21
Davidanya Saulalanguṟu Nguḻu Wirtjapakantja
Ka Davidanya anu tawunu ini Napalakutu wati tjukurtjara ini Aima-likinya nyakunytjikitja. Ka wati paluṟu Davidanya nyakula puḻkaṟa alatjiṯu tjititingu munu nguḻungku tjapiṟa wangkangu, “Nyaakun kutju pitjangu?”
Ka Davidalu ngunti wangkangu alatji, “Wati mayatja Saulaluṉi wangkangu kutjupa kutjupa wiṟu palyantjaku, munuṉi alatji wangkara wituṉu, ‘Kutjupangka wangkanytja wiyangku wantima ngayulu nyanga nyuntunya iyantjikitjangku wangkanytja.’ Kaṉa ngayulu ngayuku wati tjuṯa kuranyungku iyaṉu ngura kutjupangka ngayunya nyakunytjaku.” Munu Davidalu tjapinu wati panya Aima-likinya, “Main kanyini ngayunya ungkunytjikitjangku? Wanyuṉi mai kutjara maṉkurpa ungama?”
Ka wati panya tjukurtjarangku wangkangu, “Mai kutjupaṉa kanyintja wiya, palu mai nyanga miḻmiḻpa kutjuṉa kanyini wati panya kungkangka ngaripai wiya tjuṯangku kutju ngalkuntjaku.”
Ka Davidalu palula wangkangu, “Wiya nganaṉa tjaultji tjuṯa tjungu para-ngaṟala kungkangka ngaripai wiya. Munula kuwari nyanga ananyi kutjupa kutjupa wiṟu palyantjikitja, palulanguṟula kungkangka tjunguringkula ngarinytja wiya alatjiṯu.”
Ka wati panya tjukurtjarangkulta mai panya miḻmiḻpa tinta miḻmiḻpanguṟu mantjiṟa Davidanyalta ungu munu mai kuwari pauntja tjunu palumpa aṟangka.
Ka tjiṉṯu nyara palulaṯu Saulaku tjiipi aṯunymankupai ngura nyara palula nyinangi wati ini Tuwikanya panya Iitamakunu. Paluṟu tiinta miḻmiḻṯa tjarpara Godanya waḻkuningi.
Ka Davidalu wati panya tjukurtjarangka tjapiningi, “Tjula waṟan kanyini? Munta tjinguṟu tjula waṟa wiyangkampaṉi kuḻaṯa kanyintjatjanungku ungama. Panya mayatja Saulalu ngayunya witunnyangkaṉa mapalku pitjangu tjula wantikatira.”
Ka wati panya tjukurtjarangku wangkangu, “Tjula panya nyuntu mungaṯu wati Kalaitjanya iluntankunytjitja mantarangka karpintja ngarinyi nyara kampa kutjupa tjukurtjaraku mantarangka itingka. Ka mukuringkulampa palya mantjiṟa kati.”
Ka Davidalu wangkangu alatji, “Munta, tjula nyara paluṟu wiṟu mulapa! Wanti, kaṉatju kati!”
Davidanya Ngura Ini Kaatjalakutu Ankunytja
10 Munu tjiṉṯu nyara palula Davidanya kumpiṟa wirtjapakaṉu Saulaku nguḻu munu ankula ankula manta Pilitjiyala ma-wirkanulta wati mayatja ini Akitjalakutu tawunu ini Kaatjala nyinanyangka.
11 Palu mayatja Akitjaku waṟkaripai tjuṯangku palunya nyakula tjanampa mayatjangka wangkangu, “Wati nyanga paluṟu panya Davidanya. Paluṟu panya mayatja puṟunypa nyinapai ngura palumpangka, kaya aṉangu tjuṯangku inma inkara nyaṉpipai nyanga alatji palunya mirawaṉira,
‘Saulalu warmaḻa tjuṯa iluntanu nampa nyangatja 1,000,
palu Davidalu iluntanu tjuṯa mulapa palula munkara nampa nyangatja 10,000!’ ”
12 Ka Davidalu kulinu tjana kampangkaṯu wangkanyangka munu nguḻuringu wati panya Akitjaku palunya iluntankunytjaku-tawara. 13 Munu paluṟu tjananya ngunti kuraningi kawakawangku-palku munu panya tawunuku kaita tuwa piriningi munu paluṟu tjaanguṟu wiṯa tjuti-tjutingi ngaṉkurpawanu.
14 Ka wati panya Akitjalu nyakula tjaultjiku mayatja tjuṯangka wangkangu, “Nyawaya! Wati pala kata kawakawa. Nyaaku nyura ngalya-katingu? 15 Ngura nyangangkaya kawakawa ngaṉmanyitja tjuṯa nyinanyi, kaṉa mukuringkunytja wiya kutjupalpi piṟuku ngalya-katira tjunguntjaku nyanga ngayuku waḻingka.”