Es 2. Gabiddel.
Veisheit Hald Dich Funn Evil
1 Mei kind, vann du mei vadda ohnemsht,
un mei gebodda uf shtoahsht in diah,
2 so es dei oah acht hott zu veisheit,
un dei hatz gedrayt is fa sacha fashtay,
3 un vann du naus roofsht fa eisicht,
un dei shtimm rooft fa sacha begreifa,
4 un vann du sell suchsht es vi fa silvah,
un guksht difoah es vi fa keshtlich fashtekkeld sach,
5 no zaylsht du di furcht fumm Hah fashtay,
un zaylsht di vissaheit funn Gott finna.
6 Fa da Hah gebt veisheit;
funn seim maul kumd eisicht un gawb fa sacha fashtay.
7 Eah shtoaht veisheit uf fa selli es ufrichtich sinn,
un is en shield fa selli es lawfa in unshuld,
8 fa eah heet di pawt funn selli es anri recht yoosa,
un hald frei da vayk funn sei saylichi.
9 No zaylsht du gerechtichkeit fashtay, un aw sell vass recht is,
du zaylsht vissa vass feah un recht is in alli vayk.
10 Fa veisheit zayld in dei hatz kumma,
un eisicht zayld blesiahlich sei zu dei sayl.
11 Goodah fashtand zayld dich heeda,
un eisicht zayld ivvah dich vatsha,
12 un dich vekk halda fumm evila vayk,
un funn mennah es ungettlich shvetza,
13 funn selli es grawdi pawda falossa,
un lawfa uf dunkli vayya,
14 selli es blesiah henn in evil du,
un sich gleicha ufhalda mitt seishi letzi sacha.
15 Iahra pawda sinn grumm,
un iahra vayya sinn nett grawt.
16 Dess hald dich vekk funn di fremd fraw,
funn di aybrechich fraw mitt iahra glatt kshvetz,
17 selli es iahra mann falossa hott es see yung keiyaht hott,
un fagest's bund es see gmacht hott fannich Gott.
18 Iahra haus fiaht nunnah zumm doht,
un iahra pawda zu di geishta funn di dohda.
19 Kenni es zu iahra gayn kumma viddah zrikk,
adda drayya zrikk zumm vayk funn layva.
20 So musht du da vayk lawfa funn goodi mennah,
un dich uf di pawda funn di gerechta halda.
21 Fa di ufrichticha zayla im land layva,
un di unshuldicha zayla drinn bleiva.
22 Avvah di gottlohsa zayla abkshnidda sei fumm land,
un di unshtandhafticha zayla raus gezowwa sei bei di vatzla.