1 “Ka tjinguṟu nyuntu puluka kutju munta tjinguṟu tjiipi kutju kutitjuṟa katiku pungkula ngalkuntjikitjangku, munta tjinguṟu tjalamilaṟa mani mantjintjikitjangku. Munu uti nyuntu kutitjunkunytjatjanungku maḻakungku payamilanma kukaku panya walytja. Tjinguṟu puluka kutju kutitjunkunytjatjanungku nyuntu uti maḻakungku puluka maṉkur-kutjara ungama. Tjinguṟu tjiipi kutju kutitjunkunytjatjanungku nyuntu uti maḻakungku tjiipi kutjara kutjara ungama. 2-4 Uwa, nyuntu uti kuka kutjupa kutjupa kutitjunkunytjatjanungku maḻakungku payamilanma. Palu tjinguṟu nyuntu mani wiyangku, kutjupa kutjupa kanyintja wiyangku maṟaltu kutitjunkunyangka kukaku walytjangku uti nyuntunya wati kutjupangka waṟkarinytjaku tjalamilanma mani mantjiṟa kuka kutjupa payamilantjikitjangku. Ka tjinguṟu kutjupangku nyuntunya kutitjuṟa katinyangka nyakuku, munu uti paluṟu nyakula nyuntunya markuṟa wangkama kuka palunya maḻakungku ungkunytjaku munu kuka kutjupa kuḻu. Nyuntu tjinguṟu puluka kutju, tjinguṟu tangkiyi kutju, tjinguṟu tjiipi kutju kutitjunkuku, ka kutjupangku katinyangka nyakula wangkanyangka uti nyuntu maḻakungku katira ungama munu piṟuku kuka palu puṟunypa kutjupa kuḻu mantjiṟa ungama kutjaraṟangku.

“Ka tjinguṟu wati mungangka nyuntumpa waḻingka kumpiṟa tjarpaku, ka nyuntu nyakula palunya pungkuku, ka tjinguṟu iluku. Ka nyuntunya ngapartji pungkunytjaku ngaṟanytja wiya, panya nyuntu mungangka puṯu nyakula pungu ngura anga-kanyintjikitjangku. Palu tjinguṟu wati kutitjunkupai kaḻaḻa nyuntumpa waḻingka tjarpaku, ka nyuntu palunya nyakula pungkula iluntankuku. Nyara palulanguṟu nyuntu kaḻaḻa pungkunytjatjanu mulapa miriputjuringu, ka nyuntunya ngapartji pungkula iluntankunytjaku ngaṟanyi.

5 “Ka tjinguṟu nyuntumpa kuka ngultju tjuṯangku nyuntumpa paamangka ukiṟi para-ngalkuṉi munta tjinguṟu nyuntumpa kiṟipitjingka unnguwanu unnguwanungku tjarpara ngalkuṉi, ka tjinguṟu nyuntu aṯunymankunytja wiyangkampa paluṟu tjana tjinguṟu wati panya kutjupaku ukiṟi maitjarakutu ma-tjarpaku munu mai walytjatjara ngalkula wiyalku. Ka alatjirinyangka nyuntu uti wati panya palunya kukangku mai panya ngalkuntjitjangka tjaraṟa ungama nyuntumpa mainguṟu mai palu puṟunypaṯu.

6 “Ka tjinguṟu nyuntu waṟu tjukutjuku tililku nyuntumpa yaata puḻkangka, ka tjinguṟu tjilka tjuṯawanu lipiringkula wati kutjupaku yaatakutu waṟaṟa ma-kampara waṉalku munu palumpa mai kutjupa kutjupa paluṟu pakaltjingantja tjuṯa kampara wiyalku. Ka alatjirinyangka nyuntu uti nyuntumpa panya mainguṟu tjaraṟa palunya ungama mai puḻka palu puṟunypaṯu.

7 “Ka tjinguṟu wati kutjupangku nyuntunya ungkuku kutjupa kutjupa palumpa unytjungku aṯunymaṟa kanyintjaku tjinguṟu mani. Ka tjinguṟu wati kutitjunkupaingku nyuntumpa waḻingka tjarpara kutitjuṟa katiku kutjupa kutjupa panya tjuṯa. Kaya tjinguṟu wati panya palunya nyakula witilku, ka uti paluṟu maḻakungku ungama kutjupa kutjupa panya tjuṯa paluṟu mantjintjatjanungku munu piṟukuṯu ungama kutjupa tjuṯa kuḻu tjunguṟa. 8 Palu tjinguṟuya wati panya kutitjunkupainya puṯu ngurilku, ka kutjupa kutjupa panya tjuṯa katiku alatjiṯu. Ka tjinguṟu wati panya kutjupa kutjupa tjuṯaku walytjangku nyuntunya ngukaṟa kulilku, ‘Tjinguṟu nyangangku kutitjunu, ngayulu panya ungkunytjitjalu.’ Ka alatji nyuntunya ngukannyangka nyuntu uti ngura panya Godanya waḻkulpailakutu anama, kaya ngurkantankupai tjuṯangku nyuntunya kuliṟa tjukaṟurungku ngurkantankuku.

