Wahannisa Xaafide
Yesuus Kiristtoosa Wonggele
Gele
Wahannisa Yesuusa, «As maaqqii as gidda benttide Xoozze Qaala» yaga7i qonccizane. Hyay Wonggelize xaafinttidanna, eza nabbabize asuntsi Yesuusa asi ashshizaya maaqqii ye7oda ga7inttide Xoozze Na7a maaqqidanno ammanode gaaran E gidda ammanzutsis medhina de7o yezanno un erode gaar (20:31).
Wonggelizes tiino kifilize medhinabaz maaqqide Xoozze qaalan Yesuusa fetto maaqqidanno ohi maaqqii, Yesuusa ashshizaya maaqqii ye7oda ga7eze Xoozze Na7a maaqqidanno beezze melle melle kille baz beezida. Xaafize, Yesuus Kiristtoosa fa ommite turii Xoozze Na7an Xoozze adera fetto maaqqizanno (1:1) afa beezida. Yesuusa fa ommite ta Abrahameppa tiino yene (8:58) yagayda. Faaditsite Toomaasa, «Ta Laatstsayo, ta Xoozayo» yaga7i xeegida (20:28). Yennippa kaallii mahi hyanna kille bazappa benttide aafe qofa ohize taarikita kaallane. Hyay kifilize fettii fettii asuntsi Yesuusa ammani eza kaallizuntsana maaqqidanno ohine; mahi melluntsi eera wayzi ixinttezakon wayzi ammananxii ixxezako ohine. Zofane 13-17 yellodes Yesuusa aykkinttide ugure ees, E tamaaruntsara akko gaar mintsi yellintte yezako, mahi wonttisti wode suxunttodannippa tiino giigintte qaalaran mintsitsize qaala unttis ohidanno qonccizane. Hyal7e zofanuntsi Yesuusa aykkinttide bazin firddas shiiqidanno, E suxintton E denddito, yinnii gaara denddoppa suuba fa tamaaruntsis E qonccide qonccitsiti baz ohine.
Aafe Qofuntsi
Gele qofa 1:1-18
Xammaqize Wahannisan Yesuusa tiino tamaaruntsana 1:19-51
Yesuusa qoncce oocha aykkidanno 2:1—12:50
Wurssutsi qammito Yerusalaame kale 13:1—19:42
Laatstse dendditon qonccitsiton 20:1-31
Xaatsi qofa: Galila mahi fa tamaaruntsis benttidanno 21:1-25
1
De7o qaala
1 Qaala tiino yene. Qaalizen Xoozara yene; ye Qaalize Xoozii. 2 Ezin tiinoppan Xoozara yene. 3 Xoozze ubbabazito Qaala baggara medhdhida. Medhinttide bazappa fettibazin E baytsi medhinttide bazi baaya. 4 E gidda de7o yene; yinna de7itan asis foo7o. 5 Foo7ize dhuma gidda foo7ane; dhumita foo7iza gamikaaya.
6 Xoozapp kiitinttide, Wahannisa ga7inttize fettii asi yene.Maato. 3:1; Mar. 1:4; Luqa. 3:1-2 7 Asi ubba foo7iza ammanode fana E foo7ize markka maaqqii yi7ida. 8 E foo7ize baz markkidhodes yi7idap attin fa ommite foo7o baaya. 9 Asi ubbas foo7ize turii foo7o alame ye7ine.
10 Qaalize alame yene. Xoozze Qaalara alamito medhdhida, yezin alamita eza erikaaya. 11 E fa bagguntsago yi7ida, yezin E bagguntsin eza ekkikaaya. 12 Yezin E fana ekkiduntsisin E suntsite ammaniduntsis unttis Xoozze na7a maaqqade gaar adetits wolqqa inggida. 13 Un Xoozappa yelinttidap attin asi yelinttize wogara woy dhiiratsi qofappa woy as qofappa yelinttikaaya. Xoozze E unttis ade.
14 Qaala asho maaqqida; aadho keehatitsaran turetitsara kumii nu gidda aqida. Fettii na7ays E aday kale yeze bonchchiti fana yeze bonchcho nu bi7ida.
15 Wahannisa E baz markkidhida. Fa qaaltto dhoqi yiizii, «Taanii, ‹Taappa suubara ye7ize taappa tiino yeze gisho taappa aadhane› ga7i markkidhidanna hyanno» yagayda. 16 Nu ubbuntsi E aadho keehatitsite kumutsitippa anjjolla afa anjjo ekkida. 17 Xoozze higge Muse baggara inggida, yezin aadho keehatitsin turetitsi Yesuus Kiristtoosa baggara yi7ida. 18 Xoozza bi7ide asi ooden baaya; fa Aday kale yeze fettii Na7ay Xooz maaqqide E qonccizida.
Xammaqize Wahannisa markkatitsi
(Maato. 3:1-12; Mar. 1:1-8; Luqa. 3:1-8)
19 Yerusalaame yeze hyalaquntsi, kahinuntsin Leewuntsin, «Ne oode?» ga7i, Wahannisa oocode gaar eego kiittin, Wahannisa unttis markkidhide markkatitsita hyanno.
20 Wahannisa, «Ta Kiristtoosa baaya» yaga7i, loytsii markkidhidap attin kaddikaaya.
21 Un, «Yeezin, ne oode? Neenii Eliyaasane?» ga7i oocida.Mil. 4:5; Mahe 18:15-18
Wahannisa, «Ade tana baaya» gayda.
