Wati Wangkatjarangku Aimatjalu Walkatjunkunytja
Amos
Nyangatja Ngaṉmanytju Nyakula Wangkanytjaku
Nyangatja Godaku tjukurpa wati wangkatjara ini Aimatjalu walkatjunkunytja. Panya wati nyara palulawanungku Godalu wangkangu aṉangu panya palumpa walytja tjuṯangka panya Israelkunu tjuṯangka. Panya Aimatjanya tjiipi tjuṯa aṯunymankupai nyinangi munu kaanangka kuḻu waṟkaripai nyinangi. Ka Godalu palunya ngurkantanu waṟka nyara palula nyinanyangka, munu palunya waṟka kutjupa ungu palumpa tjukurpa Israelkunu tjuṯangka wangkanytjaku nyara alinytjara nyinapai tjuṯangka. Ka paluṟu tjananya wangkara painingi tjana aṉangu ngaḻṯutjara tjuṯaku ngaḻṯuringkuwiya nyinanyangka munu kutjupa tjuṯa kuraṟa pungkunyangka.
Panya aṉangu nyara paluṟu tjanaya inmaku tjunguringkupai, palu paluṟu tjanaya mulamulangku Godanya waḻkuntja wiyangku wantipai munuya palumpa tjukurta wangaṉarangku kulintja wiyangkuṯu wantipai. Ka nyara palulanguṟu Aimatjalu tjanala wangkangi alatji, “Nyura Godala kulilwiyangku wantinyangka paluṟu nyuranya pikantankuku. Palu nyura palula wangaṉarangku kulinnyangkampa nyurampa pukuḻpa puḻka mulapa ngula wirkankuku.” Alatji Aimatjalu tjananya wangkara nguḻutjunangi. Palu tjana wantingi kulintja wiyangku ka nyara palula maḻangka wati malikitja tjuṯa warmaḻa pitjangu Atjiṟiyanya nguraṟa tjuṯa munuya tjananya pungkula wiyaṉu Israelnga nguraṟa tjuṯa munuya tjara kutjupa witiṟa katingu tjanampa ngurakutu.
Uwa, tjukurpa nyangatja Aimatjalu walkatjunkunytja tjara kutju ngarinyi, panya nganaṉa kuwaripangkuṯu palyaṉi, palu uwankarala walkatjuṟa wiyantja wiyaṯu.
Tjukurpa nyanganpa ngarinyi:
1:1—4:13 Godalu Israelkunu tjuṯa pungkuku tjana palula tungunpungkunyangka
5:10-12 Israelkunu tjuṯangku kura tjuṯa palyantja
5:14-15 Palyanyku nyinanytja Godanya pukuḻarinytjaku
5:18-20 Ngula tjiṉṯu maḻatjangka Godalu kura palyalpai tjuṯa ngurkantaṟa pungkunytjaku
5:24 Palyanyku nyinanytja Godanya pukuḻarinytjaku
7:1—9:10 Tjana kura palyantjitjanguṟu Godalu tjanampa pika puḻka iyantjikitjangku kalkuntja
9:13-15 Godalu Israelkunu tjuṯa ngula wankaṟunkunytjikitjangku kalkuntja
1
Aimatjalu Ngaṉmanytja Wangkanytja
1 Ngayuluṉa wati ini Aimatjanya. Panya ngayulu tjiipi nanikuta tjuṯa kanyilpai nyinangi ngura ini Tikuwala. Ka panya wati ini Utjayanya manta Judah-ku mayatja puḻka nyinangi, ka wati ini Tjiiṟapamanya, Tjiyatjaku katja, manta Israelku mayatja puḻka nyinangi. Ka nyara palula aṟangka Godalu ngayula tjukurpa tjuṯa nintiningi ngura panya Israelngatjara, ka ngayulu walkatjunu tjukurpa nyanganpa. Ka tjukurpa utintjitjangka maḻangka kuḻi kutjara ngaṟala wiyaringkunyangka manta puḻkaṟa uringu Israelta.
2 Kaṉa Godalu ngayula nintinnyangka tjakultjunanyi alatji, “Mayatjalu puḻkaṟa alatjiṯu wangkapai ngura Jerusalemalanguṟu, panya lion puḻkaṟa ngaurmankupai kaya kuliṟa nguḻuringkupai, palu puṟunytju paluṟu wangkapai ngura nyara palulanguṟu, apu ini Tjayantanguṟu. Ka paluṟu wangkanyangka ukiṟi uwankara piḻṯiringkuku ngura tjuṯangka, ngura ukiṟi puḻkatjarangka kuḻu panya puḻi murpu ini Kaamulta kuḻu, ka panya tjiipi tjuṯangku ngalkuntjaku wiyaringkuku alatjiṯu uwankara piḻṯiringkunyangka.”