Da 135. Psalm.
En Lohb-Leet Zumm Awlmechticha Gott
1 Lohb sei zumm Hah!
Lohvet da nohma fumm Hah;
Lohvet een, diah gnechta fumm Hah,
2 diah es im Hah sei haus shtaynd,
in di foah-hayf funn Gott sei haus.
3 Lohvet da Hah, fa da Hah is goot,
singet lohb zu sei nohma, fa sell is blesiahlich.
4 Da Hah hott da Jakob raus glaysa fa sich selvaht,
un hott Israel gmacht fa sei ayknes sei.
5 Ich vays es da Hah grohs is,
un es unsah Hah ovvich awl anri gettah is.
6 Da Hah dutt vass-evvah es eah vill
im himmel un uf di eaht,
im say un in di deefa bletz.
7 Eah macht di volka uf kumma fumm end funn di eaht,
eah shikt gviddah un reyyah,
un bringd da vind aus sei shtoah-heisah.
8 Eah hott di eahsht-geboahrana funn Egypta nunnah kshlauwa,
di eahsht-geboahrana funn mensha un fee.
9 Eah hott zaycha un vundahra in di mitt funn dich kshikt, oh Egypta-Land,
geyyich da Pharao un awl sei gnechta.
10 Eah hott di leit funn feel lendah nunnah kshlauwa,
un hott mechtichi kaynicha doht gmacht,
11 da Sihon, da kaynich funn di Amoriddah,
da Og, da kaynich funn Bason,
un awl di kaynicha in Kanaan.
12 Un eah hott iahra land gevva fa en eahbshaft,
en eahbshaft zu sei leit Israel.
13 Oh Hah, dei nohma bleibt fa'immah.
Vass du gedu hosht zayld nee nett fagessa sei, oh Hah,
un vatt gmeind fa'immah un immah.
14 Da Hah zayld sei leit richta,
un zayld gnaydich sei zu sei gnechta.
15 Di abgettah funn di heida sinn silvah un gold,
dee sinn gmacht bei mensha hend.
16 Si henn meilah, avvah si kenna nett shvetza,
un awwa, avvah si kenna nett sayna;
17 si henn oahra, avvah si kenna nett heahra,
un si henn kenn ohften in iahra meilah.
18 Selli es dee abgettah macha, zayla vadda vi si,
un aw awl selli es sich falossa uf si.
19 Oh haus funn Israel, lohb da Hah!
Oh haus fumm Aaron, lohb da Hah!
20 Oh haus fumm Levi, lohb da Hah!
Diah es een firchta, lohvet da Hah!
21 Glohbt is da Hah funn Zion,
sellah es in Jerusalem voond.
Halleluja!