Da Brofayt Nahum
Es 1. Gabiddel.
Em Hah Sei Zann Geyyich Nineveh
1 Dess sinn brofayt-vadda veyyich Nineveh. Es buch funn di vision es da Nahum funn Elkosh katt hott.
2 Da Hah is en Gott es jealous is un es shtrohfa dutt;
da Hah is zannich un eah betzawld zrikk.
Da Hah betzawld selli zrikk es geyyich een sinn,
un eah hald sei zann fa sei feinda.
3 Da Hah vatt nett kshvind bays un hott grohsi graft;
da Hah lost selli es shuldich sinn nett unkshtrohft gay.
Vo eah lawft sinn vind-veahvla un shtoahms,
un di volka sinn da shtawb funn sei fees.
4 Eah zankt da say un macht en drukka,
eah drikkeld awl di revvahra uf.
Basan un Karmel drayya brau,
un di blumma funn Lebanon favelka.
5 Di berga shidla fannich eem,
un di hivla fagayn.
Di eaht shiddeld vann eah bei kumd,
di veld un awl selli es drinn voona.
6 Veah kann fannich seim zann shtay?
Veah kann sei haysah zann shtenda?
Sei zann brend vi feiyah,
un macht di felsa in shtikkah fabrecha.
7 Da Hah is goot,
un is en feshtah-blatz an di zeit funn druvvel;
eah gebt acht uf selli es iahra fadrauwa in een doon.
8 Avvah vi mitt en grohsi vassah flott,
macht eah en end funn selli es geyyich een sinn;
eah fafolkt sei feinda mitt finshtahnis.
9 Vass sind diah am ausshaffa geyyich da Hah?
Eah macht en folshtendich end funn eich.
Eah lost ebbah geyyich een shaffa yusht ay moll.
10 Si sinn vi danna es deich-nannah sinn,
un sinn ksoffa funn iahra vei,
avvah si vadda ufgebrend vi drukka shtroh.
11 Aus diah, oh Nineveh, is aynah raus kumma,
es evil im sinn hott geyyich da Hah,
aynah es gottlohsah roht gebt.
12 Dess is vass da Hah sawkt:
“Even vann's feel funn eena sinn un si oahrich shteik sinn,
doch zayla si abkshnidda sei un vekk gnumma vadda.
Mei leit funn Juda, ich habb eich gedaymeedicht
avvah ich daymeedich eich nimmi lengah.
13 Nau zayl ich iahra yoch fabrecha un's funn eiyah hals nemma,
un ich fabrech di kedda es eich binna.”
14 Da Hah hott en gebott gevva geyyich dich, Nineveh:
“Dei nohch-kummashaft zayld dei nohma nimmi drawwa.
Ich mach en folshtendich end zu di gleichnisa un abgettah,
dee es im tempel funn deim gott sinn.
Ich risht dei grawb,
fa du bisht grausam.”
15 Gukket, uf di berga kumma di fees funn aynah
es uns goodi sacha sawwa zayld;
eah dutt fridda ausroofa.
Haldet eiyah feiyah-dawk feshta, diah leit in Juda,
folfillet sell vass diah fashprocha hend.
Sellah ungettlich zayld nee nimmi deich eiyah land kumma,
eah is folshtendich zu nix gebrocht.