25
Samuelnga Tjiḻpiringkula Wiyaringkunytja
1 Uwa, ka nyara palula aṟangka wangkatjara wati Samuelnga tjiḻpi mulararingu munu wiyaringu. Kaya aṉangu Israelkunu uwankara tjituṟu-tjituṟurira pitjangu ngura panya Raamalakutu tjunguringkula nyinanytjikitja. Raamanya panya Samuelku ngura kaya palunya ngura walytjangka tjuṉutjunu. Ka palula maḻangka Davidanya ilytjikutu anu ngura ini Mayantakutu ngura tjunkula nyinanytjikitja.
Minyma Ini Apikailtu Davidanya Alpamilantja
2-3 Ka ngura nyara Mayanta wati kutjupa mani puḻkatjara nyinangi ini Napalnga tawunungka itingka Kaamulta. Paluṟu panya wati Calebakunu, munu manta nyara palula tjiipi 3,000 aṯunymaṟa kanyilpai, nanikuta 1,000 kuḻu tjunguṟa. Ka kuri palumpa ini Apikailnga, kungkawaṟa wiṟu mulapa nintipuka alatjiṯu. Palu Napalnga panya wati pikaṯi mulapa munu ngaḻṯunytju wiya alatjiṯu.
Ka nyara palula aṟangka palumpa waṟka tjuṯangku palumpa tjiipi tjuṯa tjiiṟamilaningi ngura nyara palumpangka Kaamulta. 4 Ka Davidnya ilytjingka nyinangi munu kulinu tjana tjiipi tjiiṟamilannyangka. 5-6 Munu paluṟu wati yangupala 10-pa wituṟa iyaṉu, “Araya ngura nyara Kaamultakutu munuya Napalta ma-wangka ngayulu nyanga wangkanytja alatji,
‘Wiṟu ngana! Palya nyura nyinanyi pukuḻpa? 7 Mayatja nganampangku nyuranya kulinu tjiipi tjuṯa tjiiṟamilannyangka, mununku paluṟu mukuringanyi nyuntu nyanga alatji kulintjaku, panya mungaṯula ngura nyangangka nyinangi, nyuntumpa waṟka tjuṯangku tjiipi tjuṯa kanyinnyangka, munula tjananya kurantja wiyangku wantingi, kaya palya alatjiṯu nyinangi. Munu panyala nyuntumpa kutjupa kutjupa tjuṯa kutitjunkunytja wiyangku alatjiṯu wantingi. 8 Wanyu tjanala tjapata pala tjuṯangka tjapila, kantaya tjukaṟurungku wangkaku.
‘Kalampa wanyu ngaḻṯuringama. Nyangatjala kuwari pitjangu mai puḻka ngalkunnyangka ngatjintjikitja. Wanyuya nganampa mayatjaku ngaḻṯuringama nyuntumpa panya maḻpaku, Davidaku, munulanya mai ungkul'iyala panya nganaṉala uwankara walytjaṟara walytjaṟara.’
Alatjiya ankula ma-wangka wati panya Napalta.”
Alatji Davidalu tjanala wangkara wituṟa iyaṉu wati panya yangupala 10-pangka.
9 Kaya mulapaṯu ankula palula ma-tjakultjunu wati panya Napalta, munuya palula wangkara wiyaringkula paṯaṟa ngaṟangi.
10 Palu Napaltu tjananya waṟu-waṟungku mirpaṉarira kuraṟa warkingu wati panya tjuṯa, “Wampa! Davida yaalitja nyura wangkanyi? Ngayuluṉa palumpa ngurpa alatjiṯu, kulintja wiyatja. Nyaaku nyarangku wanyu wati puḻkangku-palku kaṉany-kaṉanytju nyinara wangkanyi? Wiya, paluṟu tjinguṟu palumpa mayatjanguṟu nguḻu wirtjapakantjatjanungku wangkanyi. Panya waṟka tjuṯaya mayatja tjuṯanguṟu kumpiṟa wirtjapakalpai, ka tjinguṟu paluṟu palu puṟunypaṯu. 11 Kulilaya, mai kuka nyangatja nganampa kutju pauṉu ngayuku munu waṟka tjuṯaku kutju, palu Davidanya nyuranyaṉa ungkunytja wiya alatjiṯu.”
