Es 25. Gabiddel.
Noch May Shpricha Fumm Solomon
1 Dess sinn aw di shpricha fumm Solomon es nunnah kshrivva voahra bei di mennah fumm Hiskia, da kaynich funn Juda.
2 Es is Gottes eah fa sacha zu gedekt halda,
avvah's is kaynich-eah fa sacha aussucha.
3 Vi di himla hohch sinn, un di eaht deef is,
so is es hatz funn kaynicha, veah kann's fashtay?
4 Nemm da shaum ab funn kshmolsa silvah,
no kann's gyoost sei beim silvah-shmitt.
5 Nemm di gottlohsa vekk fumm kaynich,
un sei kaynich-reich kann fesht gmacht sei in gerechtichkeit.
6 Du dich nett hohch uf hayva fannich em kaynich,
un shtell dich nett in da blatz funn grohsi mennah;
7 fa's is bessah fa ksawt sei, “Kumm do ruff,”
es vi niddahra nunnah gedu sei fannich en roolah.
Sell es du ksenna hosht mitt dei awwa,
8 nemm's nett kshvind in di court,
fa vass zaylsht du du am end
vann dei nochbah veist es du letz bisht?
9 Mach dei sacha recht mitt deim nochbah,
avvah drawk kenn kshvetz veyyich anri;
10 adda sellah es es heaht mecht diah en shlechtah nohma gevva,
un du kansht dei goodah nohma nee nimmi zrikk greeya.
11 En vatt es ksawt is an di recht zeit,
is vi goldichi ebbel es in silvah ksetzt sinn.
12 En zank gevva zu en oah es heaht bei ebbah mitt veisheit,
is vi en goldichah oahra-ring adda en goldich hals-band.
13 Vi di keld funn shnay an di zeit funn di eahn,
so is en shtandhaftichah gebodda-drawwah zu selli es een shikka;
eah fashteikt di sayl funn sei meishtahra.
14 Vi volka un vind unni reyya,
so is en mann es braekt veyyich kshenkah es eah nett gevva hott.
15 Deich geduld kann en roolah fashvetzt sei,
un en leichti zung kann en gnocha fabrecha.
16 Vann du hunnich findsht, ess nett zu feel,
zu feel macht dich ruff shmeisa.
17 Gay nett zu oft in dei nochbah sei haus,
eah mecht dich laydich vadda un ohfanga dich hassa.
18 En mann es falshi zeiya drawkt veyyich sei nochbah,
is vi en shpiah, en shvatt adda en shaufah arrow.
19 Em falossa uf en unshtandhaftichah mann an di zeit funn druvvel,
is vi en shlechtah zoh adda en lohmah foos.
20 Ebbah es leedah singd zu en gedruvveld hatz,
is vi aynah es ebbah sei glaydah vekk nemd uf en kaldah dawk,
adda vi essich uf soda leahra.
21 Vann dei feind hungahrich is, gebb eem broht zu essa;
vann eah dashtich is, gebb eem vassah zu drinka.
22 Vann du dess dusht bisht am feiyahrichi kohla uf sei kobb du,
un da Hah zayld dich zrikk betzawla.
23 Da natt vind bringd reyyah,
un shlechti kshvetzah bringa baysi ksichtah.
24 'Sis bessah fa in en ekk voona drovva uf em dach,
es vi in en haus voona mitt en zannichi fraw.
25 Vi kald vassah zu en dashtichi sayl,
so sinn goodi gebodda funn en veit ab land.
26 En gerechtah mann es eigebt zu di gottlohsa,
is vi en moddichi shpring adda en drekkichah brunna.
27 Es is nett goot fa zu feel hunnich essa,
un's is nett goot fa gay gukka fa hohchi eah.
28 En mann es sei zann nett zrikk hayva kann,
is vi en uffeni shtatt unni mavvahra.