Marqqoosa Xaafide
Yesuus Kiristtoosa Wonggele
Gele
Marqqoosa Wonggele, «Hyay Xoozze na7a Yesuus Kiristtoosa Wonggele dentstse» yaga7i tiinii dentsane. Hyanna Wonggeltte Yesuusa oocha asin adetits wolqqa aden maaqqii shiiqida. E adetits wolqqita E timirttite, tuna ayyaanalla afa yeze wolqqiten asuntsana nagarappa maarizanne benttida. Yesuusa, «Taanii, asuntsana nagara arotitsappa kessodes tanatitsito aatsii inggodes yi7ide As Na7a» yaga7i fa doonara ohida.
Marqqoosa Yesuusa taarikito luule ogeran wolqqa kumide ogera ohida. Marqqoosa Yesuusa qaaltton timirttito maaqqikaayzin E oochchide gaama qofize oochito tiinizi ohida. Marqqoosa Xammaqize Wahannisa taarikito, Yesuusa xinqqate E fattaninttidanno hyaatara ohi maaqqii, Yesuusa timirttiton E fatstsizanno dalggizii ohida. Aqii aqii hyammadera Yesuusa tamaaruntsi Yesuusa loytsii erii erii hyanggida, yezin Yesuusa ixxizuntsi wozzii ixxii ixxii hyanggida. Hyal7e zofanuntsi Yesuusa yessi hyaase saamintte folinttide oochchiti baz ohine. Yentsesin E suxintton E dendditi baz ohine. Wonggele faaditsite teqera benttide zofanuntsi fettii fettii maxaafite xalaala yene.
Aafe Qofuntsi
Wonggele dentstse 1:1-13
Yesuusa Galila sa7a fa oocha aykkidanno 1:14—9:50
Yesuusa Yerusalaame oochchide oocha 10:1-52
Wurssutsi saamintta Yerusalaame kara gancce 11:1—15:47
Yesuusa hyayqoppa denddito 16:1-8
Hyayqoppa denddide Laatstse qonccitsin Salo keze 16:9-20
1
Xammaqize Wahannisa oge giigizane
(Maato. 3:1-12; Luqa. 3:1-18; Waha. 1:19-28)
1 Hyay Xoozze Na7a Yesuus Kiristtoosa Wonggele dentstse. 2 Nabe Isayaasa xaafide maxaafite Xoozii,
«Yikke, taanii ta Kiitanchcho
neeppa tiino dakkoda.
E ne ogito giigisada.Mil. 3:1
3 Fetay akko baayze ganasa fa qaaltto dhoqi yiizii,
‹Laatstse ogito giigizote;
E yedhdhade wustto
ees giigizote gayda› »
yagayda.Isa. 40:3
4 Xammaqize Wahannisa asuntsana xammaqittera, «Yin nagarttippa maaqqii xammaqinttote; Xoozii yin nagartto atto ga7oda» yaga7i qaala ohitera akko baayze ganasara yi7ida. 5 Yihuda sa7a yeze asuntsi ubban Yerusalaame katama asuntsi ubba Wahannisago ye7ine. Fa nagartto faaxin, Wahannisa unttana Yorddanoosa borkka xammaqida.
6 Wahannisa gimale isintseppa dadinttide afula ma77ida. Fa qazintte saqqe danccida; mahi boolen dekera shida mu7ida.2 Kat. 1:8 7 Wahannisa qaala ohitera, «Taappa suubara damma miinggize ye7ine. Melle atto yezin, taanii E caamma gaadiza zuggii billodes beezoos. 8 Taanii yinttana hyaatsara xammaqane, yezin E yinttana Geeshi Ayyaanara xammaqoda» yagayda.
Yesuusa Xammaqintton fattaninttidanno
(Maato. 3:13-17; 4:1-11; Luqa. 3:21-22; 4:1-13)
9 Yesuusa ye wode Galila awrajja yeze Naazirete katamappa yi7in, Wahannisa Yorddaanosa borkka xammaqida. 10 Yesuusa hyaatsitippa kezze wode salo bugunttin, Geeshi Ayyaana eella afa wolle gaara wodhdhodera bi7ida. 11 Mahi saloppa, «Taanii kadhize ta na7ay nena; ta neella ufayttane» yagaaze qaala yi7ida.Medho 22:2; Maz. 2:7; Isa. 42:1; Maato. 3:17; 12:18; Mar. 9:7; Luqa. 3:22
12 Iira Geeshi Ayyaana Yesuusa akko baayze ganasa kanggida. 13 Yesuusa akko baayze ganasa Xalahera fattaninttitera oyttam qamma gam7ida. Xootsara yezida, yezin kiitanchchuntsi yi7i eza maaddida.
