Da 63. Psalm.
En Falanga Fa Gott
En Psalm fumm Dawfit vo eah in di vildahnis funn Juda voah.
1 Oh Gott, du bisht mei Gott;
ich such dich eahnshtlich.
Mei sayl is dashtich fa dich,
mei flaysh falangd fa dich
vi en drukka un en dah land
vo kenn vassah is.
2 Ich habb dich ksenna im tempel,
un habb dei macht un hallichkeit ksenna.
3 Veil dei grohsi leevi bessah is es layva,
dann doon mei leftz dich preisa.
4 Ich zayl dich lohva so lang es ich layb,
un in deim nohma hayb ich mei hend uf.
5 Mei sayl zayld satt sei so vi mitt em besht ess-sach,
un mei maul lohbt dich mitt fraylichi leftz.
6 Vann ich an dich denk uf meim bett,
dann bisht du uf mei meind deich di gans nacht.
7 Du bisht mei helfah,
un im shadda funn dei flikkel doon ich fraylich singa.
8 Mei sayl henkt zu diah,
dei rechtsi hand haybt mich uf.
9 Avvah selli es mei layva nemma vella,
zayla nunnah gay in di deef eaht.
10 Si vadda ivvah-gevva zu di graft fumm shvatt,
un zayla ess-sach vadda fa di foxa.
11 Avvah da kaynich zayld sich froiya in Gott,
selli es shveahra bei eem zayla een preisa,
avvah di meilah funn leeyah vadda shtill gmacht.