DXUS YUWE SAN MARKOS FXI'JNI
1
Juan Bautista nasa u'pnimée kiwesu Dxus yuwe's pta'sxni
(Mt 3.1-12; Lk 3.1-9, 15-17; Jn 1.19-28)
1 Dxus Nçxi'k Jesukristo fxi'zeni's pta'sxnisa na'wẽk takh: 2 Txãniitey Dxus yuwe pta'sxsa Isaiasa' na'jĩnaga fxi'j Dxus we'weni's:
Teeçx adx yuwe pta'sxsa's kajaçthu iidx yaçte, iidx dxi'ja's pheu'khan.
3 Nasa u'pnimée kiwesu sus we'wenik pthũuse' na'jĩna:
Dxus pa'jwa'ja's mpheu'jwe, dxi'ja's ku'le phaadena jĩ'k.
4 Txã'wẽ Isaias we'weni kxtey yuuwa'j ãhte', Juana' nasa u'pnimée kiwesu vxyaak nasatx bautisãyna. Sa' na'jĩnak pta'sxi':
—Pkaltxi nvxihtçxa Dxus tasxte misxawedwe, yu'te ya'bautisãyna, kxah i'kwe'sxtxi' Dxusa' peltunaĩna.
5 Juan we'weni's wẽsẽ'jya' pa'jtx Judea kiwesuwe'sx vxite' Jerusalenuwe'sxwa. Sa' pkalsatha'w jĩna Dxusa's perdon pẽjxna pa'jsatxi' Juana' Jordan yu'walate bautisaĩ'k.
6 Juana' kamelxo khas atxh athçxa kha'txku jxtudu', sa' txajx ũ'nisa yu' khã'sx wala çxhi'dx miltxi yu'. 7 Sa' Dxus yuwe's na'jĩnak pta'sxi' nasatx:
—Adx e'suh teeçx yuja' txã' adxte jxthaakwe ãjãwa'jsa'. Adxa' txajx pelgatxi wesçxáa yuhtxwa khihbxa' ãjãwa'jmeesath. 8 Adxa' i'kwe'sxtxi' yu' yakhçxáath bautisãyya' ãjã', naapkaçxha' txã' i'kwe'sx ũuste Dxus Espiritu's kxu'akhe'jya' ãjãwa'jsa' jĩ'k.
Jesus ya'bautisãyni
(Mt 3.13-17; Lk 3.21-22)
9 Txãn ensu' Jesusa' Nasaret çxhabu kasejk Galilea kiweju. Sa' Juan tasxte pa'the', Jordan yu'walate bautisãyku. 10 Aça' yu'ju kasejeççxa', uyku cielu phaateeçte. Naapkaçxha' Espiritu' tub çxihme na'wẽsa txajx kajkwekhẽ kĩjaçtek uy. 11 Sa' cieluju teeçx na'jĩna we'weniwa pthũusek:
—Idxa' adx Nçxi'k wala wedxnisag. Iidxpa'ga wala weçxana ũsthu jĩk.
Eçxthẽ'j Jesusa's ĩsxii wẽeni
(Mt 4.1-11; Lk 4.1-13)
12 Txãa dudtey Espiritu' Jesusa's pe'jna u'kh nasa u'pnimée kiwesu. 13 Aça' Jesusa' kuarenta enku kxtee u'pu' yu'kh niimal ksxavxyte. Kxtee u'pte', eçxthẽ'ja' pa'kh ewmée vxit wẽeçxa. Aça' txãa e'su' Dxus angeleswe'sxwa pa'jtx pu'çxya'.
Galilea kiwesu Jesus mjĩiya' takhni
(Mt 4.12-17; Lk 4.14-15)
14 Juana's karcelte kxuuphni e'su', Jesusa' Galilea kiwen u'kh Dxus jxkaahwa'ja's pta'sxya'. 15 Sa' na'jĩnak pta'sx:
—Ena' ãjãça'. Dxus jxkaahwa'j ena' utxa ũsa'. Aça' i'kwe'sxa' pkaltxi nvxihtçxa Dxus tasxte misxawedwe, sa' Dxus yuwe ewte nvxiitwa'jsa's ũuste myu'akhwe jĩ'k.
Wedx uwesáa pahzsatx Jesus pa'yani
(Mt 4.18-22; Lk 5.1-11)
16 Txãa e'su' Jesusa' Galilea ĩkh wala pukasu u'jweççxa', uyku pxakhsatx Simon Adreswe'sxtxi. Txãawe'sxa' wedx uwesaatx yu', txãasatx wedx ukhe's ĩkh walate akhna ũsu'. 17 Aça' Jesusa' pa'yak:
—Adx yakh myuhwe, aça' i'kwe'sxtxi' Dxus jĩi nasaa pkhakhwa'jsa vxitu'nja. 18 Txã'jĩçpkaçxha', txãawe'sxa' wedx ukhe's nvxihtna' Jesus yakh u'jtx.
19 Txajũ' Jesusa' ki' u'jçxa', Zebedeo nçxi'kwe'sx pxakhsatxku uy, Jakobo Juanwe'sxtxi. Txãawe'sxa' wedx ukhe's pã'khnatx u'p yu' barkote. 20 Aça' pa'yak. Naapkaçxha' txãawe'sxa' ney Zebedeo's vxite pu'çxsa yakh barkote nvxihtna', Jesus yakh u'jtx.