9 “Tjinguṟu wati kutjarangku pulanku pikangku wangkaku kutjupa kutjupanguṟu tjinguṟu pulukanguṟu, munta tjinguṟu tangkiyinguṟu, tjinguṟu tjiipinguṟu, tjinguṟu nanikutanguṟu, munta tjinguṟu mantaranguṟu. Tjinguṟu kutjungku wangkaku, ‘Uwaṉi! Ngayukun palatja kutitjunu.’ Ka alatji pula pikaringkunyangkaya uti katima yiwaḻa panya Godanya waḻkulpailakutu, ka nyara palula pulanya Godalu ngurkantankuku wati yaaltjingku tjukaṟurungku wangkanyi. Ka wati panya ngunti wangkanytjalu uti maḻakungku ungama munu kutjupa kuḻu tjunguṟa ungama kutjara-aṟangku.

10 “Ka tjinguṟu wati kutjupangku nyuntunya wangkaku palumpa kutjupa kutjupa unytjungku aṯunymaṟa kanyintjaku, tjinguṟu tangkiyi, munta tjinguṟu puluka, tjinguṟu tjiipi, tjinguṟu kuka kutjupa. Ka nyuntu kanyinnyangka kuka panya paluṟu tjinguṟu iluku, munta tjinguṟu pikatjararingkuku, munta tjinguṟu kutjupangku kutitjuṟa katiku kampangkaṯu. Ka alatjirinyangka aṉangu kutjupangku tjinguṟu nyakunytja wiya, ka wati panya kukaku walytjangku tjinguṟu ngunti kulilku nyuntu kutitjunkunytja-palku. 11 Ka palulanguṟu alatji ngunti ngukannyangka uti nyuntu anama yiwaḻa panya Godanya waḻkulpailakutu munu nyara palula Godala miṟangka mulamulangku wiyanmanama. Ka alatji wangkanyangka uti wati panya kukaku walytjangku kuliṟa nyuntumpa mulamularingama munu kuka wiyaringkunytjitjanguṟu maḻakungku payamilantjaku nyuntula ngatjintja wiyangku wantima. 12 Palu tjinguṟu nyuntu kanyinnyangka wati kutitjunkupaingku kampangkaṯu pitjala kutitjuṟa katiku, ka nyara kutitjunkunytjanguṟu kutju nyuntu uti maḻakungku payamilanma wati panya kukaku walytja. 13 Palu tjinguṟu inuṟa tjuṯangku kuka panya palunya patjaṟa iluntankuku, ka uti nyuntu kuka panya patjantjitja mantjiṟa katira nintinma wati panya kukaku walytjangka ilunytjitja nyakula mulamularingkunytjaku. Ka nyara palulanguṟu nyuntu palunya maḻakungku payamilantjaku wangkanytja wiyangku kulilku panya inuṟangku patjantja.

14-15 “Ka tjinguṟu nyuntu wati kutjupangka tjapilku pulukaku, munta tjinguṟu tangkiyiku unytjungku kanyintjikitjangku. Ka tjinguṟu paluṟu nyuntunya wangkaku kuka unytjungku kanyiṟa payamilalkatinytjaku, munta tjinguṟu paluṟu maniku ngatjintja wiyangku nyuntunya ungkuku unytjungku kanyintjaku. Ka nyuntu katira kanyinnyangka tjinguṟu pikatjararingkuku munta tjinguṟu kampangkaṯu iluku kuka panya paluṟu. Ka palulanguṟu nyuntu uti maḻakungku payamilanma kukaku panya walytja. Palu tjinguṟu wati kukaku walytjangku kuka panya pikatjararingkunyangka, munta tjinguṟu ilunyangka ngaṟala nyanganyi ilangku. Munu palulanguṟu paluṟu ilangku nyakunytjatjanungku nyuntunya maḻakungku payamilantjaku wangkanytja wiya, panya kuka paluṟu walytjangka miṟangka ilungu. Tjinguṟu nyuntu palunya mani ungkukatingi kuka panya palunya unytjungku kanyintjikitjangku, ka mani nyara palulanguṟu paluṟu kuka kutjupa payamilalku.

16 “Ka tjinguṟu watingku kungkawaṟaku nyakula mukuringkuku munu palunya arkaṟa ngunti aḻṯiku munu palulanguṟu palunya aḻṯira katira kampangkaṯu unytju palula tjunguringkuku. Ka nyanga alatji palyantjatjanungku uti wati panya paluṟu kungkawaṟaku panya mama mani ungama palumpa uṉṯalpa aḻṯinytjikitjangku munu palunya mulamulangkulta aḻṯira kanyinma. 17 Palu tjinguṟu kungkawaṟaku panya mamangku ungkunytja wiyangku wantiku wati panya paluṟu aḻṯinytjaku. Ka palulanguṟu uti wati panya paluṟu kungkawaṟaku panya mama mani ungama alatjiṯu, ngaṉmanypa panya palumpa uṉṯalpangka ngarinytjatjanungku, munu wantima kungkawaṟa panya palunya aḻṯinytja wiyangku mamangku painnyangka.

