24
Yesuusa Xoozze keetsita Wul7inttodanno tiino ohida
(Mar. 13:1-2; Luqa. 21:5-6)
1 Yesuusa Xoozze keetstsappa kezii qitizin, E tamaaruntsi eego yi7i, Xoozze keetsi gimbito beezida. 2 Yesuusa unttago mahi, «Yee! Hyanno ubbanno be7inete? Taanii yinttis turo ohine; shuchchi shuchchalla afa keellinttide fana fettin wul7inttikaayzara attoos» yagayda.
Tiinoppa hyanodebaz
(Mar. 13:3-13; Luqa. 21:7-19)
3 Yesuusa Shamahe Derella afa bettezin, E tamaaruntsi fa xalaala eego yi7i, «Yinna ayde hyanod yezako nuus oho. Mahi ne ye7itisin wode wurssutsitis malla akko? yaga7i oocida.
4 «Yesuusa mahi, Yinttana ooden balitsaame fana naaginttote! 5 Akkos gayko, gaama asuntsi ta suntsite, ‹Taanii Kiristtoosa, Xoozii as ashshodes kiittidaya› yagaytira yi7i gaama asi balitsoda. 6 Yin olan ola wore si7odes yene. Yinnii gaarize baz hyanodes beezize gisho yirggippete. Yezin wurssutsita hyaga. 7 Worzha worzhara, fettii ka7itumo melle ka7itumora olinttoda. Nayen sa7a en7e dumma dumma bessa maaqqada. 8 Yinna ubbanna yelo dha7es zooqe fana.
9 «Ye wode asuntsi yinttana waayes aatsii inggoda, accodan wodhoda. Ta suntsiti gisho asi ubba yinttana ixxoda. 10 Ye wode gaamuntsi ammano ashshoda. Fa gidda fete fetaya aatsii inggoda, fete fetaya ixxoda.Maato. 10:22 11 Mahi gaama worddo nabuntsi denddii gaamuntsana balitsoda. 12 Iitatitsi gaanggize gisho gaama asuntsi siiqita toyoda. 13 Yezin wurssutsi yellodes genccide atstse attoda. 14 As ubbas markka maaqqade fana Xoozze ka7itumo Wonggele Sa7a ubba ohinttoda. Yinnippa suuba, wurssutsita yo7oda.Maato. 10:22
Dhabsse tuna
(Mar. 13:14-23; Luqa. 21:20-24)
15 «Yinnii gisho, nabize Daanela ohide dhabsse tunatitsi geeshi bessa eqqidaya yin bo7oda. Qoppize Yinna waagizako nabbabize qoppo!Mahe 9:27; 11:31; 12:11 16 Yinnii wode Yihuda sa7a yezuntsi derego woxxo. 17 Fooqella afa yeze atstse fa keetstsite yeze baz ekkodes keetstsa gelanxi woxxo. 18 Gade yeze fa ma7o ekkodes suub maaqqippe.Luqa. 17:31 19 Ye wode wodatsi maachuntsin dhantsize maachuntsis gaama un7intte maaqqada. 20 Barggo woy Sambbata yin woxxii dhabizanna maaqqaame fana Xooz woossote. 21 Akkos gayko, sa7a medhinttidannippa hyayno yellodes hyanikaayze baz, mahi tiinosin mulo hyanoose madha hyanoda. 22 Yinna qammiti faydito hyaatitsikaayzako as maaqqide ooden attoos. Yezin E fa dooride asunts gisho yinna qammiti faydito hyaatitsoda.Medho 12:1; Qon. 7:14
23 «Ye wode ooden yinttana, ‹Yikke, Kiristtoosa hyanne› woy ‹Sekka yene› yagayko ammanippete. 24 Akkos gayko, worddo Kiristtoosuntsin worddo nabuntsi denddoda. Unttis dandda7inttiko, melle atto yezin Xoozis doorinttiduntsana balitsodes damma mallan gaama qofize baz oochchoda. 25 Qoppote, ta yinttis hyanno tiinii ohine.
