Maatoosa Xaafide
Yesuus Kiristtoosa Wonggele
Gele
Maatoosa Wonggele, yo7odes ga7intti ufayssara naaginttize ashshize Yesuusa maaqqizannon Xoozze gal77a caaqo fa asuntsis inggide ufays qaala folide E baggara maaqqidanno ohize Wonggele. Hyay Wonggelize Yesuusa un gidda yelintti diccide Ayhuduntsis xalaalas maaqqikaayzin kumutsi alame ubbannis.
Maatoosa Wonggele, gaama naaginttera xaafinttide maxaafe. Maatoosa fa maxaafito Yesuusa yelinttippa dentsii, E Xammaqintton E fattaninttidanno ohi maaqqii, Galila E sabbakide bazin, tamaarssidannon hyargganchchuntsana fatstside baz ohine. Yinnippa kaallii, Yesuusa Galilappa Yerusalaame hyanggidannon E hyanna sa7ite yeze wode wurssutsi saamintte hyanide baz qonccizane. Yinnan E suxintton, E hyayqiton E denddito aykkida.
Hyay Wonggelize, Yesuusa Xoozze higge billodes adetits wolqqa yezayan Xoozze ka7itumo baz tamaarssize damma asttamaare mahi shiishane. E timirttitippa gaama bagita dumma dumma wogara giiginttide ichchin bessa shaginttida.
1. Xoozze ka7itumo yeze as hyanotitsi, oocha, adetits wolqqan wurssutsi ixa ohize Derella afa Timirtte (Zofa 5-7).
2. Taphpho lam77i tamaaruntsi Wonggele sabbakodes qitize wode unttis ingginttide woga (Zofa 10).
3. Xoozze ka7itumo baz tamaarssodes shiiqide dumma dumma aazizto (Zofa 13).
4. E tamaare maaqqize baz billii ohize timirtte (Zofa 18).
5. Hyatte alamtti wurssutsite Xoozze ka7itumo ye7e baz ohize timirtte (Zofa 24-25).
Aafe Qofuntsi
Yesuus Kiristtoosa yelintte xussan E yelintto 1:1—2:23
Xammaqize Wahannisa oochito 3:1-12
Yesuusa xinqqatton fattanintto 3:13—4:11
Yesuusa Galila fa oochito aykkidanno 4:12—18:35
Galilappa Yerusalaame yellodes 19:1—20:34
Wurssutsi saamintta Yerusalaame guta 21:1—27:66
Laatstse hyayqoppa dendditon qonccitsito 28:1-20
1
Yesuusa yelintte xussii
(Luqa. 3:23-38)
1 Yinnippa kaallii xaafinttide Dawute na7a Abrahama na7a maaqqide Yesuus Kiristtoosa yelintto.
2 Abrahama Yisaaqa yelida;
Yisaaqa Yayqooba yelida;
Yayqooba Yihudan E ishuntsana yelida;
3 Yihuda Ti7imarippa Faaresenen Zaaran yelida;
Faaresa Asroome yelida;
Asroome Raame yelida;
4 Raame Aminaadabe yelida;
Aminaadabe Na7asoona yelida;
Na7asoona Salmoone yelida;
5 Salmoone Re7aabippa Boo7eza yelida;
Boo7eza Uruutippa Iyobeede yelida;
Iyobeede Issey yelida;
6 Isseyen kaati Dawute yelida;
Dawute Ooriyo machchitippa Solomone yelida;
7 Solomone Robi7aama yelida;
Robi7aama Abiya yelida;
Abiye Asaafa yelida;
8 Asaappa Iyosaafixe yelida;
Iyosaafixe Iyoraame yelida;
Iyoraame Ooziyane yelida;
9 Ooziyane Iyo7ataama yelida;
Iyo7ataama Akkaza yelida;
Akkaza Hiziqiyasa yelida;
10 Hiziqiyasa Minaase yelida;
Minaase Amoona yelida;
Amoona Iyosiyaasa yelida;
11 Isra7eele asuntsi di7intti Baabiloone gaaze sa7a hyanggide wode Iyosiyaasa Ikoniyaanan E ishuntsana yelida.
12 Baabiloone sa7a Isra7eele asuntsi di7inttii hyanggideppa maaqqii Ikoniyaana Salatiyaale yelida.2 Kat. 24:14-15; 2 Zeena 36:10; Er. 27:20
Salatiyaale Zerubaabela yelida;
13 Zerubaabela Abdiyu yelida;
Abdiyu Eliyaaqeme yelida;
Eliyaaqeme Azaara yelida;
14 Azaara Sadooqe yelida;
Sadooqe Akime yelida;
Akime Eliyuuda yelida;
15 Eliyuuda Alaazare yelida;
Alaazare Maatane yelida;
Maatane Yayqooba yelida;
16 Yayqooba Yoosefa yelida;
Yoosefa Kiristtoosa gaaze Yesuusa yelide Mayrami azini.
17 Yikke, yelintta Abrahameppa Dawute yellodes taphpho oyddii. Dawuteppa hyanggi Baabiloone di7e yellodes taphpho oyddii. Baabiloone di7eppa hyanggi Kiristtoosa yellodes taphpho oyddii yelintte maaqqane.
Yesuus Kiristtoosa yelintto
(Luqa. 2:1-7)
18 Yesuus Kiristtoosa yelintta taarike hyannippa kaallizanno. E intta Mayrama Yoosefas oocintti yezite Yoosefa ekkikaayzin Geeshi Ayyaanappa wodaxida. 19 Yoosefa xillo as maaqqide gisho izo as gidda kessodes koykaaya. Yinnii gisho aachchii izo ashshodes qoppida. 20 E yinna qofite yezin Xoozze kiitanchcho abukkora qonccii, «Dawute na7ay, Yoosefa, ne oocide Mayrama wodaxide Geeshi Ayyaanappa maaqqide gisho izo ekkodes zhashtippe» yagayda. 21 Iza dhiiratsi na7a yeloda, E fa worzhito un nagarttippa ashshize gisho E suntsito ne Yesuusa ga7i xeegoda.
22 Laatstse nabe Isayaasa doona. 23 «Yikke wudurtta wodaxoda; dhiiratsi na7an yeloda; E suntsita Ammanu7eela ga7inttoda» ga7inttidanna folinttode fana hyanna ubbanna hyanida. Ammanu7eela gaazannis bilitsita «Xoozii nuura yene» ga7e.
24 Yoosefa genttoppa barkki Laatstse kiitanchchuntsi kiittidanni fana Mayramo fa kara kanggida. 25 Yezin fa anggis na7aya yelode wontsis izo girmmikaaya;*Izo girmmikaaya: Machchira azinara wolla aqizanni fana aqikaaya ga7e. Yelinttide na7aya Yesuusa ga7i xeegida.