Hebräer
Es 1. Gabiddel.
Gott Hott Kshvetzt Deich Sei Sohn
1 Lengah zrikk hott Gott kshvetzt zu unsah foah-feddah deich di brofayda an feel zeida un in edlichi vayya.
2 Avvah an dee letshta dawwa hott eah kshvetzt zu uns deich sei Sohn, deah vo eah ufketzt hott fa alli sacha eahva, un deich deah es eah aw di veld gmacht hott.
3 Da Sohn is da glanz funn Gott sei hallichkeit, es gleichlich bild funn sei naduah, un eah haybt alles zammah mitt sei greftich Vatt. Vo eah unsah sinda rein gmacht katt hott bei sich selvaht, hott eah sich anna kokt uf di rechts seit funn demm vo alli macht hott im haychshta.
4 Eah is so feel haychah vadda es di engel, veil sei nohma es Gott eem gevva hott, haychah is es iahra nohma.
5 Fa zu vels funn di engel hott Gott selayva ksawt,
“Du bisht mei Sohn,
heit habb ich dich gezeikt”? Adda viddah,
“Ich zayl sei Faddah sei,
un eah soll mei Sohn sei”?
6 Un aw viddah vo eah da eahsht-geboahra in di veld gebrocht hott, hott eah ksawt,
“Un awl di engel funn Gott sella een ohbayda.”
7 Veyyich di engel hott eah ksawt,
“Eah macht sei engel zu geishtah
un sei deenah zu feiyah-flamma.”
8 Avvah veyyich em Sohn hott eah ksawt,
“Du hoksht uf dei kaynich-shtool, oh Gott, funn ayvichkeit zu
ayvichkeit,
du fiahsht dei Reich in gerechtichkeit.
9 Du hosht di gerechtichkeit gleebt, un di ungerechtichkeit kast.
Fasell, oh Gott, hott dei Gott dich ksalbt
mitt em ayl funn fraylichkeit ovvich dei kumrawda.”
10 Un eah sawkt,
“Du, Hah, hosht fumm ohfang da grund glaykt funn di eaht,
un di himla sinn di eahvet funn dei hend.
11 Dee zayla fagay, avvah du zaylsht bleiva;
si vadda awl ald vi glaydah.
12 Du rolsht si uf vi en ivvah-rokk,
un si zayla fa'ennaht sei.
Avvah du bleibsht vi du bisht
un dei yoahra zayla nee nett enda.”
13 Zu vels funn di engel hott Gott selayva ksawt,
“Hokk dich uf mei rechtsi seit,
biss ich dee vo dich hassa
in en foos-shtool mach fa dei fees”?
14 Sinn nett awl di engel geishtah es Gott deena doon, un sinn naus kshikt fa selli helfa vo di saylichkeit eahva zayla?