5
1-8 Munu palulanguṟu Esther-nya tiṟitja wiṟu mulata tjarpangu, munu ankula mayatjaku ruumangka itingka uti ngaṟangi tuwa aḻangka paluṟu nyakula aḻṯinytjaku. Ka wati panya mayatjangku palunya nyakula pukuḻaringu munu puṉu panya tjukara puṟunypa gold-nguṟu palyantjitja katuṉu paluṟu tjarpanytjaku. Ka Esther-lu nyakula ngalya-tjarpangu munu puṉu panya tjukara puṟunypa paluṟu katuṟa kanyintjanya ankala pampuṉu.
Ka mayatjangku panya palula tjapinu, “Nyaaringun? Nyaakun mukuringanyi? Nyuntu mukuringkunyangkaṉa nyuntunya tjaraṟa puḻka mulapa ungkuku ngayulu kanyintjatjanungku.”
Ka Esther-lu wangkangu, “Wanyu nyuntu pitjaku kuwari panya ngayulu mai puḻka palyaṟa wantingu nyuntu nganaṉa ngalkuntjikitjangku. Ka wati panya Aimannga kuḻu ngalya-katima nyuntula tjungu.”
Ka nyanga palunya kuliṟa Mayatja panya pukuḻaringu munu wati palumpa waṟkangka wangkangu, “Ankula Aimannga warpungkula aḻṯi, kali paluṟu ngali ara Esther-ku ngurakutu mai ngalkuntjikitja.”
Ka mulapaṯu ankula aḻṯingu wati palunya. Ka pula tjunguringkula anu Esther-ku ngurakutu munu pula mai wiṟu ngalkuningi palula tjunguringkula. Ka Mayatja panya puḻkangku Esther-la tjapinu, “Nyaakun mukuringanyi? Nyuntu mukuringkunyangkampa ngayulu nyuntunya tjaraṟa puḻka mulapa ungkuku ngayulu kanyintjatjanungku.”
Ka Esther-lu wangkangu, “Ngayulu mukuringanyi nyuntu ngayuku pukuḻarinytjaku. Palu wanyu piṟuku pitja mungawinki mai kutjupaku Aimannga nyupaliṯu. Kaṉanta nyara palulalta tjakultjunkuku ngayulu mukuringkunytja.”
9-14 Ka pula mai ngalkula wiyaringkula anu ngurakutu. Ka Aimantu nguṟurpa nyangu wati panya Mutukainya nyinanyangka kaitangka itingka. Ka wati paluṟu Aimannga pitjanyangka nyakula pakaṟa pupakatira waḻkuntja wiyangku wantira alatjiṯu nyinangi. Ka paluṟu puḻkaṟa mirpaṉaringu Mutukaiku, palu wangkanytja wiyaṯu kaṯakutjara anu. Munu ngurangka wirkaṟa aḻṯingu palumpa maḻpa tjuṯa munu minyma kuri kuḻu munu kaṉany-kaṉanytju alatjiṯu tjanala tjakultjunangi panya mayatja puḻkangku palunya mayatja nampa 2 nyinanytjaku tjunkunytja. Munu wangkangi, “Panya kuwari mayatjaku kuringku mai palyaṟa ngayunya kutju aḻṯingu mayatjangka tjungu ankunytjaku. Kali tjiṉṯungka piṟuku ananyi maiku. Palu aṉangu kutjungkuṉi tjituṟu-tjituṟu palyaṉu. Kaṉa palumpa puḻkaṟa mirpaṉarinyi wati panya Jew ini Mutukaiku.”
Kaya palula wangkangu, “Uti nyuntu wati waṟka tjuṯa aḻṯima, kaya pitjala puṉu waṟa palyala ruupatjara aṉangu ruupangka liri karpiṟa katunguṟu waṟaly-waṟalytjunkunytjaku. Munun mungawinki nyuntu mayatjangkalta wangka Mutukainya liringuṟu waṟaly-waṟalytjunkunytjaku. Munun pukuḻariralta ananyi maiku mayatjangka tjungu.”
Ka Aimantu unngu kulinu, “Munta-uwa, nyangatja wiṟu nguwanpa.” Munu wangkangu wati waṟkaripai tjuṯa, “Kuwariya puṉu waṟa palyala aṉangu liri karpiṟa katunguṟu waṟaly-waṟalytjunkunytjaku.”