Mahi un, «Neenii ye7odes ga7intteze nabene?» ga7i oocida.
Wahannisa, «Ade» yaga7i mahida.
22 Yeezin, «Ne oode? Nu nuna kiittezuntsis ohode fana neenii nena oona ga7e?» yagayda.
23 Wahannisa mahi, Nabe Isayaasa ga7idanni gaara, « ‹Laatstse ogito luulizote!› ga7i akko baayze ganasa uukkize atstse qaalize tana» yagayda.Isa. 40:3
24 Yezin Farisaawuntsi kiittide asuntsi 25 Wahannisago, «Neenii Kiristtoosa woy Eeliyaasa woy nabe maaqqaanxi ixxiko, yeezin akkos xammaqe?» yaga7i oocida.
26 Wahannisa mahi, «Taanii hyaatsara xammaqane, yezin yin eroosse asi yin gidda eqqida. 27 E taappa suubite ye7ine. Ta melle atto yezin Ees caamma gaadiza billodes beezoos» yagayda.
28 Yinna ubba Yorddaanosa borkkappa seko fintsa, Bitaaniya katamite, Wahannisa xammaqize besite hyanida.
Xoozze Duro
29 Wahannisa wonttisti wode Yesuusa faago ye7odera bi7i, «Alame nagara uccize Xoozze Durzay hyaychche! 30 Taanii, ‹Taappa suubara fettii asi ye7oda. E taappa tiino yeze gisho taappa aadhane› ga7i ohide hyaya. 31 E oode yezako ta eroos. Yezin Isra7eele asuntsis eza qonccissades hyaatsara xammaqittera yi7ida» yagayda.
32 Wahannisa hyannigaara ga7i markkidhida: «Geeshi Ayyaana saloppa wolle gaar wodhdhizin bi7ida. 33 Yinna hyanodannippa tiino taanii eza eroos. Yezin hyaatsara xammaqodes tana kiittide Xoozze, ‹Geeshi Ayyaana wodhdhii eera yessadera neenii be7ize Geeshi Ayyaanara xammaqoday eza› yaga7i taas ohida. 34 Taanii yinna hyanodera bi7i, E Xoozze Na7a maaqqidanno markkidhane» yagayda.
Yesuusa kaallide tiino tamaaruntsana
35 Mahi wonttisti wode Wahannisa fa tamaaruntsappa lam77untsara wolla eqqida. 36 Yesuusa aadhodera Wahannisa bi7i, «Xoozze durize hyaynishe!» yagayda.
37 Lam77i Wahannisa tamaaruntsi Wahannisa gaazanno si7i Yesuusa kaallida. 38 Yesuusa fana kaallizuntsana suub maaqqii bi7i, «Akko koye?» yaga7i oocida.
Un mahi, «Rebbii, ne aba yene?» yagayda. (Bilitsita Asttamaarizayo ga7e.)
39 Yesuusa unttago, «Hyankka yi7i bo7ote» yagayda. Un hyanggi E yezebezito bi7ida. Ye wode sa7ita taphphi saate gaar maaqqide gisho E kale feezhida.
40 Wahannisa gaydanno si7i, Yesuusa kaallide lam77i tamaaruntsappa fete, Simoon Phexiroosa ishe Inddiriyase. 41 Inddiriyase tiino fa ishe Simoonara yellintti, «Nuunii Mesiihi denggida» yagayda. (Bilitsitan Kiristtoosa ga7e.) 42 Inddiriyase Simoona Yesuusago ki7ida.
Yesuusa Simoona bi7i, «Ne Yoona na7a Simoona; ne suntsita Keefa*Keefa: Gaaze qaalize Aramayke doona maaqqii, Girike doonara bilitsita Phexiroosa woy lalla ga7inttane. ga7i xeeginttoda» yagayda.
Yesuusa Filphoosan Natina7eelen xeegida
43 Wonttisti wode Yesuusa Galila qitodes qofa accida. E Filphoosa denggi, «Tana kaallo!» yagayda. 44 Filphoosa, Inddiraseran Phexiroosaran yezide Beetesayda katama asi.
45 Filphoosa Natina7eela yellii, «Muse higge maxaafite, mahi nabuntsin E baz xaafide Yoosefa na7a Naazirete Yesuusa nu denggida» yagayda.
46 Natina7eela mahi, «Naazirete katamappa lo77o baz kessades dandda7ane?» yagayda.
Filphoosa, «Yi7i bo7o» yagayda.
47 Natina7eela faago ye7izaya Yesuusa bi7i, «Gene baayze turii Isra7eele asi hyaynishe!» yagayda.
48 Natina7eela Yesuusago, «Ne tana aba ere?» yagayda.
Yesuusa mahi, «Filphoosa nena xeegodannippa tiino, ne belese minxa oomo yezin ta nena bi7ida» yagayda.
49 Natina7eela mahi, «Asttamaarizayo, ne Xoozze Na7a! Ne Isra7eele kaati!» yagayda.
50 Yesuusa eego, «Ta nena belese minxa oomo bi7ida gayde gisho ammanane? Ne hyannippa aadhizebaz be7ada!» yagayda. 51 Mahi Yesuusa, «Taanii yinttis turibaz ohine; salo bugunttin, Xoozze kiitanchchuntsi As Na7alla afa kessaderan keddoderan yin be7ada» yagayda.Medho 28:12