1 Nyafxiitey ũsyã'kh yu' txã'sna kaajiyu'jna fxi'jaçthu i'kwe'sxtxi. Kwe'sxa' iiwẽse'tha'w sa' kwe'sx yafxju yuu iiuytha'w. Ĩ'neeçxáa uymée, kwe'sx kusejuwa iijxa'dxtha'w Dxus Nçxi'k ĩtxi kaafxi'ze'jwa'jsa's. 2 Itxi kaafxi'ze'jwa'jsa' vxyaak, aça' uyçxa' txãa vxyaani's kwe'sxa' pta'sxi'tha'w. Txãasatha'w ãçxha' i'kwe'sxtxiwa kaajiyu'ju', bagaçxte yuhwa pçumée ĩtxi kaafxi'ze'jwa'jsa Ney yakh ũssa kwe'sxtxi vxyaapa'ga. 3 Kwe'sx wẽse'jçxa yafxjuwa uyni's ãate pta'sxiçtha'w, i'kwe'sxwa kwe'sx yakh utxaaçxa fxi'zekahn, kwe'sxwa ma'wẽtka'w Dxus kwe'sx Tata yakh vxite' Nçxi'k Jesukristo yakh utxaaçxa fxi'ze' txã'wẽy. 4 Txã'wẽtha'w kaajiyu'jna fxi'ja', i'kwe'sxwa weçxana fxi'zewa'ja's ji'phukahn.

5 Jesukristo na'wẽk kaapiya'j txã'sna i'kwe'sxtxi pta'sxiçtha'w: Dxusa' eena'sa'. Txãa pa'ga txajx tasxte' kĩh yuhwa çxhi'dxsa meea' jĩ'k. 6 Aça' maawa Dxus yakh fxi'zena ũsthu jĩçxawa, Dxus jxkaahni's nwẽese'jmée çxhi'dxte fxi'zeçxa', ĩsxiisa yuuna. 7 Nawa Dxuswa ma'wẽ eena'te ũsna txã'wẽy kwe'sxwa eena'te fxi'zete', kwe'sx pwe'sx puutx puiimée zhiçxkwe fxi'zewa'j kasejena, aça' Dxus Nçxi'k Jesukristo eea' kwe'sx pkaltxi jxuka khukhuna.

8 Txã'jĩte', kĩh pkal yuhwa ji'phmeetha'w jĩwá'nja'w na' peekíiçxáa ya'ĩsxiisa yu'nja'w. 9 Nawa txã'wẽ yajkxmée, pkalsayuhth sũhna Dxusa's perdon pẽyi'nja'w aça' txã'wẽ yũusa's kim yuhnawa wa'lmée jxuka kxtey peltunãyçxa ewmeesa's jxuka nuyaateena. 10 Txã'jĩte' kĩh yuhwa ewmée yũusameetha'w jĩ'nja'w na' Dxus we'weçxa': Ewmeesata' jĩçxa' ĩsxiija'k jĩsa yu'nja'w.