1 Munu Mayatja Godalu Mosela piṟuku wangkangu, “Puḻi katukutu pula piṟuku ngalya-tatila ngayulakutu Aaronnga nyupali munu pula wati Natapanya pulanya Apiyunya kuḻu kati munu wati Israelkunu puḻka tjuṯa wati 70 tjananya kuḻu ngalya-kati. Palu nyura ngalya-ilaringkunytja wiyangku paṯunguṟu ngayunya pupakatira waḻkunma. 2 Palu Mose, nyuntu kutju ngayulakutu ilaringama, kaya wati panya puḻka tjuṯa uti paṯupaṯu ngaṟama. Kaya aṉangu tjuṯa uti tjaṟu mantangka ngaṟama puḻikutu ngalya-tatintja wiya.”

3 Ka Moselu mulapaṯu Godaku tjukurpa uwankara kuliṟa ankula aṉangu tjuṯangka tjakultjunu uwankara panya Godalu wangkanytjitja tjukurpa panya tjuṯa mulapa. Kaya aṉangu uwankarangku kuliṟa tjungungku wangkangu, “Nganaṉa mulapa Godaku tjukurpa uwankara wangaṉarangku kuliṟa palyalku.” 4 Ka Moselu Godaku tjukurpa uwankara walkatjunu. Munu mungawinki mulapa pakaṟa pitjilpa puḻka palyaṉu puḻi panya palula paṉṯangka, munu paluṟu puḻi tjiwa tjuṯa 12 muṟutjuṟa waṉaṉu. Paluṟu puḻi kutju kutju 12 muṟutjunu wati panya Israelku katja tjuṯaku, panya katja nyanga palula tjanalanguṟu aṉangu Israelkunu tjuṯa utiringkula nyinangi walytjaṟara walytjaṟara. 5 Munu palulanguṟu Moselu Israelkunu wati yangupala tjuṯa wituṟa iyaṉu, kaya ankula kuka pungkula tiliwakaṟa Godanya waḻkuntjikitjangku ungangi, munuya piṟuku kuka puluka nyiṯayira kuḻunypa tjuṯa pungkula kuka tjara tiliwakaṟa Godanya ungu munu tjara kutjupa pauṟa aṉangu tjuṯa ungu ngalkuntjaku. 6 Ka Moselu kuka tjuṯanguṟu milkaḻi tjara mantjiṟa piti tjuṯangka tjutiṉu, munu tjara kutjupangka pitjilpa panya kurpinu.*Moselu pitjilpa milkaḻingka kurpinu nyaa nintintjikitjangku, panya Godalu aṉangu tjuṯa kura tjuṯa palyantjitjanguṟu kalypangku pungkuwiyangku wantinytja, kuka panya tjuṯa tjanampa aṟangka ilunyangka. Ka milkaḻi tjara kutjupa Moselu piti tjuṯangka tjutiṉu aṉangu tjuṯa kurpintjikitjangku, ka milkaḻi paluṟu nintini aṉangu tjuṯangku Godanya kalkuntja paluṟu wangkanytja uwankara wangaṉarangku kulintjikitjangku. 7 Munu palulanguṟu paluṟu Godaku nyiri tjukurtjara mantjiṟa aṉangu tjuṯangka nyakula wangkangi, kaya kuliningi. Munuya wangkara wiyaringkunyangka tjana kalkuṉu wangkara, “Nganaṉa Mayatja Godala wangaṉarangku kulilku, munula paluṟu wangkanytja uwankara tjukaṟurungku palyalku.”

8 Ka palulanguṟu Moselu piti panya milkaḻitjara tjuṯa mantjinu munu aṉangu tjuṯa milkaḻingka kurpinu. Munu wangkangu, “Nyawaya milkaḻi nyangatja, panya kuwari Godalu nyuranya kalkuṉu aṯunymaṟa kanyintjikitjangku munu panya nyurala tjukurpa wiṟu tjuṯa wangkangu nyura kuliṟa palyantjaku, ka panya nyura ngapartji kalkuṉu paluṟu wangkanytja uwankara wangaṉarangku kulintjikitjangku. Ka milkaḻi nyangangku nintini Godalu nyuranya kalkuntja munu nyura palunya kalkuntja.”

