Yayqooba Xaafide Kiita
Gele
Yayqooba kiita, ammanze asuntsi fa yeze yestte kaallodes beezize qofito aykkida. Hyanna kiita xaafinttidanna, sa7a ubbanne lalinttide taphpho lam77i Ayhude zaruntsis. Hyay maxaafize xaafize, cinccatitsi nu oochalla feeshize oge, ammanze asi mokkize bazin lo77o woga oge beezize ohito misile gaar qonccizane.
Yayqooba kiita, dahatitsbaz, duretitsbaz, fatanabaz, lo77o wogabaz, qanaatizebaz, ammanobaz, lo77o oochabaz, il7ants hyaarizebaz, cinccitumobaz, fete fetera kacinttizebaz, uturabaz, ashkketitsibaz, melle asalla afa firddizebaz, ceeqinttize baz, dandda7abaz, woosa bazin ammanze asi oochchodes koshshizebaz ubba bilii xaafida.
Yayqooba kiita, ammano yessi ammano oochalla feeshize hyanotitsi qonccizi beezane.
Aafe Qofuntsi
Saritse 1:1
Ammanon cinccatitsi 1:2-8
Dahitumon durtumon 1:9-11
Faatana 1:12-18
Xoozze qaala sissin oochalla feeshe 1:19-27
Asi asappa dummuze koshshosanno 2:1-13
Ammanon oocha 2:14-26
Il7antsi naagebaz 3:1-18
Ammanze asin hyanna alamito 4:1—5:6
Dumma dumma zore 5:7-20
1
1 Xoozzen Laatstse Yesuus Kiristtoosa aro, Yayqooba, sa7a ubba lalinttide taphpho lam77i kochchuntsis kiittide kiita.Maato. 13:55; Mar. 6:3; Hawa. 15:13; Gala. 1:19
Saro yinttis maaqqe.
Ammanon cinccatitsin
2 Ta ishuntso, yinttana dumma dumma faatana yellize wode yin lo77o baz denggide fana kumutsi ufayssara ekkote. 3 Yin ammantto fattanizanna dandda7a yinttis inggizanno erane. 4 Yin wurssutsi yellodes dandda7iko akko facce baayzin folon kumutsi maaqqade fana oochchiza maaqqe. 5 Yinttappa oodesin cinccatitsi dhabiko Xooz woosso. Ees ingginttoda. Xoozii ooden borikaayzara ubbuntsis keehatitsara inggize Xoozii. 6 Yezin E woossize wode so7ikaayzara ammanora Xooz woosso. So7ize ooden baqo urqqin en7ize abba gaar. 7-8 Lam77i qofa yezen fa ogite eqqoosse ooden Laatstsappa akkon denggoda ga7i qoppipe.
Daha asin dure asi
9 Ammanze dahuntsi, Xoozii unttana dhoqi oochchize wode ufaytto. 10 Mahi ammanze duruntsi Xoozii unttana ziqqii oochchize wode ufaytto. Dure asuntsi fudhe fana dhaboda.Isa. 40:6-7 11 Awa fa mishara kezane maato melizane, fudhitan gufane; E lo77otitsitan dhabane. Yinnii fana, dure asuntsi fa oochite cer lalitera dhaboda.
As yellize faatana
12 Madha gamii aadhidannip suuba, Xoozii fana siiqizuntsis inggoda ga7i qaala gelide de7o worqqa zawude ekkode gisho madhite genccize asi anjjinttidaya. 13 Ooden fattaninttize wode «Tana Xoozii fattanane» gayppe. Xoozii iitara fattaninttoos; mahi E ooden fattanoos. 14 Yezin fettii fettii asi fa iita amora gochinttize woden ciminttize wode fattaninttane. 15 Yinnippa suuba, amotitsi wodaxii nagara yelane; mahi nagara diccii hyayqo yelane.
16 Ta siiqo ishuntso, ciminttippete. 17 Lo77o imon kumutsi anjjo ubba saloppan salo foo7ito medhdhide Xoozze adeppa ye7ine. Xoozii dasho fana ubba wode laaminttoos. 18 Nuunii, E medhdhide bazis anggis maaqqade fana nuna turii qaalara qoppii yelida.
Sissin oochan
19 Ta siiqo ishuntso, hyanno qoppote. Asi ubba si7odes elliso, yezin ohodesin hyanqodes ellisippe. 20 As hyanqo Xoozze koyze xillotitsi ko7oos. 21 Yinnii gisho, tuna oochan iita baz ubba hyaasii, Xoozii yin wozintte tukkide yin shemppito ashshodes dandda7ize qaala aadatitsara ekkote.
22 Yezin Xoozze qaala oochalla feeshotep attin yin ommite balinttitera si7izuntsana xalaala maaqqippete. 23 Qaala si7i oochchoose asi, E fa sintto masttootera be7ize atstse fana. 24 E fa sintto bi7i qitane, yezin E akko aazizako ellisii botane. 25 Yezin ooden nagara arotitsappa kessize folo higge qoppii bi7i, miinggi eqqize, si7idanno botikaayzara oochalla feeshize atstsay, fa oocha ubbanne anjjinttoda.
26 Fa il7antsito naagikaayzara goynane gaaze atstsay fana cimmane; E goynita hyarii. 27 Xoozze Aday tiino bore baayze geeshi goyno hyanno: inddan aden baayze na7untsanan azinii baayzutsana un madhite maadden alame tunappa fana naage.