Sura Kareba Moiko
Lukasi
Puꞌumpau
Surano ai Lukasi nie pauꞌo i Yesu ooto Datu Pongkadudui henu ginantiRo Ue Ala tiaro to Isaraeli ka tiano lowono mia tolino. Ai laro surano nie i Lukasi umukio motae i Yesu oto pinowea anggaꞌa umbu penaoRo Ue Ala, minggi paleleꞌo Kareba Moiko umbu ndi Ue Ala tiaro mia karampini. Ihino sura nie kumonoo pompehowowaRo Ue Ala ndi lowono mia henu manggerupa pinaraluno. Ai laro sura nie nio aso mangaꞌua henu poli tobataꞌo ai pompuꞌuano kumonoo nioꞌaRo i Yesu, ka mboꞌu i pokotampulaꞌano kumonoo teꞌengkano i Yesu ai suruga. Umana mongkono tuwuno umarino i Yesu teꞌengka ai suruga nopauꞌakeo mboꞌu mpoꞌuki sura nie ai laro sura TinenaRo.
Tiano koꞌoruo ka koꞌonoono (kiteo ihino sura totono nie) meꞌihi orao umana henu tohaweꞌo butu ai laro sura nie. Tuduano umana mongkono naniro malaꞌeka ka melekoro tompokambi mengkiteo nioro i Yesu, i Yesu ai Raha Mempori tempono da ana-ana, ka mboꞌu sirime mongkono mia Samaria henu moiko aroa ka Ana henu tetadi. Sura nie takau mesuꞌuio mongkono kakai, Penao Mempori, pontulungiro irowai ai laro poꞌanggaꞌano i Yesu, ka poꞌoninia hala umbu ndi Ue Ala.
Ihi
Pamulaꞌano 1:1-4
Nioꞌaro ka tempo dedeikiro i Yohane Mpupodolo ka i Yesu 1:5—2:52
Poꞌanggaꞌano i Yohane Mpupodolo 3:1-20
I Yesu dinolo ka inaraꞌarahako 3:21—4:13
Pomparakaino i Yesu ai tongano palili Galilea 4:14—9:50
Umbu ai Galilea lumeko ai Yerusale 9:51—19:27
Pokotombaꞌano minggu ai Yerusale ka petengi-tengino 19:28—23:56
Muleꞌano i Yesu umbu ai matea hawe ka teꞌengkano ai suruga 24:1-53
1
Pompamulaꞌano sura
1 Teopilu henu takau pinelangkai,
Orao mia henuto mperokuhi meꞌukiꞌo lele kumonoo henu umarito tegagi ai olondo. 2 Romeꞌukiꞌo lele menggena henu romerongoio umbu ai orao mia henu sumueꞌo lowono henu tegagi umbu ai pamulaꞌano, karoꞌamba paleleꞌo ka pauꞌakito. 3 Gagi kupesuꞌuio wusuꞌo lowono umbu ai pamulaꞌano kanoꞌamba kuputuio umukiꞌo lowono nie gagi lele henu teꞌatora moiko tiamiu. 4 Kupowowau menggena unie kau toꞌorio motae mbio henu pinaguruꞌako ndi ikomiuka suꞌu mentee.
Pompotoꞌori nioꞌano i Yohane
5 Tempono i Datu Herode gagi datu ai wute Yudea, nio aso mia Petewawo Pesomba ai Sakaria neeno, umbu ai tobuno i Abia, neeno somborino i Elisabe, umono mboꞌu inuleno i Haruni. 6 Tinuwuro sombori nie mentee ai aroRo Ue Ala. Oruo irono mpihe montonda parenta ka songkaRo Ue ka lalau winowauro henu lano mentee. 7 Kanggo lalau anaro akono i Elisabe biita ka iroto mosuꞌo.
