2 Timoteo
Tarik ta Risala de
De risala nimra itnin al Bulus katibu le Timoteo. Risala de gi wori kalam an Timoteo wa shokol bitou ma Bulus. Ainu tarik ta Timoteo al awal. Ze wonusuu inak, kaan kutuu Bulus fi sijin fi Roma zema katibu fi kitab ta Amal al Rasul. (Amal al Rasul 28) Bad kalamat al katibu fi kitab ta Amal al Rasul, kaan ja fikuu Bulus min sijin fi Roma wa uwo istemir ma shokol bitou. Wa de yau wokit al uwo katibu risala ta Timoteo al awal wa Tito.
Zema Bulus kaan gi katibu risala ta Timoteo nimra itnin, uwo kaan arufu gali zaman ta mutu bitou biga gerib (2 Timoteo 4:6-8). Kaanu gobudu wa sijinu Bulus tani mara. Uwo wonusu an kef uwo fi gidam gadi. (2 Timoteo 4. 16-18) Uwo kaman wonusu an kef uwo fi sijin ketir marat (2 Timoteo 1.8, 1.16, 2.9). Ashan kalamat del, risala nimra itnin ta Timoteo amulu ze akir kilima ta Bulus le Timoteo gubal uwo maa mutu. Bulus kaan wonusu kalam wadi le sabi tou wa zemil bitou fi shokol, wa sheja uwo ashan bi istemir istakal le Rabuna be iman.
Kalamat al fi kitab de
Fi asha 1, Bulus wodi shukuru le Timoteo wa uwo sheja Timoteo ashan bi tabi injil. Bulus zekiru Timoteo ashan bi hafizu hadiya al Rabuna wodi le uwo kweis (2 Timoteo 1:5-7). Bulus kaman sheja Timoteo gali, fadiya kede maa amulu uwo ashan taab bitou ma kalam ta Rabuna. Fadiya kede maa amulu nina ashan bi taab ma kalam ta Rabuna leanu nina arufu kulu hajat al Rabuna amulu le nina (2 Timoteo 1:9). Bulus kaman zekiru Timoteo an nas tanin al aba uwo wa maa deiru tabi injil (1 Timoteo 1:15).
Fi Asha 2, Bulus sheja Timoteo ashan bi kun gowi fi iman bitou wa ashan bi derisu nas tanin deresa al sah al Bulus kaan derisu le uwo (2 Timoteo 2:1-2). Timoteo, ze kulu nas al gi kadim le Rabuna, lazim kede kutu bal bitou fi Rabuna wa kede maa kutu bal bitou fi hajat ta duniya de (2 Timoteo 2:4-5). Timoteo kede zekiru kenisa an kulu hajat del wa kede uwo aba muderisin al kadabin (2 Timoteo 2:16).
Fi asha 3 wa 4, Bulus kaman zekiru Timoteo ashan bi amulu hisab tou min muderisin al kadabin al gi dakalu fi kenisa be sir (2 Timoteo 3:1-5). Keli Timoteo lazim zekiru misal bita Bulus. Salakun Bulus taab ma kalam ta injil, lakin Rabuna hafizu uwo (2 Timoteo 3:11). Timoteo kede maa kafu ashan bi taab ma kalam ta injil leanu kulu nas al deiru ish haya al Rabuna deiru bi ligo taab (2 Timoteo 3:12). Bulus istemir sheja Timoteo tani mara ashan bi derisu deresa al sah, wa kede uwo aba kalam ta muderisin al kadabin (2 Timoteo 4:1-2). Fi Akir ta risala de Bulus rasulu salam le kenisa (2 Timoteo 4:19-22).
1
Risala nimra itnin al Bulus rasulu le Timoteo
2 Timoteo
Salam
1 Risala de min Bulus. Rabuna azilu ana ashan bi kun rasul bita Yesuwa al Mesiya, ashan ana bi wori le nas an haya al uwo waad fi Yesuwa al Mesiya.
2 Risala de le Timoteo, jena tai al ana hibu.
Keli neima, rahama, wa salam min Rabuna al Abu wa Sultan ta nina Yesuwa al Mesiya kun ma ita.
Wodi Shukur le Rabuna
3 Ana gi shukuru Rabuna ashan kalam bitak, Rabuna al ana gi kadim ma geliba nedif, ze judud tai kaan amulu. Ana daiman gi zekiru ita fi salawat tai bilel wa nahar. 4 Ana gi fekiru shedid ashan bi ainu ita wa ana gi zekiru kore taki wokit ana ferigu ma ita. Ana bi kun moksut kan nina limu tani. 5 Ana kaman zekiru iman bitak al hagiga, nefsa iman de abuba taki Lois wa uma taki Yunis indu. Wa ana mutaakid ita kaman indu iman de.
Teshji le Timoteo
6 Le sabab de ana gi zekiru ita ashan bi istamil hadiya al Rabuna wodi le ita wa kutu hadiya de kun hai. Hadiya al ita ligo wokit ana kutu ida tai fi ras taki. 7 Ashan Rabuna maa wodi le nina roho ta kouf, lakin roho ta guwa, ta muhaba, wa ta hafizu nefsa. 8 Ashan kida mata kun ma fadiya ashan kalam ta Sultan ta nina au ana al mobus ashan kalam bitou. Lakin isterik ma ana fi taab ashan kalam ta injil be guwa al Rabuna wodi le ita. 9 Leanu Rabuna kalisu nina wa nadii nina ashan ish haya al kudus. Uwo amulu de, maa ashan amail al kweis ta nina lakin ashan kuta bitou wa neima, al uwo wodi le nina fi Yesuwa al Mesiya gubal maa kalagu duniya. 10 Lakin hasa uwo kalas zahiru kuta bitou le nina be wasat ja ta mukalis ta nina Yesuwa al Mesiya. Uwo demiru guwa ta mut, wa uwo kaman jibu haya al abadiya be wasat injil. 11 Rabuna azilu ana mubashir, rasul, wa muderis ta injil de. 12 Wa de sabab ana gi taab ini fi sijin. Lakin fadiya maa gi amulu ana ma kalam de, ashan ana arufu kweis zol al ana aminu fi uwo. Wa ana arufu gali uwo bi agder hafizu haja al ana wodi le uwo kweis lahadi yom dak*1:12 Ainu 2 Tesalonika 1:10 wa Zafinayo 1:15. 13 Hafizu deresa al hagiga al ana derisu le ita ze misal, deresa al ita alimu min ana ma iman wa muhaba fi Yesuwa al Mesiya. 14 Hafizu kweis haja al Rabuna wodi le ita, be wasat guwa ta Roho al Kudus al gi ish fi nina.
Nas al Aba Bulus
15 Zema ita arufu, kulu nas al fi Mudiriya ta Asiya al Suker aba ana. Misal ta nas del yau Fugelo wa Erumogene. 16 Kede Sultan beinu rahama le bet bita Onesiforo, ashan uwo kaan daiman gi sheja ana, wa uwo maa indu fadiya ashan ana mobus ashan kalam ta Yesuwa. 17 Lakin wokit uwo wosulu fi Roma, uwo fetisu ana shedid wa uwo ligo ana. 18 Kede uwo ligo rahama min Sultan fi yom dak! Wa ita arufu kef uwo saidu ana fi Efeso.