Luqasa Xaafide
Yesuus Kiristtoosa Wonggele
Gele
Yesuusa dooride taphpho lam77i hawaaruntsi gidda Luqasa baaya. Luqasa Wonggele, Yesuusa tiino nabunts doontte ye7oda ga7intti ohinttidanno, Isra7eeluntsi kaseppa kafittera yezide «Kiristtoosa» maaqqidanno as kochchi ubba ashshizaya maaqqidanno qonccizane. Luqasa, fa maxaafte Yesuusa dahuntsis Wonggele sabbakodes fa adeppa kiitinttidaya maaqqidanno hyanna Wonggeltte asuntsis yeze dumma dumma madhappa kessizaya maaqqidanno ohida. Luqasa Wonggele gidda, Yesuusa ye7e baz ohize tiino zofantten Yesuusa ude Salo kezidanno ohize faaditsi zofantte benttii ohinttidanna ufays baz. Yesuusa Salo kezidannippa maaqqii ammano wayzi diccezakon dalggezakon ohize taarikito hyay Wonggele xaafize hawaaruntsi oocha maxaafite xaafida.
Kiitanchcho mazmure baz, Yesuusa yelinttide wode wude yenggizuntsi hyanggi bi7idanno ohize taarike, Yesuusa na7atitsa Xoozze keetstsa hyanggidanno, yiqsinttize Samaara atstse bazin dhabii benttide na7ay baz ohize taarike, Luqasa Wonggele xalaala benttize taarike. Luqasa Wonggeltte gaxappa gaxa yellodes yeze waanna qoftta woosa baz, Geeshi Ayyaanabaz, Yesuusa oocha gidda maachchuntsis yeze bessin Xoozii nagara maarizanno.
Aafe Qofuntsi
Gele qofa 1:1-4
Xammaqize Wahannisan Yesuusa yelintton dichiton 1:5—2:52
Xammaqize Wahannisa oocha 3:1-20
Yesuusa xinqqatton fattaninttidanno 3:21—4:13
Yesuusa Galila oochchide oocha 4:14—9:50
Galilappa Yerusalaame yellodes 9:51—19:27
Wurssutsi saamintte Yerusalaame kara gancce 19:28—23:56
Hyayqoppa dendde, asis qonccen salo keze 24:1-53
1
1 Bonchcho Tewofiloosa, nu gidda folinttide bazis gaamuntsi, faas dandda7inttide gaar xaafida. 2 Yinna taarikito un xaafidanna tiinoppa aykkii aafe markkuntsin qaala xaafii nuus ohidanno. 3 Taanin ta baggara tiinoppa qoppii bi7idanippa suuba yinna taarikita hyanidanno luulizii nees Tewofiloosas xaafizanna taas lo77o maaqqii benttida. 4 Yinnan, ne tamaaridanna turo maaqqidanno erisodes.
Xammaqize Wahannisa yelintte
5 Yihuda kaat Heroodisa wode Abiya baggappa maaqqide Zakkariyaasa gaaze Ayhude kahine yene. E machchitan Aarona kochchappa. I suntsitan Elssabeexo.1 Zeena 24:10 6 Lam77untsin Laatstse wogan kiitto ubba naagii bore baayzin Xoozze tiintte xillotitsara yezida. 7 Yi7op attin Elssabeexa dhoontsi maaqqide gisho unttis na7a baaya. Lam77untsin cinggida.
8 Fettii wode Zakkariyaasa fa tarttii ode Xoozze tiino kahinetitsara oochchane. 9 Kahinetitsi wogara Xoozze keetstsa gelii ixaane cugissades eza ixa yellida. 10 Ixaane cugize wode asuntsi ubba bale woossane.
11 Laatstse kiitanchchize zharsho zharshize bestippa mizaqi zalara eqqii benttida. 12 Zakkariyaasa eza bi7i tannii gaama zhashtida. 13 Yezin kiitanchchize eego, «Zakkariyaasa zhashtippe; ne woosita sinttida. Ne machchita Elssabeexa dhiiratsi na7a yeloda, eza Wahannisa ga7i ne suntsoda. 14 E nees wallon ufayssi maaqqada; gaamuntsi E yelintte ufayttoda. 15 Laatstse tiino E damma maaqqada; woyne ushshii maaqqin melle matstsize ushshii uzhaama. Fa inttii sazite yezara Geeshi Ayyaanara kumoda.Faydo 6:3 16 Isra7eele asuntsappa gaamuntsana fa Laatstse, Xoozzego mahoda. 17 Aduntsi wozintto na7untsago mahoda, kiitinttoosuntsana xillotitsi cinccatitsago mahode gaar, Laatstsis koshshize worzha giigisades Eeliyaasa ayyaanaran wolqqara Laatstse tiintte hyammada» yagayda.Mil. 4:5-6
