1 Betania çxhabte teeçx piçthẽ'j Lasaro yaasesak ãçã'na ũs yu', npe'sxwe'sx Maria Marta u'pni çxhabte. 2 Txãa ãçã'sa npe'sx Mariak txã'wẽ Jesus çxidakhẽ wẽt putasa's awçxa txajx dxkhasju adxi'jwa'jsa yu'. 3 Txãawe'sxa' pxakhíitx dxiy ãçã'na ũste', Jesusa's pta'sxkahn yuwe kaah:

—Iidx namiku wedxnisa' wala ãçã'na ũsa' jĩna.

4 Txajũ' Jesusa' naa pta'sxni's wẽse'jçxa' na'jĩk:

—Na'wẽ ãçã'na ũsçxawa, uuwa'jsa meea'. Naasáa Dxus ãjãni's ãate kaavxya'ja'jna, txã'wẽy Dxus Nçxi'k ãjani'swa kaavxya'ja'khançxáa txã'wẽ ãçã'na ũsa'.

5 Aça' Marta Maria txãawe'sx dxiy Lasaro yakha' Jesus wedxnisatx yu'. 6 Nawa Lasaro' wala ãçã'na ũsa' jĩna pta'sxni's wẽse'jçxawa, nee e'z eníik txajx u'junisu jxthẽeyũu. 7 Txãa e'z en skhẽwniijũ', Jesusa' na'jĩnak we'we txãa yakh u'jusawe'sxtxi:

—Judea kiwen ki' u'jwega jĩte', 8 txãawe'sxa' na'wẽtx pas:

—Kaapiya'jsa, mwẽese'j. Txãwãsu' judiuwe'sxa' idxa's ikh wẽeçxa kwet wãatatajxa'watx yu', aça' ¿ma'wẽga kxtey ki' u'j wẽje'? jĩte', 9 Jesusa' na'wẽk pas:

—Isa ena' doce ora ¿ji'phmeena'? Maawa en u'juçxa' yu'spẽ'themée fxi'zetxna, eena' kweethniitene'ta fxi'ze' naa pa'ga. 10 Nawa kus u'juçxa', yu'spẽ'thetxna, eena' kweethnite u'jupa'gamée.

11 Txajũ' na'jĩk Jesusa':

—Kwe'sx namiku Lasaro' deeni', nawa adxa' fxĩtxya' u'jwe'nja jĩte', 12 txãa yakh u'jusawe'sxa' na'jĩtx:

—Deeniçxáa ũsçxa yu', fxĩtxte' kiiteena jĩtx.

13 Lasaro' uuni ũstek Jesusa' txã'wẽ we'we. Nawa txãa yakh u'jusawe'sxa' jiyumeeçxa', ĩ'née deenisaçxá'sne' we'we' sũju'ne'ta.

14 Txajũ' Jesusa' teehwedku ãate pta'sx:

—Lasaro' uuni' jĩna. 15 I'kwe'sxa' adx ãjani's uyçxa' adx kimtewa jiyukahn, ewçxá'ntka kxtee ũsu'çmée. Txã'wẽ uuniyã'j ũstewa, thegya' u'jwega jĩte', 16 Tomas melxisu jĩ'tx txã' na'wẽk we'we vxite pi'kxna u'jusawe'sxtxi:

—Kwe'sxwa u'jwega Jesus yakh ja'da uuya' jĩk.

17 Jesus kxtee pa'jaçte', Lasaro's pedaní pahz enyã'kh yu'. 18 Aça' Betania çxhaba' Jerusalen çxhabuh e'z kilometro y medioçxáak jxu'kha ũsu'. 19 Aça' judiuwe'sxa' wala kuh pa'khu'ta txã'wẽ dxiy uute', npe'sxwe'sxtxi kvxiisxa'jya'. 20 Aça' txãa entey Jesusa' pa'jaça' jĩni's jiyuçxa', Marta' puutx uyya' kasejk. Nawa Maria' yatte neeyũuk.

