1 Teeçx ente' Jesusa' dxuus yatte Dxus yuwe ewte nvxiitwa'jsa's pta'sxna ũste', sacerdote npiiçthẽ'j vxite' Dxus leya's kaapiya'jsa vxite' judiu nthẽ'jsa txãawe'sx pa'jçxa' 2 na'jĩnatx pẽjx:

—Idxa' ¿kim jxkaathega dxuus yatte txã'wẽ juuna' yũu? Kim jxkaathe txã'wẽ yũuçxawa mpeeta'sx jĩte', 3 Jesusa' na'wẽk pas:

—Adxwa i'kwe'sxtxi' pẽjx ya'wath aça' txã'sa' mpaaswe. 4 Juan Bautista's ¿kimga jxkaah yu'te bautisãykahn? ¿Dxus wá' jxkaah meeçxa' naa kiwete piçthẽ'j jxkaahni wá' yu'? jĩte', 5 txãawe'sx pwe'sx na'jĩnatx puutx we'we':

—¿Ma'jĩna pasukxtha'w? Dxusne' jxkaah jĩwaçwa, txã'wẽ Dxus jxkaathe' ¿mjĩya'kwe Juan pta'sxni's jxpa'gamée? jĩna. 6 Aça' naa kiwete nasane'ta jxkaah jĩte', kwe'sxtxi kwet wãatatahçxa ikhetxna, nasa' jxukaysa Juana's ew jiita' Dxus yuwe pta'sxsatewa. Txãasa kwe'sxtxi' txã'wẽ yũutxna jĩ'tx.

7 Txajũ' Jesusa's pasçxa':

—Juana's kimne' jxkaah bautisãykahn nawa jiimeetha'w jĩte', 8 Jesus pasçxa':

—Adxwa kim jxkaathe txã'wẽ yũuçxawa pta'sxme'nja jĩk.

9 Txajũ' Jesusa' naa ejemplo'sku pta'sx:

—Teeçx piçthẽ'ja' txajx kiwete jxuka uwa uhçxa mjĩisatx ew neewe'weçxa wala txaçx u'kh. 10 Sa' uwa thẽ'jeçte', kiwe namu' teeçx selpisa's kaakh kiweepa'ga pẽjxya'. Nawa kiwe's mjĩisawe'sxa' txãa selpisa's pãpãçxa kĩh yuhwa dukhmée kaahtx. 11 Aça' kiwe namu' vxite selpisa's ki' kaakh. Nawa txã'snawa txã'wẽy iiwẽesxuna pãpãçxa kĩh yuhwa dukhmée neeutx. 12 Txajũ' kiwe namu' ki' vxite selpisa's kaakh. Nawa kiwe's mjĩisawe'sxa' txã'snawa kpã'vxitçxa dukhmée neeutx.

13 Txã'wẽ yũute', nmehte' kiwe namu' na'jĩk: Ãçxha' ¿kĩh yũuki'th? Meeçxa' adx nçxi'k wedxnisa's kaja'nja. Aça' txã'sa' ũukhçxa txã'wẽ yũumeewáatxna jĩçxak kaah. 14 Aça' mjĩisawe'sxa' kiwe namu nçxi'ka's uyçxa', txãawe'sx pwe'sx na'jĩnatx puutx we'we: Ney uute', kiwe's naathẽ'j iiyamuwa'jsana. Aça' ikhega, khĩçxa kiwe's kwe'sx iiyamu'nja'w jĩçxa 15 eka kutxi'jçxa ikhtxi jĩk.

Txajũ' Jesusa' txã'wẽ pta'sxçxa' pẽjxku:

—Txã'wẽ yũute', kiwe namu' txãa mjĩisawe'sxtxi' ¿kĩh yũukx? 16 Txã'wẽ yũupa'ga kiwe namu' txãa mjĩisawe'sxtxi' jxuka ikhçxa kiwe's vxitetx ũsuna jĩte', txã'wẽ pta'sxni's wẽsẽ'jçxa na'jĩtx:

—Dxusa' kxtee pa'j yu' wedxmeena jĩ'tx.

17 Txã'wẽ paste', Jesusa' txãawe'sx dxi'psu thegçxa na'wẽk pta'sx:

—Txã'wẽ yuune'jmeete', ¿kĩjxa'çxáaki'k Dxus librute na'wẽ we'we'?:

19 Txajũ' sacerdote npiiçthẽ'j vxite' ley kaapiya'jsawe'sxa' jiyutx txãa ejemplo' txãawe'sxtxi we'wenitewa. Sa' ũusaçxaçxa txãa dudtey Jesusa's tud wẽetx. Nawa Jesus ju'gusa nasa wala kuh ũste', ũukhçxa kĩhwa yũumeeta'. 20 Nawa kĩhteçxáawa ewmeete nvxiht-ya' sũhçxa thegsa kaahtx. Aça' txãawe'sxa' Jesusa's ew paapẽysa na'wẽ yuh we'wena utxaatx, jxkaahsa's ewmée we'wetewa jiyuçxa' ne'jwe'sxa's pãatxhĩ'khya' sũhçxa. 21 Sa' na'jĩnatx paapẽjx:

—Kwe'sxa' idxa's jiitha'w. Idxa' isasaçxá'sgu pta'sxi', Dxus tasxte pa'jwa'j dxi'ja's kaapiya'jna. Sa' nasaa jxkaahna yu'kxpehnitx nwẽese'je'çmeeg, txãa pa'gatey idxa' nasa ewsa na'wẽ thegsatx jiyumey ju'gu yu'çmeeg. 22 Ãçxha' na'wẽtha'w jiyu wẽjẽ': Jxkaahsa Cesara's vxyu dukhte ¿ewmanx? meeçxa' dukhmeete ¿ewmanx? jĩte', 23 ewmée yajkxçxa txã'wẽ pẽjxna ũstewa Jesusa' jiyuçxa na'jĩk:

—¿Kĩjxa'kwe adxa's ewmeete nvxiit wẽjẽ'? jĩçxa 24 txãawe'sxtxi' teeçx vxyu musx pẽjxku. Sa':

—Naa vxyu' ¿kiim dxi'pa's ji'phna, sa' kiim yase's fxi'jnina? jĩte', txãawe'sx pasçxa':

—Cesar dxi'pa's ji'pha' sa' txajx yase's fxi'jni' jĩtx. 25 Aça' Jesusa' na'wẽk jxkaah:

—Cesar jĩ'sa' Cesara's dukhwa'ja'. Sa' Dxus jĩ'sa' Dxusna dukhwa'ja' jĩk.

26 Txã'wẽ nasaa dxi'pte isasaçxáana paste', Jesusa's ewmée vxit-ya' ãjãmeeçxa, kuh yajkxna sxuuna'tx neeyũu.

27 Txajũ' saduceowe'sx maaíi yu' Jesus tasxte paapẽjxya' pa'jtx. Nasa' uuyã'jçxa' peena yu' ĩtxĩ yuumeetxna sũhsatx yu' txãa saduceowe'sxa', txãasatx na'wẽ pẽjx:

28 —Moisesa' na'jĩnak fxi'jçxa nvxiht: Maa piçthẽ'jwa luuçx ji'phumey nyu's nvxihtçxa uute', uusáa nyakha' txãa u'ya's iiyuuna, aça' txãate luuçxa' uusáa nçxi'k na'wẽ neeyũuna jĩnak fxi'j. 29 Aça' kwe'sxa' jiitha'w siete piçthẽ'j pxakhtxi u'pu', sa' nyakh nthẽ'jsa' iiyuuçxawa luuçx ji'phumey uuk. 30 Aça' nyakh e'stewe'sxku iiyuu txãa u'ya'síiçxáa. Nawa txãawa luuçx ji'phumey uuk. 31 Txajũ' nyakh tekhtewe'sxwa txãa u'ya's íiçxáak iiyuu. Txãawa luuçx ji'phumey uuk. Txã'wẽçxaçxáatx sietesay txãa u'yçxaçxá's iiyuuna jxã'j. Nawa maa yuhwa luuçx ji'phumey uutx. 32 Aça' nmehte' txãa u'ywa uuk. 33 Aça' uusaawe'sx ki' ĩtxĩ yuu ente', txãa u'ya' ¿maa yakh isa nyu yuuwa'jsakx? jĩte', 34 Jesus pasçxa':

—Naa kiwete nasa' ptamuuna txãawe'sx luuçxtxiwa kaaptamu'ju'tx. 35 Nawa vxite kiwete pçumée ĩtxĩ fxi'zewa'the pa'jya' ãjãsa' ki' ĩtxĩ yuuçxa' txãawe'sxa' ptamuwa'jsameeta', sa' txãawe'sx luuçxtxiwa kaaptamu'jna ũswa'jsameeta', 36 txãa pa'gatey txãawe'sxa' Dxus angeleswe'sx na'wẽsa yã'tha', sa' Dxus luuçx yã'tha' na' ĩtxĩ yuuyã'jçxa' peena yu' uuwa'jsameeta'. 37 Txã'wẽ uusaawe'sxa' ki' ĩtxĩ yuuwa'jsate íiçxáak Moisesíiwa jiyukahn na'wẽ fxi'jçxa nvxiht txajx librute. Kxteea' Dxusa' çhũçh yu'kh behna ũsni pxãjũ we'weçxa': Abrahan, Isaak, Jakob txãawe'sx Dxusthu jĩk. 38 Dxusa' uusaawe'sx Dxusme', naasáa ĩtxĩsawe'sx Dxusçxá'. Dxus tasxte' maa yuhwa uumée ĩtxĩ ũsta' jĩnak pta'sx.

39 Txajũ' Dxus leya's kaapiya'jsawe'sx we'weçxa':

—Wala ew pta'sxgu jĩçxa, 40 peena yu' kĩhwa jwee yu' pẽjxmeeta'.

41 Txajũ' Jesusa' na'wẽk pẽjx:

—¿Ma'wẽteta Kristo' Davxid nçxi'ka' jĩna we'we' nasa'? 42 Naapkaçxha' Salmos librute Davxid we'weçxa yu' na'jĩ'k:

44 Davxida' Kristo's we'weçxa': Adxna jxpe'jsa jĩk, aça' Kristo' ¿ma'wẽ yuuçxa Davxid nçxi'k yuukx?

45 Nasa jxukaysa wẽsẽ'jna ũssa ksxavxyte Jesusa' txãa yakh u'jusawe'sxtxi na'jĩnak we'we:

46 —Dxus leya's kaapiya'jsawe'sxtxi' mpa'yajkxwe. Txãawe'sxa' ropa jxu'jsa athçxa plaasasu msuuwa weçxa jxthãasnatx pekũjũ'. Sa' judiuwe'sx pkhaakhenisuwa kaçxní wejx zhiçxkwe ewsaçxáanatx pakwé'. Maa yat-su sã'jĩya' pi'kxtewa, txã'wẽytxi kaçxwa'j ewsaçxáana pakwé'. 47 Sa' vxiudawe'sx yattxiwa kusa'ja'tx, kĩjkĩh ji'phuni'swa jxuka. Nawa ewsata' sũjkahn wala jxu'j lisa'tx. Txã'wẽ yũupa'ga txãawe'sxa' wejx jxthaakwe Dxus kastigãyni yuutxna jĩnak pta'sx.