18 Zakkariyaasa kiitanchchizego, «Ta yinno akkora erode? Taaran ta machchitira cinggida» gayda.
19 Kiitanchchize mahi, «Taanii Xoozze tiintte eqqize Gabre7ele. Hyanna misiraachchito nees ohodes Xoozappa kiitinttida.Dane. 8:16; 9:21 20 Yikke, wodito naagii folinttode ta qaaltto ne ammananxii ixxide gisho hyanna folinttode wontsis ne doontta muume maaqqada, ohinttodesin ne dandda7aama» yagayda.
21 Ye wode Zakkariyaasa Xoozze keetstsite gelii gam7ide gisho akko yi7ido ga7i asuntsi bale naagitera gam7ida. 22 E bale kezii unttana ohissades dandda7ikaaya. Malla kushera beezanip attin ohinttodes dandda7oosanno bi7ide wode qonccitsi bi7idanno erida.
23 Zakkariyaasa oocha wodito folii fa kara maaqqida. 24 Yinnippa suuba, E machchita Elssabeexa wodaxida. Ichchin agina kumutsi fana geentsi asis benttikaayzara gam7ida. 25 Iza, «Laatstsii fa maarotitsite ta toochito as giddappa hyaasodes bi7i hyanna wodite hyanno taas oochchida» yagayda.
Yesuusa yelinttodanna tiinidhii ohinttida
26 Elssabeexa wodaxidannippa izippuntsa agintte, Xoozii Kiitanchcho Gabre7ele Galila gade yeze Naazirete katama kiittida. 27 Ezin Yoosefa gaaze kaat Dawute kochchappa maaqqide atstses oocinttide wudurttigo kiitinttida. Yinna wudurtta Mayramo ga7inttane.Maato. 1:18 28 Kiitanchcho iigo hyanggi, «Gaama kadhinttidanne, saro nees maaqqe, Xoozii neera yene» yagayda.
29 Mayrama E ohite gaama tannii, «Hyanna akko saritse» ga7i qoppida. 30 Kiitanchchize mahi, «Mayrame, zhashtippe; ne Xoozze tiintte nashsho denggida. 31 Yikke ne wodaxoda dhiiratsi na7a yeloda, E suntsiton Yesuusa ga7i suntsoda.Maato. 1:21 32 E damma maaqqada, Ubbappa kattara Xoozze na7a ga7intti xeeginttoda. Laatstse Xoozze E aday Dawute araata ees inggoda.2 Sam. 7:12-13, 16; Isa. 9:7 33 E Yayqooba kochchalla afa medhina ka7itoda; E ka7itumttis hyal7e baaya» yagayda.
34 Mayrama kiitanchchizego, «Yinna wayzi hyanode? Ta dhiiratsara yellinttikaaya» yagayda.
35 Kiitanchchize mahi, «Geeshi Ayyaana neella afa wodhdhoda, Ubbappa kattara Xoozze wolqqita neella afa shemppoda. Yinnii gisho, yelinttide geeshi na7ay Xoozze Na7a ga7inttoda. 36 Yikke, ne igintta Elssabeexa fa cimatitsi laytsite dhiiratsi na7a wodaxida. Iza dhoontsi ga7inttidanno, yezin hyatte izippuntsa agina aykkida. 37 Xoozza gamizebaz baaya»Medho 18:14yagayda.
38 Mayrama, «Yeezako, taanii Laatstse arttis, ne qaaltti gaar taas yi7o» yagayda. Yinnippa suuba, kiitanchchize iippa shaakkinttida.
39 Mayrama yinna saamintte denddii Yihuda sa7a yeze fettii ale katama qitida. 40 Zakkariyaasa kara gelii Elssabeexo sarotsida. 41 Elssabeexa Mayrama sarotsizanno si7ize wode I saztte yeze na7ay ufayssara dollida. Elssabeexa Geeshi Ayyaanara kumii, 42 fa qaaltto dhoqi yiizii, «Neenii maachuntsappa anjjinttidanno, ne wodaxide na7ayin anjjinttidaya. 43 Yi7o yezin, ta Laatstse intte, neenii taago ye7ode gaar ta oode? 44 Yikke ne sarotitsito ta si7ize wode ta sazite yeze na7ay ufayssappa dollida. 45 Laatstsii foloda ga7i inggide qaaltto ammanidanna, iza anjjinttidanno» yagayda.
