3
Ayhuduntsi ammananxii ixxe
1 Yeezin, Ayhude maaqqizanna akko maadde? Woy garrazinttes akko maaddize bazi yeze? 2 Ubbappa tiino Xoozii fa qaala hyadarito Ayhuduntsis inggida.
3 Yeezin, unttappa fetay fetaya qaala ammananxii ixxiko, un ixxizanna Xoozii ammaninttide Xooz maaqqizanno kayanene? 4 Kayoos! Asi ubba worddo maaqqikon Xoozii turo maaqqe. Geeshi Maxaafite,
«Ne qaaltte ne xillane;
nena mootizaya firddara latstsane»
ga7intti xaafinttida.
5 Yeezin, nu nagartta Xoozze xillo maaqqizanno beezize baz maaqqikon, nu waagawude? Xoozii nu nagartti gisho nuulla afa firddiko, likke baane? Yinno taanii as qofa fana gaane. 6 Yinnii fana hyanippe. Yinnii gaar hyaniko, Xoozii hyanna alamttilla afa wayzi firddode?
7 Yezin ta worddotitsita Xoozze turtto qonccizi, E bonchchito gaantsi beezzebaz maaqqiko, yeezin, akkos taalla fana nagaranchcho fana firdde? 8 Fettii fettii asuntsi, «Lo77o yo7ode fana iita oochchoda?» yaga7i tamaarssize asi fana mahi tana mootane. Yinnii gisho yagaaze asalla afa ye7ize Xoozze firddita likke.
Asi ubba nagaranchcho
9 Yeezin, nu waagawude? Nu Ayhuduntsi, Girikeppa aadhanene? Ade! Ayhude maaqqin, Ayhude maaqqanxin ubbuntsi nagaranchcho maaqqizanno taanii tiinii yinttis ohida.
10 Geeshi Maxaafite,
«Xillo asi fetton baaya.
11 Akaakize asi baaya,
Xoozza koyze oonin baaya.
12 Asi ubba balinttida;
ubbuntsi fettippa maaddoosse baz maaqqida.
Lo77o oochchize oonin baaya;
fettii asin baaya.
13 Un doontta,
bugunttide booza fana;
fa il7antsite worddidhdhane.
Un doonttippa as wodhize,
shooshi marze kezane.
14 Un doontte camon baaditsi kumida.
15 Un tohita suutsi lalodes ellisane.
16 Un ogite dhaben qohe yene.
17 Un saro oge eroos.
18 Fa de7ite Xoozis zhashtoos»
ga7intti xaafinttida.
19 As ubba doona gordinttode fana kumutsi alamito Xoozze firddappa oomora shiishodes, higge ingginttide higgeppa oomora yezuntsis maaqqidanno nu erane. 20 Yinnii gisho, ooden higges kiitinttii Xoozze tiino xillodes dandda7oos. Higge asi ubba nagaranchcho maaqqizanno beezane.Maz. 143:2; Gala. 2:16
Xillotitsi ammanora
21 Yezin hyatte Xoozii asi xillize oge higge baytsi qonccizida. Yinna ogito Muse higgen nabuntsin markkidhida. 22 Yinna ammanze ubbas hyanida, Xoozii Yesuus Kiristtoosa baggara as ubbas shaako baytsi inggida.
23 Asi ubba nagara oochchida; Xoozze bonchcho faccizida. 24 Yezin un Xoozze aadho keehatitsara, ashshize Kiristtoosa Yesuusa baggara cer xillida. 25 Xoozii Yesuus Kiristtoosa zharsho mahi inggida, eza ammanze ubba E suutsite nagara atotitsi denggode fana. Xoozii yinno oochchide fa dandda7ara zaga nagartto faydikaayzara ashshii, fa xillotitsito beessades. 26 Yesuusa ammanze ubba xillode fana hyatte wode Xoozze fa ommite xillo maaqqizanno beessades.
27 Yeezin, nu ceeqinttize baz akko yeze? Akkon baaya. Nuunii ceeqinttizanna higges kiitinttize gishone? Ade! Ammano higgera. 28 Xoozii asi xillize ammanorap attin higges kiitinttera baayzanno nu qoppane.
29 Woy Xoozii Ayhuduntsi xalaala Xoozoone? Ayhude maaqqoosuntsisin Xoozii baane? Turo, Ayhude maaqqoosuntsisin E Xoozii. 30 Xoozii fetto; Ayhuduntsanan Ayhude maaqqoosuntsana ammanora xillize eza. 31 Yeezin, nuunii higge ammano gisho dhabssodane? Ade! Higgito mintsanep attin.Mahe 6:4; Gala. 3:20