Eçx iiyamunisa
(Lk 4.31-37)
21 Txajũ' Kapernaum çxhabte pa'jçxa', Jesusa' kaapiya'jya' takhku sapatu jxkaase ensu judiuwe'sx pkhaakhenite. 22 Aça' Jesus kaapiya'jni's wẽsẽ'jçxa', nasa' wala kuh yajkxna neeyũutx, txã'wẽ leya's kaapiya'jsawe'sx na'wẽmée, nwẽese'jwa'ja's ũukhnus we'wena kaapiya'pha'ga.
23 Txãa pkhaakheni yatte teeçx piçthẽ'j eçx iiyamunisak ũsu', sa' na'jĩnak sus we'we:
24 —Jesus, Nasarethuwe'sx, kwe'sxtxi' ¿kĩh ya'waga? ¿Ivxiituya' wá'ga yuwé'? Idx kimtewa jiith. Idxa' Dxus kaahnisag jĩte', 25 Jesusa' na'jĩnak ũusçxa we'we txãa eçxa's:
—Sxuuna' myũu, sa' naa piçthẽ'j ũusu mkaaseh jĩna jxkaathe', 26 txãa eçxa' nasa's kaywẽçxpa'jna juuna' kweeyi'jçxa kasejk. 27 Txã'wẽ yũute', nasa' jxukaysa ũukhçxa na'wẽtx puutx paapẽyi':
—Naa piçthẽ'ja' ¿kimna? Txajx we'weni' ¿kĩhtxki açki'tx eçx yuhwa nwẽesẽ'je'? jĩ'tx.
28 Jesus txã'wẽ yũuni's wala dud jiyutx Galilea kiwesuwe'sx jxuka.
Pedro nyu njĩ'ja's Jesus nuykatxhini
(Mt 8.14-15; Lk 4.38-39)
29 Txajũ' judiuwe'sx pkhaakheni yatu kasehçxa', Simon Adreswe'sx yatnak u'j, Jakobo Juan yakh. 30 Aça' kxtee yu' Simon nyu njĩ'ja' kakwesektek ãçã'na ũsu'. Aça' Jesusa's pta'sxtxi txã'wẽ ãçã'sa ũsa' jĩna. 31 Txajũ' Jesusa' kũhçxa kuseju pu'kisku, naapkaçxha' dudtey kakweseka' ũçxhak. Txajũ' kiiteçxa selpiiya' kasejk.
Jxuka çxhi'dxiçte maazkuẽesatxwa nuykatxhini
(Mt 8.16-17; Lk 4.40-41)
32 Txajũ' çxhi'dxna kĩjaçte', jxuka ãçã'satx Jesus tasxte nuypa'jtx vxite' eçx luuku vxitnisatxwa. 33 Aça' çxhabte nasa' jxuka kũhtx vxitxte thegya'. 34 Txajũ' Jesusa' nuykatxhik fxiyfxiy wee ji'phsatxwa, sa' eçx luuku vxit-satxwa wala kutxi'kh nasaa ũusu. Txãa eçxa' Jesus kimtewa jiitx yu' nawa kwe'we'jme'.
Galileasu Dxus yuwe's Jesus pta'sxni
(Lk 4.42-44)
35 Txã'wẽ yũuni khikhiiçte nee çxhi'dxtey, Jesusa' Dxus yakh puutx we'weya' u'kh çxhab ekaju. 36 Aça' Simona' vxite yakh Jesusna pakweya' u'kh. 37 Sa' uyçxa' pta'sxku:
—Jxukaysa idxa's jxpeejxta' jĩtewa, 38 Jesus pasçxa':
—Ay utxasuwe'sx vxitewa peejxta' Dxus yuwe ewsa's, aça' kxsũ u'jwega. Txã'wẽ pta'sxna pekũjxa' íiçxáath naa kiwete kĩh jĩk.
39 Sa' eçx iiyamuçxa luuku vxit-satx nasaa ũusu kutxi'jna Galilea kiwesu jxuka pekũjk Dxus yuwe's pta'sxna, vxite' judiuwe'sx pkhaakhenisuwa.
Teeçx piçthẽ'j wã'jy weete ãçã'sa's Jesus nuykatxhini
(Mt 8.1-4; Lk 5.12-16)
40 Txãn ensu' teeçx piçthẽ'j wã'jy wee seena' kazxsate ãçã'sa Jesus tasxte peejxũkweçxa na'jĩk:
—Adxa's nuykatxhiwá'ga ahçemeeçxa' jĩna pxthaa we'wete', 41 Jesusa' peeygãhna kuseju jxa'dxçxa':
—Ahçeme'nja, naa pa'ga katxhiçxa mneeyũu jĩçpkaçxha', 42 txãa wã'jy weeju katxhiçxak neeyũu.
43 Txajũ' Jesusa' txãa piçthẽ'ja's wala neewe'weçxa kaakh na'jĩna:
44 —Adx we'wenitxi' jxpa'yakxçxa, maa yuhtxwa pta'sxmeene'ga, naasáa sacerdoteçxá's iidx kakwe's txwesya' me'j. Sa' txãa weeju katxhipa'ga Dxusna peesune'ga Moises ma'wẽga jxkaah txã'wẽy, kxah nasa jxukaysa jiyutxna idx ew katxhiçxa neeyũutewa jĩnak neewe'we. 45 Nawa txãa piçthẽ'ja' nasa jxukaysatx pta'sxku, Jesus ma'wẽ yũuni'swa jxuka. Txãa pa'gaçxáa Jesusa' maa çxhabte yuhwa ãate pa'jya' ãjãmeeçxa', çxhab ekaju nasa meesuçxáak u'ju'. Makwe txã'wẽ yũutewa, txajx tasxte yu' majũwe'sxwa pa'jna nestxi yu'.