1 Make evribody obey di pipol wey dey rule dem. Bikos na only God dey give authority and put pipol for pawa. 2 So anybody wey dey disobey dia ruler, dey disobey God and God go ponish am. 3 Bikos doz wey dey do good, nor go get problem with dia rulers, so dem nor nid to fear. Make una just do wetin dey good and dem go praiz una. 4 Bikos all rulers na God savant and na dia duty to help una. If una do bad, den make una fear, bikos dis rulers get pawa to ponish una. Dem bi God savants wey dey ponish doz wey do bad tins. 5 But una must obey di rulers, bikos una know sey naim bi di rite tin to do, nor bi bikos God go vex for una. 6 Una must still pay una tax too. Di rulers na God savants and na dia work to kare for all dis matter. 7 Make una pay evritin wey una dey whole; weda na tax, respet or honor.

8 Make love bi di only tin wey yu dey whole! If yu love odas, yu don do evritin wey di law tok. 9 Di law get difren-difren kommand like, “Nor kommit adultery; nor kill pesin; nor tif; nor put eye for anoda man propaty.” All dis na just one kommand wey sey, “Make pipol love odas, just as dem love diasef.” 10 If yu love pesin, yu nor go do am bad. So, na love bi di main tin wey di law dey tok about.

11 Since una know di time wey wi dey naw, make una dey bihave well, bikos di time don rish wen una go wake-up from sleep. Una know sey di day wey God go give us salvashon, don near well-well pass as e bi wen wi first bilive. 12 Nite don nearly finish and day go soon break. So make wi stop to bihave like pipol wey dey darkness and make wi ready to waka for lite. 13 So make wi dey bihave well as pipol dey do for day time. Nor go anyhow party or drink too mush, den kon dey bihave anyhow. Nor kworel or judge pipol. 14 Instead, make una wear Jesus Christ like klot for body. Den wi nor go do di tins wey awa body wont.