18 “Tjinguṟu minyma kutjupangku iraṯingka initjunkupai, ka palunya pungkula iluntankunytjaku ngaṟanyi alatjiṯu.

19 “Ka tjinguṟu watingkumpa tjiipi kungka, munta nanikuta kungka, munta kuka kutjupa kungka pampuṟa kurannyangkampa wati palunya apungka atuṟa iluntankunytjaku ngaṟanyi alatjiṯu.

20 “Ka kutjupangku tjinguṟu ngayunya wantira god kutjupa kuka katira ungkula waḻkunnyangkampa palunya apungka atuṟa iluntankunytjaku ngaṟanyi alatjiṯu.

21 “Ka nyura uti aṉangu malikitja kuralwiyangku mukulyangku kanyinma, panya nyura kuḻu ngaṉmanypa malikitja nyinangi ngura panya Itjipala.*Nyara Itjipanya nguraṟa tjuṯangku panya Israelkunu tjuṯa mukulya wiyangku kanyiningi. Ka nyangatja Godalu tjanala wangkangi nyara palu puṟunyariwiyangku kanyintjaku aṉangu malikitja tjuṯa.

22 “Munu nyura uti minyma wanakaḻa tjuṯa munu tjitji tjiṯula tjuṯa kuḻu ngaḻṯunytjungku kanyinma kuralwiyangku. 23-24 Palu tjinguṟu nyura tjananya kuralku, ka tjana ngayunya ulara tjapilku alpamilantjaku. Kaṉa ngayulu Mayatja puḻkangku tjana tjapinnyangka kulilku, munuṉa puḻkaṟa mirpaṉarira nyuranya iluntankunytjaku iyalku warmaḻa tjuṯa. Ka nyara palulanguṟu nyurampa minyma tjuṯa wanakaḻariku munu tjitji tjuṯa kuḻu tjiṯulariku nyura ilunyangka.

25 “Ka tjukurpa kutjupa nyangatja panya mani unytjungku ungkunytjatjara. Tjinguṟu nyuntu mani puḻkatjarangku aṉangu ngaḻṯutjara mani tjukutjukutjara unytjungku mani ungkuku paluṟu ngula maḻakungku ungkunytjaku. Palu nyuntu uti mani nampa panya palunyaṯu kutju maḻakungku mantjinma munkararinytja wiyangku. Panya wati mani unytjungku ungkupai tjuṯangku mani puḻka nguwanpa maḻakungku mantjilpai nampa panya ungkunytjitjangka waintaṟa. Palu nyura nyara tjananya arkantja wiyangku wantima munuya mani nampa palunyaṯu mantjinma mani puḻka waintaṟa mantjilwiyangku ngaḻṯutjara panya tjuṯanguṟu. 26-27 Tjinguṟu aṉangu kutjupangku nyuntula maniku ngatjilku unytjungku mukuringkula. Ka paluṟu tjinguṟu nyuntunya maḻakungku ungkunytjikitjangku kalkuṟa palumpa upukuta nyuntunya ungkuku nyuntu ngapartji unytjungku kanyintjaku. Palu uti nyuntu upukuta palunya mungartjirinyangka maḻakungku mapalku ungama waringka-tawara. Panya paluṟu ngaḻṯutjarangku upukuta palunya kutju kanyini unytjunarinytjikitjangku, munu mantara yaaltjingka paluṟu tjarpara ngariku nyuntu palumpa upukuta rawangku kanyinnyangka? Ka upukuta wiyangku ngayula ulara tjapinnyangkaṉa ngayulu kulilku munuṉa palumpa ngaḻṯuringkuku.

28 “Kulilaya! Ngayunyaṉiya Mayatja Godanya kuranmankuwiyangku wantima alatjiṯu munu palu puṟunypaṯu nyurampa mayatja tjuṯa kuranmankuwiyangkuṯu wantima.

29-30 “Munuṉiya ngayunya wangaṉarangku ungama mai panya kutjupa kutjupa tjuṯa pakaltjingantjatjanungku. Panya nyura ngayunya tjara ungkunytjaku ngaṟanyi nyurampa mai wiitanguṟu, munu kiṟipitji wangaṟanguṟu, munu alipa wangaṟanguṟu kuḻu.

“Munuṉiya nyurampa katja panya ngaṉmanypa ngarinytja tjuṯa kuḻu uwa, munu nyurampa puluka tjiipinguṟu kuḻu katja ngaṉmanypa ngarinytja tjuṯa. Palu iṯi kuwaritjaya ngunytjungka kanyintjaku wantima tjiṉṯu 7 munu palulanguṟulta tjiṉṯu 7 wiyaringkunyangka tjiṉṯu 8-ngka kutju mantjiṟa katira ngayunya ungama.

31 “Nyura panya ngayuku walytja tjuṯa nyinanyi, ka pala palulanguṟu nyura kuka panya inuṟangku patjaṟa iluntankunytjitja nyakula mantjiṟa ngalkuwiyangku wantima. Palu nyurampa papa tjuṯa kutjuya ungama ngalkuntjaku.”