8
Yesuusa oyddii mukul asuntsana muuzida
(Maato. 15:32-39)
1 Eerats wodeppa suuba, gaama asuntsi Yesuusago shiiqida. Asuntsis mu7izebaz dhabin Yesuusa fa tamaaruntsana faago xeegii, 2 «Hyantsi asuntsi taara hyaydzdzii qamma yellodes gam7i, akkon muuze baz denggikaayze gisho tana asunts bazita yiqsane. 3 Taanii asuntsana nayera kara dakkiko asunts hyanggitera oge labbii gol7oda, bagge asuntsi hyaako bessappa yi7ida» yagayda.
4 Yesuusa tamaarunts mahi, «Hyanna akko baayze ganasa hyantsi asuntsana ubba muussades maaqqade katstsa denggodes dandda7ode oode?» yagayda.
5 Yesuusa unttago, «Yin kale wantsi boora yeze?» ga7i oocida.
Un mahi, «Laappun boora yene» yagayda.
6 Yesuusa asunts sa7alla bettode gaar kiittida. Yeyzi, laappun boortto ekkii Xooz galatii maaqqii boortto baxxi, asuntsana yeltsode gaar fa tamaaruntsis inggida. E tamaarunts asuntsis gizhida. 7 Unttis mahi eeratsin yishsha molunts yene. Yesuusa yentsi molunts gisho Xooz galatii, asuntsis yeltsode gaar fa tamaaruntsana kiittida. 8 Asunts ubbuntsi mu7i mizhida. E tamaaruntsi mu7in attide gufa laappun leemate kumutsi dentsida. 9 Katstsa mu7ide asunts faydita oyddii mukul maaqqada. Yinnippa suuba, Yesuusa asuntsana moyzida. 10 E mahi fa tamaaruntsara ellisii gongge gelii Dalmmanuuta gaaze sa7a qitida.
Malla oochinttode gaar oocida
(Maato. 16:1-4)
11 Farisaawuntsi yi7i Yesuusa oocodes koyi, saloppa fana malla beessade gaar Yesuusara lalle aykkida.Maato. 12:38; Luqa. 11:16
12 Yesuusa gaddii shemppii, «Hyanna wode asuntsi akkos malla koye? Taanii yinttis turo ohine; hyanna wode asuntsis akko mallan ingginttoos» yagayda.Maato. 12:39; Luqa. 11:29 13 E unttana ize olii ashshii mahi gongge gelii abbappa seko fintsa fiinggida.
Farisaawuntsin Heroodisa irshsho
(Maato. 16:5-12)
14 E tamaaruntsi katstsa aykkodanno botida; unttis gongge gidda fettii boorappa melle baaya. 15 Yesuusa unttago, «Yinttana erote. Farisaawunts irshitippan Heroodisa irshitippa naaginttote» yaga7i kiittida.Luqa. 12:1
16 Un wol gidda, «E hyanno gaazanna nuus boora baayze gisho» yagayda.
17 Yesuusa un gaazanno erii unttago, «Yinttis boora baayze gisho akkos ohintte? Hyatten erosite? Woy tiirosite? Yin wozintta doccida? 18 Yinttis aafe yezin bo7osite? Hyaye yezin si7osite? Yin tiirane?Er. 5:21; Hiz. 12:2; Mar. 4:12 19 Taanii ichchin boora ichchin mukul asuntsis yeltsize wode wantsi leemate kumutsi gufa dentsido?» yagayda.
Unttin, «Taphpho lam77i leemate kumutsi» yagayda.
20 «Yinnii gaara, taanii laappun boora oyddii mukul asuntsis yeltside wode wantsi leemate kumutsi gufa dentsido?» yagayda.
Un, «Laappun leemate kumutsi dentsida» yagayda.
21 Yeezin, «Hyatten tiirikaane?» yagayda.
Yesuusa Beetesayda fettii qooqe fatstsida
22 Unttii Beetesayda katama qitida. Eerats asuntsi qooqe atstsa Yesuusago ki7i ye atstsa girmode gaar eza woossida. 23 Yesuusa qooqe atstse kushito aykkii katamappa gaxa kessida. E aafte cuttii fa kushito aafitilla afa gaddii, «Nees akko benttane?» yaga7i oocida.
24 Atstsay dhoqi ga7i bi7i, «Taas asunts benttane, yezin asuntsi minxa gaar en7ane» yagayda.
25 Yinnippa suuba, Yesuusa mahi, atstse aafte fa kushito gaddida. Atstsayin loytsii bi7ida, faxin ubba baz shaakkii bi7ida. 26 Yesuusa atstsego, «Ne kara qito, yezin katama gelippe» yaga7i kiittida.
Phexiroosa markkatitsito
(Maato. 16:13-20; Luqa. 9:18-21)
27 Yesuusa fa tamaaruntsara Qisaariya Filphoosa kale yeze kara gancce qitida. Unttii hyammadera ogella yezin Yesuusa, «Tana asuntsi oona ga7e?» yaga7i fa tamaaruntsana oocida.
28 E tamaaruntsi, «Fettii fettii asuntsi nena, ‹Xammaqize Wahannisa› gaane; melluntsi, ‹Eeliyaasa gaane› mahi melluntsi, ‹Nabuntsappa feta› gaane» yagayda.Mar. 6:14
29 Yesuusa unttago, «Yeezin yin tana oona ga7e?» yaga7i oocida.
Phexiroosa, «Neenii Kiristtoosa*Kirsttoosa ga7inttizanna meesii bilitsitan tizhinttidaya ga7e» yaga7i mahida.
30 Yesuusa, «Ta baz oodesin ohippete» yaga7i unttana kiittida.
Yesuusa fana yellode madhan waaye ohida
(Maato. 16:21-28; Luqa. 9:22-27)
31 Yesuusa fa tamaaruntsago, «As Na7ay, gaama madha ekkodes beezane; cimuntsi, kahinunts hyalaquntsin higge asttamaaruntsi eza ixxodes beezane. Unttii eza wodhodesin hyaydzdzii qammappa suuba, E hyayqoppa denddodes beezane» yaga7i unttana tamaarssida. 32 E yinno unttis loytsii ohida. Phexiroosa eza fettii zala mahi kaccida.
33 Yezin Yesuusa suuba maaqqii, fa tamaaruntsana bi7i, Phexiroosa kaccii, «Hyay Xalahizay, taappa hyaakko. Neenii asi kadhizebaz qoppanep attin Xoozii kadhizebaz qoppoos» yagayda.
Yesuusa kaallodes fana zharshe beezane
(Maato. 10:38-39; 16:24-28; Luqa. 9:23-27; 14:26-27)
34 Mahika Yesuusa gaama asin fa tamaaruntsana faago xeegii, «Tana kaallodes koyze ooden fana kaaddo; fa masqaltto tookkii tana kaallo.Maato. 10:38; Luqa. 14:27 35 Fa shemppito ashshodes koyze atstse dhabssoda. Yezin ta gishon Wonggele gishon fa shemppito dhabsize atstse ashshoda.Maato. 10:39; Luqa. 17:33; Waha. 12:25 36 Asi sa7alla yeze alamito tirfizako, fa shemppito dhabsiko eza akko maaddode? 37 Asi fa shemppito wozodes akko immades dandda7e? 38 Xooz ammanoose hyanna iita yeletuntsappa, fettii asi ta giddan ta qaaltten yeellidhiko, As Na7ay, mahi fa Aday bonchchora geeshi kiitanchchuntsara ye7ize wode yeyga yeellidhoda» yagayda.