21 Txajũ' Marta' Jesus yakh puutx uyçxa' na'jĩnak we'we:

—Idx ayte ũssawaça', uuwa'jmeene' yu' ũ'kwe dxi'sxa'. 22 Nawa jiith Dxusa' jxuka ũsuna idx kĩh pẽjxtewa jĩte', 23 Jesusa' na'wẽk pas:

—I'kwe dxiya' ĩtxi yuuna jĩte', 24 Marta' na'wẽk pas:

—Ũ'kwe' jiith, uusaawe'sx ĩtxi yuu ente' ĩtxi yuuyujuna.

25 Nawa Jesusa' na'jĩk:

—Adxíi uuniitewa ĩtxi vxit-sath, sa' pçumée ĩtxi fxi'zewa'ja'swa adxíi peessath. Maawa adxa's ũuste jxpa'gasa' makwe uuçxawa ki' ĩtxi yuutxna. 26 Aça' maawa nee ĩtxi ũssa' adxna ũuste jxpa'gaçxa', bagaçxte yuhwa uuwa'jmée ĩtxi fxi'zetxna. Adx we'weni' isa yuhtxna ¿sũju'kwe'? jĩte', 27 Marta pasçxa':

—Txã'wẽ yuhna sũju'th. Idxa' Kristog, Dxus Nçxi'k naa kiwete kĩisa jĩk.

28 Txã'wẽ we'wena jxã'jçxa', Marta' yatna sxawedna u'kh nyakha's pa'yaya'. Sa' na'jĩnak susmée we'we:

—Kaapiya'jsa ayte yã'j ũsa', sa' i'kwe's yuu kaakh.

29 Txã'jĩ'çpkaçxha', Maria' kiitena' wala dud u'kh Jesusa's puutx uyya'. 30 Jesusa' Betania çxhabte u'kameyku yu', Marta yakh mteene' puutx uy kxtee nee ũsiyçxáak yu'. 31 Aça' Maria' kiiteçxa wala dud skhẽwte', judiuwe'sx txãa yatte kvxiisxa'jna ũssa' e'stey u'jtx, pedaní kafxte wáa ũ'neya' u'jweçna sũhçxa.

32 Txajũ' Maria' Jesus tasxte kũhna'wa, peejxũkweçxa na'wẽk we'we:

—Kwe'sxtxi jxpe'jsa, idx ayte ũssawaça', ũ'kwe dxi'sxa' uuwa'jmeene' yu' jĩnak we'we.

33 Txã'wẽ Maria vxite' judiuwe'sx pi'kxna yuusa ũ'neçte Jesusa' uyçxa', txãawa wala nxusçxa' 34 pẽjxku:

—¿Mteekwe pedáa? jĩte':

—Myuh wakx thegya' jĩtx.

35 Aça' Jesusa' ũ'nek. 36 Txã'wẽ Jesus ũ'neçte uyçxa', judiuwe'sxa' na'jĩtx:

—Mthegwe ma'wẽga wala peeygãja'.

37 Nawa maaíi yu' na'wẽtx we'we:

—Naa piçthẽ'ja' uyya' ãjasameetxwa kaauyu'ju'k na' ¿kĩhçxáawa yũuya' ãjawa'jmée ma'k yu' Lasaro uukahmén?

38 Txajũ' Jesusa' ki'kin wala nxusna utxaak Lasaro's pedaní kafxte. Txãa kafxa' dxiiga pwa'ja'nik yu', aça' u'kani vxitxte yu' kwetku aphni yu'. 39 Jesusa' na'wẽk jxkaah:

—Aphni kweta's mkiiswe jĩte', uusáa npe'sx Marta' na'jĩk:

—Uuníi pahz enyã'ja', aça' phadete' ¿kazx putameema'k? jĩte', 40 Jesus we'weçxa':

—Adx pta'sxnitxi' txã'wẽ yuhna sũhna ũuste jxpa'gaçxa', Dxus ma'wẽsatewa jiyune'kwe ¿jĩçmeetka'?

