1 God tell Moses: 2 “Make yu tell Israel pipol sey, ‘Wen man don give ensef to God to take fulfil di special vow wey e make, di pesin go dey free afta e don pay dis money, 3 bikos man wey bi from twenty years go rish sixty years, na fifty shekel e go pay akordin to di shekel wey dem dey take for di temple. 4 If di pesin na woman, na thirty shekel e go pay. 5 If di pesin na from five years go rish twenty years; for man, na twenty shekel and for woman, na ten shekel e go pay. 6 If di pesin na from one mont go rish five years; for man, na five shekel and for woman; na three shekel e go pay. 7 If di pesin na from sixty years go up, if na man, na fifteen shekel and woman, na ten shekel e go pay. 8 If e nor get money take pay en vow, e must take di pesin to di priest and di priest go reduce di money, akordin to wetin di pesin go fit pay.

9 “ ‘If na animal e vow sey e go give God as ofrin, den anytin wey e give to God from dis animal go dey holy. 10 And anybody wey make dis vow, nor go use anoda animal take replace am, weda na good for bad or bad for good. If e go use anoda animal, den di normal one and di ones wey e shange am to, go dey holy. 11 If wetin e vow na animal wey nor klean; wey e nor go fit give as ofrin to God, den e go make di animal stand before di priest, 12 di priest go kon fix prize for am, weda e good or bad and na di prize wey di priest tok, go bi di final prize. 13 If di pesin won buy am back, e must pay di prize kon add twenty percent join.

14 “ ‘Wen pesin dedikate en house to God, di priest go fix di prize weda e good or bad and di prize go bi di final prize. 15 If di pesin wey dedikate di house won buy am back, e must pay di prize kon add twenty percent join.

16 “ ‘If anybody dedikate one part of en field to God, di priest go fix di prize akordin to di nomba of seed wey dem go fit plant and e go bi ten silva for evry twenty kilogram for barley. 17 If e klean en field for di year wen dem dey free pipol, den di land go bi di normal prize. 18 If e dedikate am leta, di priest go kakulate di money akordin to di years wey remain before di next Sabat year, den e go reduce di prize. 19 If di pesin wey dedikate di field won buy am back, e must pay di prize kon add twenty percent join. 20 If dem sell di field give anoda pesin, e nor go fit buy am back. 21 For di year wey dem dey free pipol, di field go kon bi God own forever; so e go kon bi di priest own. 22 If anybody dedikate field wey dem buy give God, 23 di priest go kakulate di money akordin to di nomba of years wey remain before di next Sabat year and di pesin must pay di money for dat same day; na God get di money. 24 Dem go give di field back to di pesin wey really get am or en shidren-shidren for di year wen dem dey free pipol. 25 Di priest go fix all di prize, just as dem tok for di sanctuary.

26 “ ‘Di first pikin for evry animal na God own, so make anybody nor dedikate am to God as ofrin from en mind. Weda na melu or kattle, na God get am. 27 But animal wey nor klean, dem go fit buy en first pikin back for di normal prize kon add twenty percent join. If e nor buy am back, dem go sell am give anoda pesin for di normal prize.

28 “ ‘Make anybody nor sell or buy wetin dem don dedikate give God without kondishon. Weda na human being, animal or land, bikos na God own forever. 29 Even if na human being, if dem dedikate am without any kondishon, dem nor go fit buy am back; dem must kill-am.

30 “ ‘One out of evry ten tin for wetin grow for di land, weda na grain or fruit, go bi God own. 31 If anybody one buy am back, e must pay di normal prize kon add twenty percent join. 32 One out of evry ten animal wey dey stay house, go bi God own. Wen dem don kount di animals finish, di tent one go bi God own. 33 Di owner nor go arrange di animals, so dat dem go fit choose di bad one and make e nor shange any one wey dem choose. If e shange any animal for anoda one, den di two animal go bi God own and e nor go fit buy dem back.’ ”

34 Dis na di kommand wey God give Moses for Mount Sinai and na for Israel pipol.