1 Diah sellet kenn ox adda shohf opfahra zumm Hah eiyah Gott es en vayyah blakka hott adda es ebbes letz hott mitt sich. Sell veah grausam zumm Hah eiyah Gott.

2 In ennich's funn di shtett es da Hah eiyah Gott eich gebt, vann's auskfunna vatt es ennichah mann adda veibsmensh unnich eich evil dutt in di awwa fumm Hah eiyah Gott bei sei bund ivvah-dredda,

3 un bei sich nunnah bikka un anri gettah deena, adda bei di sunn, adda da moon adda di shtanna deena, dess vass geyyich mei gebott is—

4 vann dess ksawt vatt zu eich, no sellet diah dess goot unnah-sucha. Vann's voah is un's shuah is es so en shreklich ding gedu voah in Israel,

5 dann sellet diah sellah mann adda sell veibsmensh es dess evil ding gedu hott an di doahra funn eiyah shtett bringa un si doht shtaynicha.

6 Avvah diah daufet so en mensh yusht doht macha vann zvay adda drei leit geyyich een zeiya. Eah soll nett doht gmacht sei vann yusht ay mensh geyyich een zeikt.

7 Di hend funn di zeiyah sella di eahshta sei fa een shtaynicha, no di hend funn di ivvahricha leit. Sellah vayk missa diah sell evila funn eich vekk du.

8 Vann en sach fannich eich kumd in di shtett es zu hatt un shveah is fa eich zu richta—so vi vann ebbah doht gmacht vatt, eb's poahbes adda unfahoft voah, adda vi ebbah sei recht grikt geyyich en anri mann sei recht, adda veah di shuld is vann zvay leit fechta—vann dee sacha shtreit macha unnich eich, no gaynd an da blatz es da Hah eiyah Gott raus glaysa hott.

9 Datt bringet's fannich di Lefiddisha preeshtah adda da richtah es datt is an selli zeit. Frohwet si un si sella eich sawwa vass recht is.

10 Diah misset du vass si eich sawwa am blatz es da Hah raus layst. Gevvet acht un doond alles grawt vi si eich sawwa.

11 Richtet's ksetz aus vi si eich lanna, un doond vass si ausmacha diveyya. Drayyet nett vekk funn vass si eich sawwa, nett rechts adda lings.

12 Ennich ebbah es draut fa nett du vass da preeshtah sawkt es datt shtayt fannich em Hah eiyah Gott, adda vass da richtah sawkt, sellah mann muss doht gmacht sei. Sellah vayk misset diah sell evil vekk du funn Israel.

13 No zayla awl di leit heahra diveyya un sich feicha, un nimmand zayld drauwa sich viddah so ohshikka.

14 Vann diah moll in's land nei gaynd es da Hah eiyah Gott am eich gevva is un hend's ivvah-gnumma un voonet drinn, vann diah no sawwet, “Miah zayla en kaynich ivvah uns setza vi awl di heida um uns rumm,”

15 no seind shuah es diah da kaynich eisetzet es da Hah eiyah Gott raus rooft. Eah muss ayns funn eiyah aykni breedah sei. Doond nett en ausahra ivvah eich setza; es muss en Israeliddah sei.

16 Un deah kaynich soll nett feel geil zu sich nemma, adda di leit macha zrikk an Egypta gay fa may geil hohla, veil da Hah ksawt hott, “Diah sellet nee nimmi datt zrikk gay.”

17 Da kaynich soll nett feel veivah nemma, adda sei hatz vatt vekk gedrayt. Eah soll aw nett feel silvah un gold ufsamla fa sich selvaht.

18 Vann eah kaynich vatt soll eah sich en gleichnis ausshreiva funn demm ksetz un's in en buch shreiva lossa. Eah soll's greeya funn di preeshtah es Lefiddah sinn.

19 Eah soll dess buch bei sich halda un's laysa sei layva lang, so es eah land fa da Hah sei Gott firchta un oahrich acht gevva fa awl di vadda funn dee gebodda un ksetza halda.

20 Eah soll sich nett uf hayva un denka es eah bessah is es sei breedah, so es eah nett vekk drayt uf di rechts adda lings seit funn di gebodda. No zayld eah un sei nohch-kummashaft en langi zeit roola ivvah sei kaynich-reich in Israel.