12 Kaya wati panya yangupala 10-pa ngurakutu maḻaku anu munuya Davidala tjakultjunu wati panya Napaltu wangkanytja uwankara. 13 Ka Davidalu palumpa panya tjaultji uwankarangka wangkangu, “Ala! Tjuḻaya mantjila!” Kaya mulapaṯu mantjinu, ka paluṟu tjula mantjinuṯu. Kaya tjaultji paluṟu tjana ritiringkula Davidala tjungu anu pikakitja nampa nyanganpa 400, palu tjaultji 200 kutjupa-tjaraya nyinangi maḻaringkula ngura anga-kanyintjikitja.
14 Palu Napalku wati waṟka kutju anu Apikailtakutu, palumpa panya kurikutu, munu palula alatji wangkangu, “Kulinun? Panya Davidalu wati yangupala 10-pa wituṟa iyaṉu nyuntumpa kurikutu, kaya palulakutu pitjala wiṟuṟa wangkangi, palu nyuntumpa kuringku tjananya kuraṟa waṟu-waṟungku warkira paiṟa iyaṉu mai munu kuka ungkunytja wiyangku. 15 Kala nganaṉa nyakula tjituṟu-tjituṟuringu palumpa tjanampa. Tjana wati wiṟu tjuṯa ngaḻṯunytju, munulanya kuraṟa pungkupai wiya, panya tjana mukulyangku nganaṉanya aṯunymaṟa kanyilpai kutjupa tjuṯangku tjulyaṟa katinytjaku-tawara. 16 Paluṟu tjana mungangka kaḻaḻa kuḻu nganaṉala itingka para-ngaṟapai, munulanya aṯunymankupai wiṟuṟa wankaṟu nyinanytjaku. 17 Palu kuwari nyuntumpa kuringku Davidanya tjananya warkingu, wati panya palumpa tjaultji tjuṯa kuḻu, munu mai kuka ungkuwiyangku wantingi, kaya maṟalpa anu, ngaḻṯutjara. Ka nyanga palulanguṟu Davidalu tjinguṟu nganampa taṟapula palyalku, nyuntumpa walytja uwankaraku kuḻu. Panya nyuntumpa kuri wati mirpaṉtju alatjiṯu, kutjupangka kulilpai wiya. Ka wanyu nyuntu purkaṟangku kulinma, munu Davidaku tjanampa wiṟu palyala, pitjala nganaṉanya pungkunytjaku-tawara.” Alatji wati Napalku waṟkangku wangkangu.
18 Ka Napalku kuringku tjukurpa nyangatja kuliṟa mapalkungku kulinu Davidala tjanalakutu mai kuka katinytjikitjangku, munu paluṟu mai nyuma 200 tjunu munu piti puḻka kutjarangka waina tjutinu, munu kuka tjiipi 5 ngaṉmanytju pauṟa uṉmi tjunu, munu yakutja puḻkangka mai wiita tjutinu, munu raitjinpa kapuṯuṟa puḻka tjunu munu mai nyuma 200 ilinguṟu palyantja kuḻu tjunu. Munu mai nyanga uwankara utuluṟa katinytjikitjangku tangkiyi tjuṯangka utitjunu. 19 Munu palulanguṟu Apikailtu palumpa waṟkaripai tjuṯangka aḻṯira wangkangu, “Nyura-waraṟa kuranyuri mai pala tjuṯatjara, kaṉa ngayulu nyurala maḻangkaṯu anama ngayuku tangkiyingka.” Palu paluṟu palyantja uwankara palumpa kuringka wangkawiyangku wantingi.
20 Munu paluṟu tangkiyingka tatiṟa ma-pakaṉu, munu puḻi nguṟurwanu anangi. Munu ankula ankula para-arintaṟa nyangu Davidanya wati tjuṯatjara iwara kutju palulaṯu ngalya-wirkankunyangka.
21 Palu paluṟu pulanku nyakunytja kuwaripangka Davidalu palumpa tjungutja tjuṯangka mirpaṉ-mirpaṉṯu wangkakatingi wati Napalngatjara alatji wangkara, “Panya palumpa wati waṟkaripai tjuṯala wiṟuṟa aṯunymanangi, palumpa tjiipi nanikuta tjuṯa kuḻu, kutjupangku tjulyantjaku-tawara. Mulapaṉatju ngayulu palunya tjananya wiṟuṟa aṯunymanangi, kaṉitju nyaanguṟu paluṟu kuraṟa pungangi? 22 Palyaṉa palunya kuwari tjiṉṯu pakantja kuwaripangka iluntankuku, palumpa katja tjuṯa munu wati waṟkaripai uwankara kuḻu. Palu wiyangkampa Godaluṉi ngayunya palya iluntankuku.” Nyanga alatji paluṟu wangkakatingi Davidalu, Apikailnga wirkankunytja kuwaripangka.