26 «Yinnii gisho, asunts yinttago, ‹Yikke, Kiristtoosa akko baayze ganas sa7a yene› gayko, ize hyanggippete. Woy yinttago, ‹Yikke, qol7a yene› gayko, unbaz ammanippete. 27 Akkos gayko, zeelintsi salo zeelinggii, awa kessappa gelo yellodes benttizanni gaar, As Na7a ye7ita yinnii gaar maaqqada.Luqa. 17:23-24
28 «Bawuta yeze bessa ankkuntsii shiiqoda.Luqa. 17:37
29 «Ye wode yinna waaye qammitippa suuba,
«Iira awa dhumoda,
aginan fa foo7ito kayoda.
Xoolintton saloppa wodhdhoda,
mahi salo yeze wolqqa buqunttoda. Isa. 13:10; Er. 2:10
30 Ye wode As Na7a ye7e malla salolla afa benttoda. Sa7a yeze asi ubba yeekkoda. Mahi As Na7ay, wolqqaran damma bonchchora salo dhonne giddara yeezin yin bo7oda. 31 E fa kiitanchchuntsana damma fuggize moyzera kiittoda. Un sa7a oyddii zala qitii, hyayga gaxappa seko gaxa yellodes yeze ees doornttiduntsana shiishoda.Mahe 7:13; Zakka. 12:10
Laatstsii yo7ode qamma malla
(Mar. 13:28-31; Luqa. 21:29-33)
32 «Belese minxappa tamaarote. Iza aaci hyaye kessize wode torchche ukkidanno yin erane. 33 Yinnii gaaran, yin hyanno ubba be7ize wode furtsa ukkidanno erote. 34 Taanii yinttis turo ohine; hyanna ubbanna folinttode wontsis, hyanna yeletunts aadhaama. 35 Salon sa7an aadhoda, yezin ta qaaltta aadhoos.Medho 6:5
Laatstsii yo7ode qammito ooden eroos
(Mar. 13:32-37; Luqa. 17:26-30, 34-36)
36 «Yinna qammiton yinna saatto salo yeze ta adayp attin melle salo kiitanchchuntsana maaqqin woy Na7aya maaqqin ooden eroos. 37 As Na7a ye7ita, Nohe wode hyanidanni gaar maaqqada. 38 Ye wode dhabsse hyaatsi yo7odeppa tiino Nohe markkabe gelide qamma yellodes, asuntsi mu7iten uzhite, ekkitera gelitera gam77ida. 39 Dhabsse hyaatsi yi7i, unttana ubba dhabsode wontsis qoppikaaya. As Na7a ye7itan yinnii fana yi7ada.
40 «Ye wode lam77i asunts gade oochchoda. Unttappa fetay ekkinttoda, hyankkay attoda. 41 Lam77i maachuntsi wolla gaaccoda. Unttappa feta ekkinttoda hyankkanna attoda.
42 «Yikke, yin Laatstse akko qamma yo7od yezako yin eroosse gisho miinggi naagote. 43 Yezin kayzo qammappa akko saate yo7ode yezako karttii aday erizako, fa keetsita bookinttaame fana barkki naagoda yeshsha. 44 Yinnii gaaran, As Na7ay yin qoppikaayze saate yo7ode gisho yin giigii yezote.
Iitan lo77o arunts aazize
(Luqa. 12:41-48)
45 «Yeezin, fa kara asuntsis katstsa koshshize wode inggode fana E laatstsize dooride ammaninttizen wozinara yeze aro oode? 46 E fa laatstse kiittidanno oochchizin E laatstse yi7i denggide arize anjjnttida. 47 Taanii yinttis turo ohine; laatstsii ye ariza fa bazitilla ubba shuumoda. 48 Yezin ye arize iita maaqqiko, ‹Ta laatstse gam77i yo7oda› yaga7i fa wozintte qoppii, 49 fa lagge oochchizuntsana hyadhdhe aykkiko, matsinttizuntsara muyko uzhiko, 50 Ye arize laatstse E qoppikaayze qamman E eroosse saate, 51 yi7i eza gachchoda. E ixiton cubbuntsara mahoda. Yinna besite ees yeefon achchi garccingge maaqqada.