8 Ai aso olo, hawe tempono tobuno i Abia moꞌangga ai Raha Mempori, i Sakaria palakuꞌo anggaꞌano mompowea pesomba ai aroRo Ue Ala. 9 Montonda loterei, henu mondee romewowauo Petewawo Pesomba, i Sakaria tiniso mendamo mosunu dupa ai Bolongko Mempori ai laro Raha Mempori. 10 Tekonaino i Sakaria mosunu dupa ai laro Bolongko Mempori, mia orao mpekakai ai arono Raha Mempori. 11 Tempo laꞌa malaꞌekaRo Ue Ala mesabahako ndi Sakaria. Malaꞌeka laꞌa menggoti ai koana posunua dupa. 12 Tempono i Sakaria sumueꞌo malaꞌeka laꞌa, kano tekangga ka momee. 13 Kanggo nopotae malaꞌeka, “Indo momee, Sakaria! Ue Ala rumongoio kakaimu. Somborimu i Elisabe minggi meꞌanaꞌakeo aso ana ntama. Aineengakeokaa i Yohane. 14 Ikomiu olo mangaꞌu ka manangai ka orao mia minggi memangaꞌu tempono ana laꞌa pineꞌanaꞌako! 15 Akono umono minggi gagi mia langkai ai aroRo Ue Ala ka indono poꞌinu anggoro ka inunga mesueno henu mompokomolangu. Umono minggi buke ako Penao Mempori umbu ai laro kompono ineno. 16 Umono olo mowawo orao mia Isaraeli mepokule mororongoi ndi Ue, Ue Alaro. 17 Umono minggi pasadiaꞌo bawaaRo i Ue ambono i Ue hawe ai laro tolino nie. Penao Mempori minggi moweeꞌakeo pabawa kano poli moꞌangga menggena nabi Elia. Umbu mbio henu inanggano, mia mosuꞌo olo mehohawaꞌo euno ana-anaro. Ka umono minggi waweiro mia henu lano mpororongoi gagi mpororongoi euno ndi Ue. Ka pompewowoloro gagi lalompande euno. Gagi umboro mebehe tuwu mentee.” 18 Kanoꞌamba i Sakaria mesikeno ndi malaꞌeka laꞌa, “Helinde kaku toꞌorio motae pinau miu sie olo gagi? Akono iaku ka somboringgu oto mosuꞌo.” 19 Sumangki i malaꞌeka, “Iaku nie i Gabaraeli. Iaku ataRo Ue Ala kaa iaku tinena hawe paleleꞌo kareba henu moiko tiamu. 20 Menteꞌano, mbio henu kupauꞌakomu nie olo tegagi bano haweto tempono. Kanggo akono lau peꞌale-aleo pinaunggu, lau bisa mepau, hawe kano tegagi henu kupauꞌo nie.” 21 Tempo sie, mia orao meꞌeꞌemango i Sakaria bano peluarako. Mia orao mengkohali-hali akombio kano epie ngako umono ai laro Bolongko Mempori. 22 Tempono meluarako, andono bisa mepau ndi umboro. Butukaa megambara ako kaeno kaa kolekono lano bisa mepau. Pokotombaꞌano romentoꞌorio mia orao motae Ue Ala umari mokokiteoakeo aso kegagia ai laro Bolongko Mempori. 23 Towono umari anggaꞌano ai Raha Mempori, i Sakaria mekule ai rahano.
24 Lanolaa epie, i Elisabe somborino momeni, ka umono meꞌuko ai laro raha olimo wule epieno. 25 Nopotae i Elisabe, “Pokotombaꞌano Ue Ala tumulungiaku ka umoninio kokohenunggu.”