Yesuusa molo aykkize oyddii asuntsana xeegida
(Maato. 4:12-22; Luqa. 4:14-15; 5:1-11)
14 Wahannisa acinttidannippa suuba Yesuusa Xoozze ka7itumo Wonggele ohitera Galila awrajja qitida. 15 Ize, «Wode yellida; Xoozze ka7itumo ukkida. Yin nagarttippa maaqqii, Wonggele ammanote» yagayda.Maato. 3:2
16 Yesuusa Galila Abba kalera aadhitera, molo aykkize, Simoonaran E ishe Inddirasera, fa gitito*Gite: Molo aykkize afula aazize baz. Abba olizuntsana bi7ida. 17 Unttago, «Tana kaallote; ta yinttana as ayfo tamaarssoda» yagayda 18 Unttii iira fa gitito olii ashshii Yesuusa kaallida.
19 Yesuusa eeratsi tiino hyanggi, lam77i ishuntsana Zabdoosa na7untsana, Yayqoobaran Wahannisara gongge gidda fa gitito giigizuntsana bi7ida. 20 E unttana bi7ide gaar xeegida. Un fa adaya Zabdoosan, ees oochchizuntsara gongge gidda olii ashshii Yesuusa kaallii qitida.
Tuna ayyaana aykkide atstse faxida
(Luqa. 4:31-37)
21 Unttii Qifirnahoome katama yellida. Sambbata gelide gaar Yesuusa ellisii Ayhude woosa keetstsa gelii tamaarsse aykkida. 22 Adetits wolqqara yeze asi fana tamaarssanep attin higge asttamaarunts fana tamaarssoosse gisho asuntsi E timirttite gaama qoppida.Maato. 7:28
23 Ye wode tuna ayyaana aykkide fettii atstse Ayhude woosa keetstsa gelii fa qaaltto dhoqi yeyzi, 24 «Naazirete Yesuusa, neenii nuuppa akko koye? Nuna dhabssodes ne yi7ida? Ne oona yezako ta erane; ne Xoozze Geeshi.» Yagayda.
25 Yesuusa ye tuna ayyaanza, «Hyayzo, hyay atstseppa kezo» ga7i seerida.
26 Tuna ayyaana atstsa labbizii, wuysizii ezappa kezida. 27 Asuntsi ubba gaama qoppii, «Hyanna akko? Hyay atstse fa adetits wolqqara melle atto yezin tuna ayyaanan kiittane. Unttii ees kiittinttane; hyanna akko kille timirtte?» yaga7i, fa gidda fete feta oocida.
28 Yesuusa markkatitsita ellisii Galila sa7a yeze guta ubba kezida.
Yesuusa gaama hyargginttizuntsana fatstsida
(Maato. 8:14-17; Luqa. 4:38-41)
29 Yesuusa Ayhude woosa keetstsappa kezii, Yayqoobaran Wahannisaran Simoona karan Inddirase kara qitida. 30 Simoona machchiti intta damma otstsi michara hyarggintti woy7idanno Yesuusa ize yellin ees ohida. 31 E iigo shiiqii, I kushito aykkii, izo dentsii essida. Otstsi michita ashshin iza unttana mokkida.
32 Hyargginttide asuntsanan tuna ayyaana aykkide asuntsana ubba ugure awa gelin eego ki7ida. 33 Katamite yeze asunts ubbuntsi yinna keetsiti bale shiiqida. 34 Yesuusa dumma dumma hyarggera aykinttide gaama asuntsana fatstsi, gaama tuna ayyaanuntsana kessida. E oode yezako tuna ayyaanuntsi eride gisho unttana ohaame fana kayda.
Yesuusa Galila tamaarssida
(Luqa. 4:42-44)
35 Yesuusa wontti maatse denddii, asi baayze bessa hyanggi, ize Xooz woossida. 36 Simoonaran eera yezuntsi eza koyitera qitida. 37 Unttii eza denggi, «Asi ubba nena koyane» yagayda.
38 Yesuusa mahi unttana, «Yinna gutute yeze seko katamite yedhdhote. Taanii yi7idanna Wonggele ohodes maaqqide gisho ize yeze guta ohodes beezane» yagayda. 39 Ayhude woosa keetstsa qaala ohiteran tuna ayyaanuntsana kessitera, Galila sa7a ubba wutida.Maato. 4:23; 9:35
Yesuusa qursuma hyargginttiza fatstsida
(Maato. 8:1-4; Luqa. 5:12-17)
40 Qursuma hyargge aykkide fettii atstse Yesuusago yi7i, E tiintte bunqqunttii, «Neenii koyko tana geeshodes dandda7ane» yaga7i woossida.
41 Yesuusa ees yiqsinttii, fa kushito dakkii eza bochchi, «Taanii kadhane, geezho» yagayda. 42 Iira qursumtta atstsa dakkin atstse geezhida. 43 Yesuusa atstsa mintsii naagintto ga7i kessii dakkida. 44 Yesuusa eza, «Nena ero, hyanno oodesin ohippe. Yezin hyanggi ne galtto kahine beezo. Neenii hyatte geeshi maaqqidanno asuntsana ersodes, Muse kiittide zharshito zharsho» yagayda.Leewe 14:1
45 Yezin atstsay hyanggi, kara gancce as ubbuntsis ohida. Yinnii gisho, Yesuusa benttii kezii, katama gelodes dandda7ikaaya. Yezin asi baayze bessa gaxa yezida; mahi asuntsi ubba fa yeze bessappa eego ye7ine.