Mayrami mazmure
46 Mayrama hyannii gaara yagayda:
«Ta shemppita Laatstsa bonchchane,1 Sam. 2:1-10
47 ta Ayyaanze gaalla Xoozzella ufayttane.
48 E fa arttii toochito bi7ida.
Hyaynoppa aykkii yeletitsi ubba tana anjjinttidanno ga7oda.1 Sam. 1:11
49 Wolqqaama maaqqide E, taas damma baz oochchida.
E suntsita Geeshi.
50 Eza bonchchizuntsalla afa,
E maarotitsita medhinappa medhina yellodes.
51 Fa qesite mintsi baz oochchida,
fa wozintte uturtizuntsanna lalida.
52 Damma kaatuntsana araatizeppa wodhizida;
Fa ommito toochizuntsana bonchchida.Iyo. 5:11; 12:19
53 Naydhdhiduntsana lo77o bazara mishshida,
yezin duruntsana kallo kushe dakkida.
54 Fa maarotitsito qoppii,
Fa ariza Isra7eele maaddida.
55 Yinnan nu aduntsis ohide qaala,
Abrahamasin E zarttis ga7idanno medhinas folodes»1 Sam. 2:1-10Medho 17:7
yagayda.
56 Mayrama Elssabeexi kale hyaydzdzii agina gaar gam77i fa kara maaqqida.
Xammaqize Wahannisa yelintte
57 Elssabeexis yelo qamma yellin dhiiratsi na7a yelida. 58 I dootsuntsin I iginuntsi Laatstsii damma maarotitsi oochchidanno si7i, iira wolla ufayttida. 59 Osfuntso qammite zhooga na7aya garrazodes yi7ida. E aday suntsite Zakkariyaasa ga7i suntsodes koyda.Leewe 12:3 60 Yezin intta, «Ade, Wahannisa ga7inttodes beezane» yagayda. 61 Unttin, «Ne iginutsappa hyay suntsera xeeginttide ooden baaya» yagayda. 62 E aday oode ga7i suntsodyezako erodes koyi eza malla oocida. 63 E xaafizebaz oocii ekkii, «E suntsita Wahannisa» ga7i xaafida. Ubbuntsi E xaafidanno bi7i gaama qoppida. 64 Iira Zakkariyaasa il7antsita bilinttida, Xooz galatittera ohintte aykkida. 65 Dootsuntsi ubba zhashmora kumida. Hyanna hyanidanna ale Yihuda sa7a ohinttida. 66 Yinno si7eze ubbuntsi, «Hyay na7ay akko yi7ad yessa?» ga7i fa gidda ohinttida. Laatstse kushita eera yene.
Zakkariyaasa tinbbite
67 Wahannisa aday Zakkariyaasa Geeshi Ayyaanara kumii hyannii gaara yaga7i tinbbite ohida.
68 «Isra7eele Laatstse Xoozze galatintto,
yi7i fa asuntsana wozida.
69 Fa arize Dawute keetstsa
atotits wolqqa dentsida.
70 Yinnan zaga wode geeshi nabunts doontte ohinttidanni fana,
71 E ashita nu morkkuntsappan
nuura olinttize ubbunts kushtippa.
72 Yinno E oochchidanna nu aduntsis fa maarotitsito beessadesin,
fa geeshi caaqito naagodes.
73 Nu aday Abrahamas caaqqide
caaqito qoppodesin
74 nu morkkuntsi kushtippa kessii
zhashimo baytsi ees kiitinttode fana.
75 Nu laytsite ubbanne geeshshatitsaran xillotitsara
fa tiintte nuna essodes.
76 Ta na7ayo, neenii Ubbappa kattara Xoozze nabe ga7inttoda.Mil. 3:1
Laatstse ogito loytsodes ne E tiintte hyanggoda.
77 Un nagartta uccinttin,
un atotitsi era denggodanno ne Laatstse worzhitis ohoda.
78 Nu Xoozze lo77o maarotitsitippa denddii
wontta xalqe nuus saloppa kezida.
79 Yinnan dhuma giddan,
hyayqo dasho oomo yezuntsis foo7issades,
nu tohiton saro ogego mahodes»
yagayda.Isa. 9:2
80 Na7ay diccida, Ayyaanara minggida, Isra7eele asuntsis benttode wontsis akko baayze ganasa yezida.