Pompotoꞌori nioꞌano i Yesu
26 Tempono i Elisabe tekonai momeni onoo wuleno, Ue Ala tumenaꞌo malaꞌeka Gabaraeli lumeko ai inie Nasare ai Galilea. 27 Ue Ala tumenaꞌo malaꞌeka Gabaraeli lumeko ndi Maria moluale henu taipo huru meꞌaso poturi saru tama. I Maria sie oto mesambora ka aso tama meneengako i Yusupu umbu inuleno i Daudi. 28 Malaꞌeka laꞌa hawe ndi Maria nopotae, “Tabea, iko henu nopehohawako i Ue, Ue Ala rumoronganiko.” 29 Rumongoio pau sie, i Maria tekangga kano kosike-sikeno ai laro aroano mbio pengkonoano tabea laꞌa. 30 Nopotae malaꞌeka ndi Maria, “Indo momee Maria, ako iiko takau Ropehohawaꞌo Ue Ala. 31 Menteꞌano iko minggi momeni kaa meꞌanaꞌakeo aso ana ntama kaa neengakeo i Yesu. 32 I Yesu minggi gagi maramba kaa minggi ninee AnaRo Ue Ala Henu Laloako Pabawa. Ue Ala mokogagiꞌo i Yesu datu menggena datu Daudi, ue mpuꞌuNo, 33 kaa Umono minggi gagi datu henu parentaꞌo inuleno i Yako*Yako: Yako umbu inuleno i Yako nio pau to Isaraeli. henu lalau tampulaꞌano kaa pomparentaꞌaNo lano huru tampula.” 34 Nopotae i Maria ndi malaꞌeka laꞌa, “Helinde kano masa gagi akono amboku pesombori?” 35 Sumangki i malaꞌeka, “Penao Mempori minggi metii ndi iko, kaa pabawaRo Ue Ala Henu Laloako Pabawa olo rumoronganiko. Ooto usie iiko minggi meꞌanaꞌakeo ana henu mempori, ninee anaRo Ue Ala. 36 Kupauꞌakomu motae i Elisabe petiamu henu rompotae biita kaa ooto mosuꞌo laꞌa, oto momeni aso ana ntama kaa unie wule koꞌonoono. 37 Ako ndi Ue Ala lalau henu tai gagi.” 38 Nopotae i Maria, “Menteꞌano iaku nie ataRo Ue Ala, nogagito menggena nineemu sie.” Umari laꞌa malaꞌeka lumeko bintango ai Maria.
I Maria tepotowoꞌakeo i Elisabe
39 Towono lumeko malaꞌeka laꞌa, lumekoto i Maria ai inie langkai ai wute tamungku Yudea. 40 Tempono hawe lehea, i Maria lumeko ai rahano i Sakaria, ka pendamono, i Maria metabea ndi Elisabe. 41 Tempono i Elisabe rumongoio petabeano i Maria, ana henu ai laro kompono i Elisabe meleluako mangaꞌu. Kaa i Elisabe nororonganio Penao Mempori, 42 kano kumora, “Ikoto mia binarakati ai olono lowono irowai! Nobarakatiꞌo ana henu minggi pineꞌanaꞌakomu laꞌa! 43 Ainei iaku nie kano ineNo Uenggu hawe ndi iaku? 44 Menteꞌano tempono kurongoio petabeamu laꞌa, ana henu ai laro komponggu meleluako mangaꞌu. 45 Meꞌurakoto akono pompeꞌalo-alo motae mbio henu pinauRo Ue Ala ndi iiko olo gagi!”
Poꞌundeno i Maria
46 Kanoꞌamba nopotae i Maria,
“Aroanggu umundeꞌiRo i Ue,
47 ka sumanganggu mangaꞌu akono Ue Ala tumolosiaku.
48 Noꞌoꞌaroanganggu maupono iaku nie ataRo henu tetotoako!
Perorongoi! Mompamula hilinie lowono mia
motae iaku mangaꞌu.
49 Akono Ue Ala Henu Laloako Pabawa
mowowau kegagia langkai ndi iaku.
Mempori neeRo.
50 Ai sombo-sombo amapano tempo
Ue Ala konggo mompehohawa lowono inuleno mia henu momee ka melangkai iRo.
51 Ako kaeRo henu takau moroso
Rosia-siaꞌo mia mompelangka-langkai
52 Datu-datu Ropenaohakeo umbu ai potorono
kaa mia karampini inengka gagi mia henu pinelangkai.
53 Mia mokoninggo olo pinoko mowoto ako moikoꞌa.
Mia suugi tinamba ai laro kae molie.
54 Rotulungiro to Isaraeli ataRo,
akono laRo kumulupeo ginantiRo mehohawakito,
55 ka Ue Ala lano huru kulupeo mbio henu ginantiRo ndi ue mpuꞌundo,
Ropehohawaꞌo ai Burahima ka inuleno hawe lalau tampulaꞌano.”
