Da 9. Psalm.
Dankboah Zu Gott Fa Sei Richtes
En Psalm fumm Dawfit. Zumm foah-singah.
1 Ich zayl da Hah danka mitt mei gans hatz;
un zayl fazayla veyyich awl dei vundahra.
2 Ich zayl mich froiya un fraylich sei in diah.
Ich zayl lohb singa zu dei nohma, du Alli-Haychshtah.
3 Mei feinda sinn zrikk gedrayt vadda,
si shtolbahra un kumma um fannich diah.
4 Du hosht miah kolfa mei recht greeya un hosht ufkshtanna fa mei sacha.
Du hosht uf em richtah-shtool kokt un gricht vass recht voah.
5 Du hosht di heida gezankt un di gottlohsa umgebrocht;
du hosht iahra nohma ausgrivva fa'immah.
6 Di feinda sinn faddich fa'immah,
du hosht iahra shtett zammah grissa,
si sinn gans fagessa.
7 Avvah da Hah hokt uf em kaynich-shtool fa'immah,
eah richt funn seim richtah-shtool.
8 Eah zayld di veld richta in gerechtichkeit,
un zayld di leit roola mitt en recht gericht.
9 Da Hah is en sayfah Roo-Blatz fa di nunnah-gedreddana,
en sayfah blatz an di zeit funn druvvel.
10 Selli es dei nohma vissa doon iahra fadrauwa in dich;
fa du, oh Hah, falosht selli nett es dich sucha.
11 Lohvet da Hah es in Zion voond,
sawwet di leit vass eah gedu hott.
12 Fa deah vo ayva kumd mitt di bloot-fageesah, fagest nett;
eah fa'acht nett selli es leida un naus roofa.
13 Sei bamhatzich zu miah, oh Hah,
gukk moll vi ich leida muss deich selli es mich hassa.
Hayb mich uf funn di doahra fumm doht,
14 so es ich awl dei lohb fazayla kann,
in di doahra funn di Dochtah funn Jerusalem,
un fraylich sei kann fa dei saylichkeit.
15 Di heida henn en loch gegrawva un sinn nei kfalla,
iahra fees sinn kfanga in di net es si kshteld henn.
16 Da Hah macht sich bekand bei sei gerichtes,
un di gottlohsa vadda kfanga
bei di eahvet funn iahra aykni hend.
(Higgaion. Sela)
17 Di gottlohsa zayla in's grawb gay,
un so doon awl di leit es Gott fagessa.
18 Selli es noht henn zayla nett immah fagessa sei,
un di hofning funn di oahma gayt nett faloahra.
19 Shtay uf, oh Hah, un loss da mensh nett ivvah-hand havva,
loss di leit gricht sei bei diah.
20 Mach si sich feicha, oh Hah,
loss di leit vissa es si yusht mensha sinn.
(Sela)