Yakub
Tarik ta Risala de
Fi zaman al Yesuwa kaan lisa fi duniya, Yahudin ketir kaan hibu nadi isim ta awlad taumon Yakub ashan umon deiru zekiru Yakub al kaan weled ta jena bita jid taumon Abrahama (Takwin 25:19-26). Yakub kaan kaman abu ta itnashar gabayil ta Israil (Takwin 35:22-26). Ashan kida, rujal ketir fi Ahad al Jedid isim taumon Yakub.
Min mojmou ta rujal ketir de, fii talata kaan mohim: Yakub weled ta Zebedayo, Yakub weled ta Alifayo, wa Yakub aku ta Yesuwa al Mesiya (Injil Mata 13:55). Yakub weled ta Zebedayo wa Yakub weled ta Alifayo kaan fi mojmou ta Itnashar Rusul ta Yesuwa (Injil Mata 10:2-3), lakin Yakub aku ta Yesuwa yau kaan katibu risala ta Yakub de.
Awal nas al aminu fi Yesuwa kaan juz ta Yahudin al gi ish fi Yerusalema. Yakub aku ta Yesuwa kaan wahid min umon, wa uwo tala zol mosul fi bein ta muminin del. Yahudin kulu kaan bada tabi wara Rabuna miin bedri be wasat tabi gawanin ta Ahad al Gedim. Umon kaan arufu kulu gawanin, agani, salawat, gisat, wa tabashir al fi Ahad al Gedim. Haja al mohim kalis de, umon kaan arufu gali, Rabuna waado le umon Melik kebir al bi nadii Mesiya. Hasa Yakub wa muminin tanin al fi Yerusalema kaan kalas aminu fi Yesuwa ze Mesiya.
Lakin nas kubar ta Yerusalema kaan maa wafigu fi kalam de. Umon kaan maa deiru ashan nas bi aminu fi Yesuwa ze Mesiya. Fa umon kaan kutu haya ta Yakub wa muminin de deig wa umon katulu tanin wa turuju tanin bara min Yerusalema (Amal al Rasul 8:1). Yakub kaan katibu risala de fi wokit dak le muminin al kaan jere bara min medina (Yakub 1:1), ashan bi sheja umon wogif gowi fi iman taumon.
Kalamat al fi kitab de
Fi Asha 1, Yakub zekiru muminin ashan bi aminu fi Rabuna, ashan umon bi ligo hikma wa guwa wa umon bi kun indu sobur fi zaman ta taab. Yakub kaman wodi inzar le muminin gali, kan umon nesiya aminu fi Rabuna, keli umon kun jahizin ashan bi amulu haja al uwo kelimu.
Wahid min hajat al Rabuna kelimu yau: keli muminin hibu wa ihterem badun, keli umon maa indu tegsim fi bein taumon. Yakub wonusu an kalam de fi Asha 2, wa uwo kaman wonusu gali, kan umon nesiya aminu fi Rabuna, keli umon beinu iman taumon fi hajat al umon gi amulu.
Fi Asha 3, Yakub wodi inzar le muminin gali, lisan ta insan saab shedid. Insan marat ketir gi wonusu be dala wa be teriga al sukun. Umon gi wonusu kalamat batal al bi demiru haya ta nas. Lakin Rabuna deiru nas ashan bi istamil hikma bitou ashan bi wonusu wa amulu kulu kalam al uwo deiru. Uwo deiru nas keli indu rija nefsa, indu sobur, wa ish be salam.
Hata nas al aminu fi Rabuna bad marat gi hibu hajat al Rabuna maa deiru. Muminin daiman gi sakila ma katiya fi haya taumon. Ashan kida, fi Asha 4, Yakub derisu muminin ashan bi sibu amulu katiya, wogif gowi did Shetan, wa rija nefsa taumon fi gidam ta Rabuna. Uwo kaman kelimu gali, keli muminin maa hukumu badun, kaanu zol tani aksen min tani. Wa keli muminin maa katitu hajat kaanu umon arufu kalam al bi hasil fi mustagbal ze Rabuna.
Fi Asha 5, Yakub zekiru muminin tani mara ashan umon bi indu sobur wa iman fi zaman ta taab. Salakun nas al indu gurush wa sulta gi kutu haya taumon deig, keli umon lisa wogif gowi, ashan umon arufu gali kan Yesuwa al Mesiya rija fi duniya, uwo bi jibu le umon adala. Zema umon gi istena rija bitou, keli umon kun be salam, indu sobur wa seli daiman.