23 Ka Apikailtu Davidanya nyakula mapalku tangkiyinguṟu panya ukalingkula tultjungaṟakatingu Davidala tjinangka, munu yunpangku manta pampuṉu. 24 Munu palula wangkangi, “Ngayukun mayatja! Wanyuṉitju ngayunya kulinma, munutju ngayuku kuringku palyantjitjanguṟu ngayunya ngukanma. 25 Wiṟu ngana, ngayuku kuri Napalnga panya tjaka wati mirpaṉtju alatjiṯu, ka paluṟu panya wangkanytja kuliṟa wantima. Panya paluṟu tjakangku kura kutju wangkapai munu tjukaṟurungku kulilpai wiya. Wanyu kulila mayatja! Panya nyuntun wati 10-pa ngayuku kurikutu wituṟa iyaṉu maiku ngatjintjaku, palu ngayuluṉa palunya tjananya nyakunytja wiyaṯu pitjanyangka.
26-27 “Palu Mayatja, kuwariṉanku mai puḻka mulapa ngalya-katingu. Wanyu tjananya mantjiṟa uwa, nyuntumpa tjaultji tjuṯa. Panya Mayatja Godalunta kuwari markuṉi wati nyara tjuṯa pungkula iluntankunytjaku-tawara. Munu nyuntunya kurannyangka ngayuku kuri kuwari pungkuku, kaṉa ngayulu mukuringanyi paluṟu nyuntumpa mirpaṉtju tjuṯa kuḻu palu puṟunypaṯu pungkunytjaku. Uwa, Mayatja Godala miṟangkaṉa nyangatja mulamulangku wangkanyi, nyuntula miṟangka kuḻu.
28 “Wati ngana, mayatja wiṟu, ngaḻṯuriwatju! Munuṉitju kura ngayulu palyantjitjanguṟu pungkuwiyangku wantima kalypangku. Ngayulu kulini panya ngulanta Mayatja Godalu Israelku mayatjarinytjaku tjunkuku, panya nyuntun Mayatja Godaku mirpaṉtju tjuṯa pikaringkula pungkupai alatjiṯu. Kaya nyuntumpa katja munu pakaḻipiṯi maḻatja maḻatja palu puṟunypaṯu nyuntumpa aṟangka Israelku mayatjarira nyinara waṉalku. Kaṉa nyuntumpa Godala tjapini nyuntunya tiṯutjarangku tjukaṟuru kanyintjaku kura palyantjaku-tawara. 29 Ka nyuntumpa mirpaṉtju tjuṯangku nyuntunya iluntankunytjikitjangku nyakunyangka Mayatja Godalu nyuntunya wankaṟu kanyilku, munu tjananya mapalku iluntankuku, panya watingku tjangayangka puḻi tjunkula atulpai, palu puṟunypa tjananya mapalku wiyalku.
30-31 “Mayatja Godalu panyanta tjuṯa-aṟangku kalkuṉu Israelku mayatja tjunkunytjikitjangku. Paluṟu panya kalkuntjatjanungku palyalku alatjiṯu. Aṟa panyatja kulila, nyuntu panyan mirpaṉarira aṉangu palya tjuṯa iluntankunytjikitjangku kuliningi. Palu kuwarin iluntankunytjaku wiya nguwanpa ngaṟanyi, kan nyara palulanguṟulta miriputju wiyaringkuku. Uwa, ka Mayatja Godalu uwankara wiṟu tjuṯa nyuntumpa palyaṟa wiyannyangka, wanyuṉi kulinma watarkuriwiyangku, nyuntumpa panya waṟkaripai.”
32 Ka minyma panya Apikailta Davidalu alatji wangkangu, “Uwa, kuwariṉa Mayatja Godaku puḻkaṟa pukuḻarinyi panya paluṟunta ngayulakutu iyaṉu wangkanytjaku. 33 Ngayulu mukuringanyi nyuntunya Godalu pukuḻmankunytjaku panya nyuntun minyma nintipuka mulapa. Kuwari panyan ngayula tjukurpa wiṟu wangkangi ngayulu kuliṟa tjukaṟurungku palyantjaku kaṉa mulamularinganyi tjukurpa wiṟu kutju kuliṟa. Palulanguṟuṉa Napalnga tjananya pungkuwiyangku wantiku palumpa walytjapiti tjuṯa munu palumpa waṟkaripai tjuṯa kuḻu. 34 Uwa mulapaṉi Mayatja Godalu markuṉu Israelku panya Mayatjangku aṉangu tjuṯa pungkuwiyangku wantinytjaku nyuntunya kuḻu. Tjinguṟuṉa mulapa Napalnga tjananya iluntanama palumpa wati uwankara kuḻu, palu nyuntu-waraṟan mapalku wirkanu ngayulakutu wimaṟu nyangaku.”