41 Txã'jĩte', txãa aphni kweta's kiistxi. Aça' Jesusa' cielute pagayçxa na'wẽk we'we:

—Tata, adx pẽyni's pasu'g naa pa'ga weçxa'th. 42 Adxa' jiith, idxa' bagaçxtewa adxa's pasu'g. Nawa txã'jĩna ãateth weçxá', ayte nasa ũsta' txãawe'sx wẽse'jçxa', adxa'sa' Dxus kaahni yuh yu'ne' sũjkahn.

43 Txã'jĩçxa', Jesusa' susku we'we:

—Lasaro, txãajũ mkaaseh jĩçpkaçxha', 44 uusá' ĩtxi yuuçxa kasejk, çxida, kuse petx dxi'p yã'jçxa yapni. Aça' Jesusa' khibkaakh u'jya' ãjãkahn.

45 Uusá's ĩtxi vxitni's uyçxa', Maria's pi'kxna ũssa judiuwe'sxa' Jesusa's ũuste jxpa'gaçxatx neeyũu. 46 Nawa vxite judiuwe'sx açesa yu' fxariseowe'sx tasxna u'jçxa', Jesus txã'wẽ uusá's ĩtxĩ vxitni's pta'sxtxi. 47 Aça' fxariseowe'sxa' sacerdote npiiçthẽ'jwe'sx yakh pkhaakheçxa', na'jĩnatx puutx we'we:

—Naa piçthẽ'ja' naa kiwete kim yuhwa ãjanimeesatx kaavxya'ja'jna kĩjkĩhwa yũuna ũsa'. Aça' ¿kĩh yuukxtha'w? 48 Txãa piçthẽ'ja's kĩhçxáawa yũumeete', nasa' jxukay txãa yakhçxaçxáa u'jwetxna. Aça' Romajũ nasa kwe'sx dxuus yata's ivxiituçxa', kwe'sxtxiwa ivxiitutxna.

49 Txajũ' txãa anxute sacerdote npiiçthẽ'j Kaifxasa' na'wẽk we'we:

—I'kwe'sxa' ũus yajkxya'çxáa yuhwa ãjã'çmeei'kwe. 50 Kwe'sx ji'j jxuka yu' vxitukahmen wejxwa jxukasa pa'gate teeçx yuuçxáa vxituwaççxáa wejx ewna. Txã'wẽ yũuwa'ja's ũus yajkxya' i'kwe ãja'çmée.

51 Kaifxasa' txãa anxute' sacerdote npiiçthẽ'kh yu', sa' peekxçxáa txã'wẽ yajkxçxa we'wemeene'. Jesusa' judiuwe'sx jxukaysa pa'gate txãaçxáa uuwa'thene' Dxusa' Kaifxasa's txã'wẽ we'wewa'ja's kaaũusuthe'j. 52 Nawa judiuwe'sxtxi nwe'weya'çxáameene' txã'wẽ uuya'wa yu'. Dxus luuçx mtee mteewa ũstxna txãawe'sxtxiwa pkhakhya'k txã'wẽ uuya'wa yu'. 53 Aça' txãajũjx judiu npiiçthẽ'jwe'sxa' Jesusa's ikhya' puutx we'wetx.

54 Txãa pa'gak Jesusa' Judiuwe'sx ksxavxysu u'juya' ãjãmeeçxa', Judea kiwejũ kasehna u'j txãa yakh u'jusawe'sx yã'jçxa teeçx çxhab nasa u'pnimée ja'dasu Efxrain yaasesa ũsu'k kxtee ũsya'.

55 Txajũ' Judiuwe'sx fxiesta Paskua en ãjaçku yu'. Aça' wala kuh nasa' u'jtx Jerusalenna, Paskua fxiesta ãhmeyna txãawe'sx kakwete pkaltxi yaateçxa ũsya'. 56 Kxte' Jesusa's pakwena yã'jtx ũs yu' sa' dxuus yatte na'wẽtx puutx paapẽyi':

—¿Ma'jĩki'kwe? Jesusa' fxiestate ũsya' ¿yuhmanx?

57 Txajũ' fxariseowe'sx vxite' sacerdote npiiçthẽ'jwe'sxa' neewe'wetx maaçxáawa Jesusa' fxiestate ũste jiyuçxa' txãawe'sxtxi pta'sxkahn tudxa' kaajxa'.