56 Ai Maria moꞌia i rahano i Elisabe, baraꞌura otolu wule epieno, kanoꞌamba mekule ai rahano i Nasare.
Nioꞌano i Yohane Mpupodolo
57 Haweto wuleno i Elisabe meꞌana. Nopeꞌanaꞌakeo aso ana ntama. 58 Towono petengi-tengi rahano kaa petiano rumongoio motae i Elisabe takau Ropehohawaꞌo Ue Ala, umboro memangaꞌu mperongangakeo. 59 Tempono rewu-rewu laꞌa tinuwuno oalu olo, umboro mehawe minggi mengkiteo rewu-rewu laꞌa tinindi. Kaa minggi menengakeo i Sakaria menggena neeno umano, 60 kanggo ineno motae, “Indo! Umono olo nineengako i Yohane.” 61 Rompotae, “Lalau umbu ai petiamiu nie henu meneengako i Yohane.” 62 Ka umboro megambara ako kaero mpesikeno ndi Sakaria ainei neeno rewu-rewu sie. 63 I Sakaria moꞌema wasu poꞌukiꞌa kano ukiꞌo, “Neeno i Yohane.” Lowono mia mengkohali-hali. 64 Tempo laꞌa bingkosako telipa pongu elono i Sakaria kano pepau ka moꞌunde ndi Ue Ala.
65 Memomeeto petengi-tengi rahano kaa kareba laꞌa telele hawe ai lowono tamungku ai Yudea. 66 Lowono mia henu rumongoio kegagia laꞌa kosike-sikeno ai laro aroaro, “Gagi mbio soongka rewu-rewu laꞌa!” Akono Ue Ala rumoronganio.
Poꞌundeno i Sakaria tempono i Yohane pineꞌanaꞌako
67 I Sakaria, umano i Yohane, nororonganio Penao Mempori kano pompohawe pau umbu ndi Umboro Ue Ala. Nopotae,
68 “Memaito kato unde-undeꞌiRo i Ue,
Alaro to Isaraeli!
Umboro oto hawe mosakoi bawaaRo
ka mokolipahiro.
69 Ue Ala moweeꞌakito pongkadudui henu takau moroso,
umbu ai inuleno i Daudi ataRo.
70 Tempo isaꞌa telalo umbu ndi umboro nabi-nabi bininikiRo,
Oto Roweeꞌakito i Ue ginantiRo.
71 Olo Ropokolipakito umbu ai uwelindo
kaa umbu ai pabawaro mia henu memokokatongakito.
72 Ka Nopokoꞌenaho pompehohawaRo tiano ue mpuꞌundo,
ginantiRo henu mempori laꞌa olo Ropokosangkaꞌo.
73 Ue Ala metando ndi Burahima umando.
74 Ka meganti minggi kumaduduikito umbu ai uwelindo,
gagi andoto lei memomee tumondaꞌiRo Ue Ala.
75 Bano menggena usie ikito mentuwu mempori ka mentee i aroRo tempono ikito da mentuwu.
76 Kaa kumonoo iiko, ananggu, iiko minggi ninee nabiRo Ue Ala Henu Laloako Pabawa.
Ka iiko olo tinena seꞌelu pasadiaꞌo sala haweꞌaRo i Ue.
77 Iiko olo paleleꞌo ndi bawaa kato mempoli kinadudui,
bano i Ue tumolosio halaro.
78 Moiko aroaRo Ue Alando mehohawakito.
Umono hawe kumaduduikito.
Menggena mataꞌolo henu saba eri-erio,
79 Hilaꞌato nopompowea wantaRo tiano mia
henu tuwu ai laro wongi-wongiꞌa ka momeeꞌa.
Ue Ala wawokito ai sala manangaiꞌa.”
80 Anano i Sakaria laꞌa kolangka-langkai ka tetambai moroso pompeꞌalo-alono. Umono moꞌia ai konde one, hawe tempono mokoꞌenaho koroino ndi to Isaraeli.