35 Munu Davidanya alatji wangkanytjatjanu puḻkaṟa pukuḻaringu, munu Apikailtanguṟu mai mantjiṟa palula wangkangu, “Kulinuṉa nyuntumpa tjukurpa, munuṉanta kuwari nyanga nyuntula wangkanyi kalypangku pungkuwiyangku wantinytjikitjangku. Ka palyalta ma-pitja ngurakutu pukuḻpa nguḻuringkunytja wiya.”
36 Palula maḻangka minyma panya paluṟu maḻaku anu ngurakutu, munu ma-wirkaṟa nyangu palumpa panya kuringku Napaltu mai puḻka palumpa waṟka tjuṯaku palyannyangka. Palu wati panya paluṟu taṟangka puḻka, pukuḻpa mulapa nyinangi, ka Apikailtu wantingi taṟangka nyakula palula tjakultjunkunytja wiyangku Davidaku tjanampa mai katinytjatjanungku. 37 Ka mungawinki wati panya Napalnga taṟangka ngarira wiyaringkunyangka Apikailtu palula wangkangu alatji, “Mungartjiṉa Davidaku tjanampa mai katingu palumpa wati tjuṯaku kuḻu, munuli wangkangi, ka Davidalu mai ngayulu ungkunytja mantjinu, munuṉi paluṟu wangkangu pukuḻpa ankunytjaku ngurakutu.” Alatji paluṟu uwankara utingku tjakultjunu palumpa kuringka. Ka wati panya paluṟu kuliṟa mapalku kuṯuṯu tuu-tuukatira ngaṟakatingu munu punkaṟa tiwilpa ngaringi. 38 Ka tjiṉṯu 10-pa ngaṟala wiyaringkunyangka maḻangka Mayatja Godalu wantir'iyaṉu wati panya Napalnga ilunytjaku.
39-40 Ka Davidalu kulinu Napalnga ilunytja munu wangkangu, “Wati nyara paluṟu Napaltu kura tjuṯa palyaningi aṉangu tjuṯaku, ka kuwari Mayatja Godalu palunya wiyaṉu. Kaṉa kuwari pukuḻpa nyinanyi, panya paluṟuṉi markuṉu palunya tjananya iluntankunytjikitjangku wangkanyangka. Uwa, Mayatja God, mirawaṉinyiṉanta, panya nyuntun Napalnga wiyaṉu ngayunya kurannyangka.”
Ka minyma panya Apikailnga wanakaḻarira ngura aṟangkaṯu nyinangi Kaamulta. Ka Davidalu wati maṉkurpa wituṟa iyaṉu minyma panya palula ankula tjapintjaku, kaya mulapaṯu wirkaṟa palula tjapinu alatji, “Davidanyanku mukuringanyi nyupali tjunguringkula nyinanytjikitja kuriṟara.”
41 Ka minyma panya Apikailnga tultjungaṟakatingu munu yunpangku manta pampuṉu, munu Davidaku panya waṟka maṉkurta wangkangu, “Uwa, pukuḻarinyiṉa paluṟu ngayunya aḻṯinytjaku, munuṉa pukuḻarinyiṯu waṟka palumpa palyantjikitja, palumpa waṟka tjuṯa kuḻu tjina paltjintjikitja.” 42 Munu wangkanytjatjanu mapalku tatinu tangkiyingka, munu palumpa kungkawaṟa waṟka 5 aḻṯira tjunguringkulaya anu wati panya Davidaku waṟka maṉkurta. Ka tjana wirkankunyangka Davidalu kungka panya palunya aḻṯingu.
43 Ngaṉmanytju paluṟu kungkawaṟa kutjupa aḻṯira kanyiningi ini Aki-nuwamanya ngura nyara Tjitjiṟiltanguṟu, munu palulanguṟu Apikailnga aḻṯingu munu pulanya kutjaraṟa kanyiningi. 44 Panya ngaṉmanytju mayatja Saulalu palumpa uṉṯalpa ini Mikaalanya ungu Davidalu kuringku aḻṯira kanyintjaku. Palu maḻangka Saulalu Davidaku kuraringkula uṉṯalpa palumpa tjulyaṟa wati kutjupa ungu ini panya Paltiyilnga. Wati nyara paluṟu panya wati ini Layitjiku katja ngura ini Kalimalanguṟu.