshide zharshite geeshshuntsana medhinas folo oochchida.
15 Mahi Geeshi Ayyaana nuus hyanno markkidhane. Tiino hyannigaara yagayda:
16 «Yinna qammitippa suuba,
taanii unttara caaqqize caaqita hyanno:
Laatstsii ta higgito un wozintte gaddoda;
un guugite xaafoda»
yagayda.Er. 31:33 17 Kaallii,
«Taanii un nagartton
un iita oochito mahi qoppoos»
yagayda.Er. 31:34 18 Yikke, nagara atto ga7inttidannippa suuba nagaras zharshinttize zharsho koshshoos.
Ane Xoozago shiiqoda
19 Yikke, ta ishuntso, nuunii Yesuusa suutsiti baggara Ubbappa Geeshi Bessi gelodes nuus ammantsize yene. 20 Nu gelodanna Kiristtoosa fa magaraajjito, yinnan fa ashtii baggara nuus bugide killen de7o maaqqide oge. 21 Nuus Xoozze Keetstsa kattara shuumunttide damma kahinunts hyalaqa yene. 22 Yinnii gisho Nuunii iita qofappa geeshshades nu wozintto wuxurkkintti, nu gallito xillo hyaatsara meeccii, luule wozinaran folo ammanora Xoozago shiiqoda.Leewe 8:30; Hiz. 36:25
23 Nuus ufays qaala inggide Xoozze ammaninttidaya maaqqide gisho nu markkidhize ufaysito mizaqi workkita gaykaayzara mintsii aykkoda. 24 Fetay feta siiqosin lo77o oochas wayzi dentsitsod yezako ane qoppoda. 25 Fete fete limdde mahi shiiqizanno ashshidanni fana nuunii wolla shiiqizanno ashshoos. Yezin Laatstse qammita ukkidanno yin be7ize gisho yinno zagannippa aatsii oochchote.
26 Nuunii turii eratitsi ekkidannippa suuba eriite nagara oochchoos, yikkeppa nu nagara gisho zharshinttode zharsho baaya. 27 Yezin yikke attidanna zhashize firddan Xoozze morkkuntsana michchodes giigide damma tama.Isa. 26:11 28 Muse higgito kiitinttanxide ooden lam77i woy hyaydzdzii asi eella afa markkidhiko yiqsimo baytsi hyayqqane.Mahe 17:6; 19:15 29 Yeezin, Xoozze Na7aya toochiday, fana geeshide Xoozze caaqo suutsito tunizide, mahi aadho keehatitsi Ayyaana cazhiday, akko gaar iita firdda ekkodes beezizako ane qoppote.
30 Yikke, «Kushe mahe ta baz, ta kushe mahoda» gaydanno nu erane. Mahin, «Laatstsii fa asuntsana firddoda» yagayda.Mahe 32:35, 36 31 De7o Xoozze kushite gol7e gaama zhashane.
32 Yinttis Xoozze foo7o foo7idannippa suuba yin gaama waayera, damma olara genccide zaga wodito qoppote. 33 Fettii fettii tohe yin as tiino cazhinttida; bay7inttida; fettii fettii tohe yinnii fana waaye yellide asuntsara wolla waayinttida. 34 Achcha yeze asuntsisin yiqsinttida. Yinttis lo77on dhaboose qolo salo yezanno yin eride gisho yin qoltta bonqinttize wode ufayssara dandda7ida.
35 Yinnii gisho, damma anjjo yeze yin ammaninttidaya olippete. 36 Xoozze qofa folii, E yinttis inggoda gayde ufayssito ekkode wontsis genccodes koshshane. 37 Yikke, Geeshi Maxaafite,
«E, ye7oda gayday eeratsi wodeppa suuba ye7oda; gam7oos.Ibr. 2:3-4
38 Yezin xillize, ammanora yessada;
ooden suub maaqqiko tana ufayssoos»
yagayda. 39 Nuunii ammanii attize asunts bagga fattin suuba maaqqii dhabize asunts bagga baaya.