1-3 Ngaṉmanypa panya Samuelnga Israelta wanka nyinanyangkalpi aṉangu kutjupa tjarangku miri ilunytja tjuṯangka kurunta wangkapai Godala tungunpungkula,*Aṉangu tjuṯangkuya arkaṟa miriku kurunta wangkapai, ka kuliṟa tjananya ngapartji ngalya-wangkapai. Kaya tjapilpai, “Ngula ngayulu nyaaringkuku?” Ka paluṟu tjanala tjakultjunkupai, “Nyuntu ngula alatjiriku.” Palu nyanga alatji palyantjaku Godalu paiṉu. Nyawa Deuteronomy 18:10-12. ka tjananya Saulalu Israeltanguṟu paiṟa iyaṉu.

Ka palulanguṟulta ngula Samuelnga ilungu, kaya Israelkunu tjuṯa tjituṟu-tjituṟurira puḻkaṟa ulangi munuya palunya ngura walytjangka tjuṉutjunu tawunu ini Raamala.

Ka tjiṉṯu kutjupa Pilitjiyanya nguraṟa tjuṯa pitjangu pika pungkunytjikitja Israelkunu tjuṯa. Ka Pilitjiyaku mayatjangku Akitjalu Davidala wangkangu, “Nyuntu munu nyuntumpa wati tjuṯa kuḻu uti ngayula tjunguringama Israelkunu tjuṯa pungkunytjikitja.”

Ka Davidalu ngunti palula uwanmanu alatji wangkara, “Uwa, palya, nganaṉala tjunguringanyi, kan nyakukulta nganaṉa tjananya puḻkaṟa pungkunyangka.”

Ka Akitjalu Davidala wangkangu, “Palu nyura tiṯutjara ngayula tjungu para-ngaṟama, munuṉitjuya puḻkaṟa aṯunymanama, palya?”

4 Kaya Pilitjiyanya nguraṟa tjuṯangku pitjala ila ngura tjunu tawunu ini Tjuninta. Ka Saulalu tjana Israelkunu tjuṯangku puḻi murpu ini Kilpawala itingka ngura tjunuṯu. 5 Munu Saulalu Pilitjiyanya nguraṟa wati warmaḻa tjuṯa nyakula puḻkaṟa nguḻuringu. 6 Munu Mayatja Godala tjapiningi, “Yaaltjirikulanku?” Palu Mayatjalu palula wangkanytja wiyangku alatjiṯu wantingi. Munu palu puṟunypaṯu tjukurmankunytja-wanungku kuḻu utintja wiyangku wantingi. Ka wati tjukurtjarangku arkaṟa puṉu ngurkantankupai kutjara waṉingu nyakunytjikitjangku, palu Godalu puṉu nyara palulawanungku kuḻu utintja wiyaṯu. Munu wati panya wangkatjara tjuṯangka kuḻu paluṟu tjukurpa wangkanytja wiya Saulala utiṟa tjakultjunkunytjaku. Paluṟu wantingi alatjiṯu. 7 Ka Saulalu wangkangu warmaḻa panya tjuṯaku mayatjangka, “Minyma kutjupa tjinguṟu palakutu nyinanyi miri ilunytja tjuṯangka kurunta wangkapai. Ankulaya nguriṟa ma-nyawa minyma nyara palunya munuṉiya pitjala tjakultjura, kaṉa palulakutu ankula tjapilku alatji, “Nyaaringkuku kuwari?” Ka paluṟu miri panya kurunta tjapiṟa ngayula wangkara utilku.”

Ka watingku palula wangkangu, “Tawunu ini Intula nyinanyi minyma pala palu puṟunypa miringka kurunta wangkapai.”

8 Kanku Saulalu nyangatja kuliṟa mantara mayatjaku araltjanu munu mantara kutjupangka tjarpangu aṉangu tjuṯangku mayatja nyakula ngurkantankunytjaku-tawara. Munu munga nyara palula Saulanya wati kutjaratjara anu minyma palunya nyakunytjikitja munu wirkaṟa wangkangu minymangka panya, “Ngayulu mukuringanyi nyuntu wati miri kurunpa aḻṯinytjaku. Kuwariṉanta ini nyuntula wangkaku, ka miri nyara palunya aḻṯira wangka. Palya?”

9 Ka minymangku panya Saulanya kuliningi wati kutjupa-palku. Munu palula wangkangu, “Nyuntun ninti kinga panya Saulaku? Panya paluṟu aṉangu miringka wangkapai tjuṯa paiṟa iyaṉu ngura Israeltanguṟu. Tjinguṟuṉitjun ngayunya ngunti kuraṉi iluntankunytjikitjangku.”

10 Ka Saulalu wangkangu alatji palula, “Wiya! Nganaṉa taṟapula palyantja wiya nyuntu wati miringka kurunta wangkanyangka. Mulamulangkuṉa wangkanyi Mayatja Godala miṟangka.”

11 Ka minymangku wangkangu, “Uwa palya. Palu miri kurunpa ngananyan wanyu wangkanyi ngayulu aḻṯira nyuntula kuranyu ngaṟatjunkunytjaku?”

Ka Saulalu wangkangu, “Samuelku kuruntaṉa wangkanytjikitja mukuringanyi.”

12 Ka minymangku Samuelku kurunpa aḻṯingu ngalya-pakantjaku. Ka mulapaṯu kurunpa panya utiringu, ka paluṟu nyakula puḻkaṟa mirangu munu Saulanya wangkangu, “Nyuntun ngayunya ngunti kuraṉu. Nyuntun Saulanya alatjiṯu! Kuwariṉin ngayunya iluntankuku?”

