1 God tell Moses: 2 “Make yu tell Israel pipol sey, ‘Una must dey holy, bikos mi wey bi Oga una God, dey holy. 3 Each of una must respet en papa and mama and una must keep my laws. Na mi bi Oga una God. 4 Make una nor woship juju or make juju with iron. Na mi bi di Oga una God.

5 “ ‘Wen una won give una peace ofrin to God, una must sakrifice am well, so dat I go asept am. 6 Una must chop am for di day wey una sakrifice am or di next day, but una go burn di ones wey remain with fire for di third day, 7 bikos e don dey unklean. If anybody chop am, I nor go asept di ofrin. 8 Anybody wey chop am go dey guilty, bikos e trit wetin dey holy wey dem give to God like ordinary tin and e nor go dey among my pipol again.

9 “ ‘Wen una don gada di tins wey una harvest for una land, make una nor kut di korn wey dey di land front and make una nor go back go kut di korn wey remain. 10 Make una nor go una farm back go gada grape wey don dey yuzles or pick di grape wey fall for groun; but make una leave dem for poor pipol and strenjas. Na mi bi Oga una God.

11 “ ‘Make una nor play wayo, tif or lie. 12 Make una nor lie with my name kon promise pipol, bikos una go disgrace my name. Na mi bi di Oga una God. 13 Make una nor opress or play una neighbour wayo. Make una nor make una worker wait until di next day, before una pay dem. 14 Make una nor curse anybody wey nor dey hear or set trap for blind pesin. Una must fear una God; bikos na mi bi God.

15 “ ‘Make una dey honest and pure wen ever una dey judge any matter. And make una nor dey trit poor pipol matter anyhow kon dey show good face to pipol wey get money. 16 Make una nor lie about anybody and if anybody dey pass thru problem for life; make una help am. Na mi bi God. 17 Make una nor keep malice with anybody, but make una setol una kworel with dat pesin, so dat una nor go sin, bikos of dat pesin. 18 Make una nor revensh anybody or kontinue to dey hate di pesin, but make una love una neighbour as una love unasef. Na mi bi God. 19 Make una obey my laws. Make una nor allow two difren animal sleep togeda. Make una nor plant two difren seed for one whole; or wear klot wey dem use difren material take make.

20 “ ‘If man sleep with woman slave wey anoda man suppose marry and dem neva free or pay money for en head, den dem must pay evritin komplete. Dem nor go kill-am, bikos di woman na slave. 21 Di man go bring ram kom di tent gate for God present as guilt ofrin 22 and di priest go make sakrifice for am for di sin wey e kommit.

23 “ ‘Wen una enter di land kon plant tree for food, make una nor chop di first fruit wey e go bear. Make una nor chop am for di first three years. 24 For di fourt year, all en fruit go dey holy and e go bi praiz ofrin to God. 25 Den for di fift year, una fit chop di fruit wey e bear kon add am join una harvest. Na mi bi di Oga una God.

26 “ ‘Una must nor chop anytin wey still get blood for inside. Una must nor do majik or serve juju. 27 Una must nor kut di hair wey kover una head or barb una bear-bear, 28 or draw picture for body; or kut mark to mourn pesin wey die. Na mi bi God. 29 Make una nor disgrace una girl pikin kon make am bi like ashawo; if una do like dat, di land go turn where ashawo and wiked pipol full.

30 “ ‘Make una keep di Sabat Day and honor di house where una for dey woship mi. Na mi bi God. 31 Make una nor go take advise from pipol wey dey serve dead pipol spirit. If una do am, una go dey unklean. Na mi bi Oga una God. 32 Make una dey respet and honor pipol wey senior una. Make una fear una God; Na mi bi God. 33 Make una nor ponish strenjas wey dey stay for una land. 34 Make una trit dem as una go trit una fellow Israel pesin. And make una love dem as una love unasef. Make una remember sey, una bi strenja for Egypt before. Na mi bi di Oga una God. 35 Make una nor play wayo wen una dey measure how sometin long and wide rish or oda tins wey many. 36 Make una dey measure well for evritin wey una dey do. Na mi bi di Oga una God wey take una komot from Egypt. 37 Make una obey all my laws and kommandment. Na mi bi God.’ ”