15
Saulalu Tjana Ama-likakunu Tjuṯa Pungkula Wiyantja
1-3 Ka ngula Samueltu pitjala wangkangu Saulala, “Mayatja Godalu ngayunya ngaṉmanytju iyaṉu nyuntunya mayatja puḻka ngurkantaṟa tjunkunytjaku aṉangu Israelkunu tjuṯa aṯunymaṟa kanyintjaku. Ka kulila palumpa tjukurpa. Nyanga alatji paluṟu wangkanyi,
‘Iriti panyaya Israelkunu tjuṯaya ngalya-pakaṉu Itjipalanguṟu ngura Kainanku ankunytjikitja. Ka panya wati Ama-likakunu tjuṯangku tjananya angatjunangi Kainantakutu ankunyangka. Ka ngayulu nyangu tjananya alatjingannyangka munuṉa kuwari nyuranya iyaṉi ankula pikangku tjananya pungkunytjaku munu tjanampa uwankara wiyantjaku. Kutjupa wanka nyinanytjaku wantinytja wiyangku uwankara iluntaṟa wiyala wati, minyma, tjitji, munu puluka, tjiipi, munu tangkiyi, kamula kuḻukuḻu.’ ”
Alatji Samueltu wangkangu Saulala.
4-9 Ka Saulalu mulapa palumpa tjaultji tjuṯa aḻṯingu munuya tjunguringkula anu Ama-likakunu tjuṯaku ngurakutu. Munuya aṉangu tjuṯa pungkula waṉaningi munu tjananya uwankara iluntanu aṉangu panya Ama-likakunu tjuṯa. Palu Saulalu tjanampa mayatja iluntankunytja wiyangku wanka wantingi. Munu tjiipi, puluka, kaṉpi puḻka tjuṯa kuḻu iluntankunytja wiyangku wantingu munuya nyurka-nyurka tjuṯa kutju iluntanu.
Godalu Saulanya Wantinytja
10-12 Ka palula maḻangka Godalu Samuelta nyanga alatji wangkangu, “Saulalu ngayula kulintja wiyangku tungunpungu. Ka ngayulu puḻkaṟa tjituṟu-tjituṟuringu panya ngayulu palunya mayatja puḻka tjukaṟuru nyinanytjaku ngurkantanu. Ka paluṟu ngayuku tjukurpa kulintja wiya alatjiṯu.”
Ka Samuelnga kuliṟa unngu mirpaṉaringi Saulalanguṟu munu paluṟu ulara Mayatja Godala tjapiningi mungangka rawangku. Munu mungawinki pakaṟa anu Saulanya ngurintjikitja. Ka aṉangu kutjupangku palula wangkangu, “Wiya, Saulanya anu ngura Kaamultakutu. Munu kunyu nyara palula pitjilpa palyaṉu palumpa ruurutjara aṉangu maḻatja tjuṯangku nyakula palunya ruurungku kulintjaku. Munu kunyu palula maḻangka anu ngura Kilkaltakutu.”
13-15 Ka Samuelnga ankula wirkanu Saulala. Ka Saulalu wangkangu, “Mayatja Godalu nyuntunya pukuḻmanama. Ngayulu panya Godalu wangkanyangka wangaṉarangku kulinu.”
Palu Samueltu palula wangkangu, “Kaṉa nyangatja nyaaku kuwari kulini tjiipi munu puluka tjuṯa wangkara waṉinyangka.”
Ka Saulalu ngapartji wangkangu, “Wiya, ngayuku tjaultji tjuṯangkuya tjiipi munu puluka kaṉpi puḻka tjuṯa ngurkantaṟa ngalya-katingu Ama-likakunu tjuṯaku nguranguṟu. Panya tjana kuka nyanga palunya tjananya pungkula ungkula Godanya waḻkuntjikitja mukuringanyi. Palu kutjupa tjuṯala pungkula wiyaṉu.”
16-19 Ka Samueltu Saulanya wangkangu, “Wiyariwa munu kulila ngayulu nyuntula wangkanyangka panya Godaluṉi ngayula wangkangu mungangka.”
Ka Saulalu wangkangu, “Uwa, tjakultjuraṉi.”
Ka Samueltu palula wangkangu, “Panya ngaṉmanytjun nyuntu walytjangku ngaḻṯutjara kuliṟa ngaḻṯuringangi. Palu Godalu nyuntunya ngurkantanu Israelku mayatja puḻka nyinanytjaku. Munu panya paluṟu nyuntunya wituṉu ankula aṉangu nyara mamutjara tjuṯa iluntara wiyantjaku Ama-likakunu tjuṯa. Paluṟunta wangkangu tjananya uwankara alatjiṯu iluntara wiyantjaku tjanampa kuka tjuṯa kuḻukuḻu. Kan panyatja nyaaku nyuntu Mayatja Godanya kulilwiyangku wantingi? Nyaaku nyuntu tjanampa kuka wiṟu tjuṯa katingu iluntaṟa wantinytja wiyangku?”