13 Ka Saulalu palula wangkangu, “Wiya, nguḻuringkunytja wiya rapa ngaṟama! Wanyuṉin tjakultjura nyaan nyangu?”

Ka minymangku panya wangkangu, “Wati kurunpa ngalya-pakannyangkaṉa nyangu manta unngunguṟu.”

14 Ka Saulalu tjapiningi, “Paluṟu wanyu nyaa puṟunypa?”

Ka minymangku wangkangu, “Paluṟu wati tjiḻpi kuuta waṟatjara.”

Ka Saulalu alatji kuliṟa kulinu, “Munta-uwa, palatja kurunpa Samuelku alatjiṯu.” Munu Saulalu tultjungaṟakatira yunpangku manta pampuṉu.

15 Ka Samueltu kuruntu Saulala wangkangu, “Nyaakuṉin kurulnguṟu nyanga aḻṯira pakaltjingaṉi nyuntula kuranyu ngaṟanytjaku?”

Ka Saulalu wangkangu, “Pilitjiyanya nguraṟa tjuṯaya nganampa pikaringanyi kaṉa puṯu kulini. Nyaalkuṉa? Panya Godaluṉi alpamilantja wiyangku wantir'iyaṉu. Palulaṉa tjapinu, kaṉitju wangkanytja wiya. Ngaṉmanypa panya paluṟu ngayulu tjapinnyangka utilpai alatjiṯu, palu kuwari nyanga wiya. Paluṟu wati wangkatjara ngayulakutu iyantja wiya palumpa aṟa utiṟa tjakultjunkunytjaku. Munuṉi tjukurmankunytja-wanungku kuḻu ngayula utiṟa tjakultjunkunytja wiya alatjiṯu. Kaṉanta nyuntunya kuwari pakaltjingaṉu ngayunya alpamilantjaku, ‘Nyaalkuṉa? Wiṟungkuṉi tjakultjura!’ ”

16 Ka Samueltu wangkangu palula, “Mayatja Godalunta wantikatingu munu kuwari nyanga paluṟu nyuntumpa mirpaṉtju nyinanyi. Kaṉi nyuntumpa palyantjaku ngayula tjapintja wiyangku wantima. 17 Panya Mayatja Godaluṉi ngaṉmanytju wangkangu wanka nyinanyangkalpi, ka panyaṉanta nyuntula tjakultjunu, ka paluṟu palyaṉi alatjiṯu kuwari ngaṉmanytju nyuntula wangkanytjatjanungku. Tjukaṟurungkuṉanta wangkanyi, panya paluṟunta kuwari wiyaṉi alatjiṯu Israelku Mayatja nyinanytjaku. Nyuntun wiyaringanyi, ka nyuntumpa aṟangka paluṟu Davidanya ngurkantaṟa tjunkuku. 18 Panyatjan kulini?1 Samuel 15. Panya Mayatja Godanya Ama-likakunu tjuṯaku puḻkaṟa mirpaṉaringi munu panyanta wangkangu tjananya uwankara pungkula wiyantjaku munu tjana kanyintjitja uwankara kuḻu kuraṟa wiyantjaku. Palu nyuntun palula tungunpungu munun kulintja wiyangku wantingu. Kanta pala palulanguṟu Mayatjalu nyanga alatji palyaṉi. 19 Munu Pilitjiyanya nguraṟa tjuṯa mungawinki pika pitjanyangka nyuranya alpamilantja wiyaringkuku, kaya nyurampa pikaringkula pungkula nyurala waintariku Israelkunu uwankarangka, ka nyuntu munu nyuntumpa katja tjuṯa kuḻu ilura ngayula tjunguringkuku miriku nyanga ngurangka.” Nyanga alatji Samueltu Saulala kuruntu wangkangu munu wangkara wiyaringkulalta arkayiringu.

20 Ka Saulalu tjukurpa nyangatja kuliṟa yunpanguṟu mantangka punkaṉu puḻkaṟa nguḻuringkula. Panya paluṟu uparingu kaḻaḻa mungangka kuḻu mai ngalkuntja wiyaṯu.

21 Ka minyma panya palulakutu ngalya-ilaringu munu nguḻuringkunyangka nyakula wangkangu, “Mayatja wiṟu, nyuntu panyaṉin wangkangu Samuelnga kurunpa pakaltjingantjaku. Kaṉanta kulinu wati kutjupangku-palku wangkanyangka, munu panyaṉa mulapaṯu pakaltjingaṉu palu walytjangkuṉatju kulintja wiyaṯu ilunytjikitjangku. 22 Ala, kulilaṉi! Munu mai ngalkula kuṉpuriwa maḻaku nguraku ankunytjikitja.”

23 Ka Saulalu wangkangu, “Wiya, wantinyiṉa ngalkuntja wiyangku.” Kaya minymangka tjunguringu Saulaku panya wati kuranyitja tjuṯa kuḻu, munuya rawangku palunya wituwituningi ngalkuntjaku. Ka Saulanya mantangka kuwaripaṯu rawa nguwanpa ngaringi upaṯu, munu kuliṟa kuliṟa mantanguṟu pakaṟa ma-maṟaṟa piitangka nyinakatingu.

24 Ka minymangku panya puluka kuḻunypa kaṉpi puḻka kanyintjatjanungku mapalku ankula iluntaṟa pauṉu mai tampa kuḻu. 25 Munu katira ungu Saulanya tjananya, kaya ngalkula paḻtjaringkula mungangkaṯu anu.