1
Risala ta
Yakub
Salam
1 Risala de min Yakub, kadam ta Rabuna wa Sultan Yesuwa al Mesiya, le nas ta Rabuna al setetu fi duniya.*1:1 nas ta Rabuna al setetu fi duniya au itnashar gabayil al setetu fi duniya
Salam le itakum.
Sobur fi zaman ta taab
2 Ya akwana wa ikwat tai, kan ay no ta taab gi ligo itakum, keli itakum kun farahanin, 3 leanu itakum arufu gali, haja al gi jeribu iman takum de gi kutu itakum kun indu sobur. 4 Kede sobur de raba gowi ashan itakum bi agder kun kweis kalis wa kamil, mafi haja bi kun nagis. 5 Kan ay zol min itakum maa indu hikma, keli uwo asalu Rabuna. Rabuna bi wodi. Rabuna gi wodi majani le kulu nas bidun neng-neng. 6 Lakin keli uwo asalu ma iman bidun was-was, ashan ay zol al bi indu was-was, uwo ze moya bita bahar al hawa bi hizu wa arufa. 7 Zol zede keli maa fekiru ashan bi ligo ay haja min Rabuna. 8 Zol zede indu itnin afkar, maa sabit fi kulu haja al uwo gi amulu.
9 Keli muminin al maa indu haja kun murtahin ashan Rabuna arufa umon fok. 10 Wa muminin al ganiyanin kaman keli kun murtahin ashan Rabuna nezilu umon tehet. Nas al ganiyanin bi mutu ze zuhur. 11 Shemis gi tala ma harara sukun wa gi nasifu zuhur. Zuhur de bi waga, wa giyafa taumon bi kalasu.†1:11 Ainu Ishaya 40:6-7 Be nefsa teriga, zol al ganiyan bi mutu gubal uwo lisa maa kalasu shokol bitou.
12 Zol al indu sobur fi zaman ta taab, uwo mubarak. Kan uwo wogif gowi, uwo bi ligo taj ta haya al abadiya al Rabuna waado le nas al hibu uwo.
13 Kan tejiriba gi amulu zol, keli uwo maa kelimu gali, “Rabuna yau gi jeribu ana,” leanu Rabuna maa bi waga fi tejiriba, wa uwo maa bi kutu zol ashan waga fi tejiriba. 14 Lakin tejiriba gi ja le zol min niyat tou, al bi kabasu uwo wa shilu uwo beyid. 15 Kan niyat batal de dakalu fi geliba tou, uwo bi waga fi katiya. Wa kan uwo istemir fi katiya de, bi jibu le uwo mutu.
16 Ya akwana wa ikwat tai, al ana hibu, keli zol tani maa kabasu itakum. 17 Kulu hadiya al kweis wa tamam gi ja min Rabuna, Abu al kalagu anwar ta sama. Uwo maa ze dul al gi geiru. 18 Min irada tou, uwo wodi le nina haya be wasat kilima al hagiga, ashan nina bi kun le Rabuna ze samar al awal min kulu hajat al uwo kalagu.
Asuma kalam wa amulu
19 Ya akwana wa ikwat tai al ana hibu, zekiru takum kalam de. Ay zol keli asuma kalam guwam, wa maa kun mustajil ashan bi wonusu, wa keli maa zalan guwam, 20 leanu shokol zalan ta insan maa bi jibu haya al dukuri al Rabuna deiru. 21 Ashan kida, sibu takum haya al wasaka kulu wa ay no ta hajat al batal. Rudu kilima al Rabuna zara fogo itakum ma geliba al birah. Kilima de indu guwa ashan kalisu itakum.
22 Ashan kida, kutu takum kilima de fi shokol. Matakum asuma ma adana bes. Kan maa zede, itakum gi kabasu badun. 23 Ay zol al gi asuma kilima de wa maa gi kutu fi shokol, uwo ze zol al gi ainu wusa tou fi miraya, 24 wa uwo ligo muskila fii, lakin uwo maa hilu. Uwo tawali wasa min miraya, wa uwo nesitu muskila de kaan shunu. 25 Lakin zol al gi ainu tamam fi ganun ta Rabuna, wa maa gi asuma ma adana bes, lakin gi kutu fi shokol, kan uwo istemir amulu kida, uwo bi ligo baraka fi shokol al uwo gi amulu de. Ashan ganun ta Rabuna kamil wa gi jibu huriya.
26 Ay zol al gi fekiru gali uwo gi kadim le Rabuna wa maa gi hafizu lisan tou, uwo gi kabasu nefsa bitou, wa kidma tou de maa indu faida. 27 Shokol al nedif wa hagiga gidam Rabuna Abu bita nina yau: Wodi musada le atimin wa aramil fi wokit al umon fi taab, wa hafizu nefsa min haya al wasaka ta duniya.