20-23 Ka Saulalu wangkangu, “Palu ngayulu Godala kuliningi. Munuṉa paluṟu wangkanytja palyaṉu. Panya aṉangu Ama-likakunu tjuṯaṉa iluntanu munuṉa tjanampa mayatja puḻka kutju wanka ngalya-katingu iluntankunytja wiyangku. Kaya tjaultji tjuṯangku kuka, puluka, tjiipi wiṟu kaṉpi puḻka tjuṯa kuḻukuḻu ngalya-katingu ngula pungkula pitjilta katu waṟungka tjunkula Godanya ungkula waḻkuntjikitjangku.”
Palu Samueltu ngapartji wangkangu, “Wiya kulila, nyaaku Godanya puḻkaṟa pukuḻaripai? — kuka waṟungka kutjantjitjaku, munta palunya wangaṉarangku kulintjitjaku? Uwa, Godanya mukuringanyi nyuntu palumpa mulamularingkula wangaṉarangku kuliṟa palyantjaku paluṟu wangkanyangka. Nyanga palulanguṟu paluṟu puḻkaṟa mulapa pukuḻaripai munu panya kuka wiṟu tjuṯa ungkunyangka maḻa kutju kuliṟa tjukutjuku pukuḻaripai.
“Panya nyuntu Godala wangaṉarangku kulilwiyangku wantirampa kura puḻkaringu wati panya kaṉany-kaṉanytju god ngalypa-ngalypa waḻkulpai puṟunypa. Nyuntu panya Godala kulintja wiyangku wantingu palumpa tjukurpa paluṟu wangkanytja. Palulanguṟu paluṟu kuwari ngapartji nyuntunya wantinyi mayatja puḻka nyinanytjaku wiya.”
24-26 Ka Saulalu Samuelta wangkangu, “Munta, mulapa ngayulu kura palyaṉu, munuṉa ngayulu Godaku tjukurpa kuliṟa wantingu. Munuṉa nyuntu wangkanyangka palyantja wiyaṯu. Panya ngayulu aṉangu tjuṯaku nguḻuringangi munuṉa tjana wangkanyangka kutju palyaningi. Munuṉa kuwari nyuntula ngatjini ngayunya kura nyanga palyantjitjanguṟu kalypangku wantinytjaku. Wanyu pitja ngayula tjungu Kilkaltakutu, munuli Godanya waḻkula tjungungku nyuntu ngali.”
Palu Samueltu wangkangu Saulala, “Wiya, ngayulu nyuntula ankunytja wiya, panya nyuntu Godaku tjukurpa kulintja wiyangku wantingu. Ka kuwari paluṟu ngapartji nyuntunya mayatja puḻka Israelku nyinanytjaku wiyaṉi.”
27-31 Ka Samuelnga para-maḻakukutuṉu ankunytjikitja. Ka Saulalu palumpa mantara witinu, ka tjilpiraraṉu. Ka Samueltu wangkangu palula, “Mayatja Godalu nyuntu panya mayatja puḻka nyinanytja wiyaṉu, munu wati kutjupa ngurkantanu nyuntumpa aṟangka mayatjarira tjukaṟuru nyinanytjaku. Godanya panya mayatja puḻka mulapa, rawa nyinapai wiyaringkunytja wiya. Paluṟu ngunti wangkapai wiya. Paluṟu aṉangu mantatja puṟunypa wiya, munu paluṟu palumpa kulintja kampa kutjupankupai wiya.”
Ka Saulalu ngapartji wangkangu, “Mulapa ngayulu kura palyaṉu. Palu wanyuṉi maḻaku pitja ngayula tjungu kali tjungungku Godanya waḻkunma aṉangu tjiḻpi waraṟitja tjuṯangka miṟangka munu aṉangu Israelkunu tjuṯangka miṟangka kuḻu. Kaya nyakula ngayunya palya kulilku.” Alatji Saulalu wangkangu Samuelta. Ka paluṟu mulapaṯu maḻaku anu palula tjungu munu pula Godanya waḻkuṉu aṉangu tjuṯangka miṟangka.
32-35 Ka palulanguṟu Samueltu wangkangu, “Ngalya-kati wanyu wati panya Ama-likakunu tjuṯaku mayatja puḻka.” Ka mulapaṯu paluṟu pitjangu Samueltakutu puḻkaṟa tjititingkula kuliṟa, “Mulapantiṉatju kuwari iluku.” Ka Samueltu palula wangkangu, “Panya nyuntu tjuḻa puḻkangka aṉangu tjuṯa pungkula iluntanu, kaya minyma ngunytju tjuṯa tjituṟu-tjituṟuringu. Ka nyara palu puṟunypa kuwari nyuntumpa ngunytju ngapartji tjituṟu-tjituṟuriku.” Munu palulanguṟu Samueltu mayatja panya palunya kaṯaṟa muṯun-muṯunmanu.
Munu palulanguṟu Samuelnga anu ngura ini Raamalakutu. Ka Saulanya anu palumpa ngurakutu. Ka Samueltu palunya piṟuku nyakunytja wiya alatjiṯu nyinara tjiḻpiringu. Ka Godanya puḻkaṟa tjituṟu-tjituṟuringu Saulaku, panya paluṟu ngaṉmanytju palunya Israelku mayatja puḻka tjukaṟuru nyinanytjaku ngurkantaṟa tjunu, palu paluṟu Godala tungunpungu.