9 Ka palulanguṟu Mosenya tjana Aaronnga, Natapanya, Apiyunya munu wati Israelkunu puḻka tjuṯa kuḻu puḻingka tatinu. 10 Munuya tatiṟa nyangu Israelku God. Munuya paluṟu paḻtjuṟa ngaṟanytjitjangka apu panya kaṟaly-kaṟalypa mulapa ngarinyangka nyangu walka puyula-puyula ilkaṟi puṟunypa. 11 Ka Godalu nyanga tjananya wati Israelkunu puḻka tjuṯa pungkula wiyantja wiyangku wantingu. Paluṟu tjana panya Godanya nyangu, munuya palunya nyakunytjatjanungku nyinakatira tjungungku mai ngalkula tjikiningi.

12 Munu palulanguṟu Godalu Mosenya wangkangu, “Ngayulakutu nyuntu kutju ngalya-tatila puḻi katu munu paṯala palangka. Kaṉanta ungkuku tjiwa kutjara panya ngayulu palula pulala tjukurpa puḻka mulapa walkatjunu aṉangu tjuṯangku kuliṟa nintiringkunytjaku.” 13-15 Ka Mosenya pula palumpa wati alpamilalpai ini Tjatjuwanya tatintjikitja ritiringu. Palu Moselu ankunytjikitjangku wati panya puḻka tjuṯangka wangkangu ngurangka nyinanyangka, “Nyangangkaya paṯaṟa nyinama ngalimpa, kali ngula maḻaku pitjaku. Nyanga Aaronnga pula Uunya nyinanyi nyuranya aṯunymankunytjikitja, ka tjinguṟu aṉangu kutjara pikaringkunyangkampa palula pulalakutu katima pulanya kalypantjaku.”

Munu palulanguṟu Mosenya Tjaniyala ma-tatinu Godaku panya puḻi miḻmiḻṯa. Ka utuwaṟi puḻkangku puḻi panya angatjunu. 16-17 Ka Mayatja Godanya ukalingu puḻi pala palula munu irnyaṟa ngaṟangi tili puḻka mulatu. Kaya Israelkunu tjuṯangku tjaṟunguṟu ira-nyangangi katukutuṟa waṟu puḻkangku kampanyangka-palku puḻi panya katu. Ka utuwaṟingku puḻi panya tjutuṟa ngaṟangi tjiṟirpi 6, ka palulanguṟu tjiṟirpi 6 ngaṟala wiyaringkunyangka tjiṟirpi 7-ta Mayatja Godalu Mosenya utuwaṟinguṟu aḻṯingu.

Kuwari nyura chapter 24 nyakunytjatjanungku chapter 25 puṯu nyanganyi munu nyura chapter 26-nguṟu 28-kutu kuḻu puṯu nyanganyi panya chapter nyanga palunya tjananya nganaṉa Pitjantjatjara walkatjunkunytja wiyaṯu kuwaripa. Palu chapter 25-nguṟu 28-kutu tjukurpa nyaa ngaṟanyi, panya Godalu Mosenya puḻi ini Tjaniyala katu tjukurpa kutjupa kutjupa wangkanytja. Paluṟu panya Mosenya wangkangu Tiinta Miḻmiḻpa palyantjaku pala palula unngu paluṟu tjana Godala tjunguringkula kulintjaku, tjukurtjara tjuṯangku kuḻu. Munu Godalu tjukurpa kutjupa tjuṯa kuḻu wangkangi palunya tjakultjuṟa utintjikitjangku panya Tiinta Miḻmiḻpa yaaltjingaṟa tjukaṟurungku palyantjaku, tiinta unngu nyinanytja kutjupa kutjupa tjuṯa kuḻu palyantjaku, munu mantara wiṟu tjukurtjara tjuṯaku kuḻu tjukaṟurungku palyantjaku. Tjukurpa nyanga Godalu Mosela utiṟa tjakultjunkunytja ngaṟanyi chapter nampa nyanga palula tjanala 25-ngka, 26-ngka, 27-ngka, munu 28-ngka, munu piṟuku ngaṟanyi chapter 30-ngka munu chapter 32-ngka. Kala kuwari tjukurpa nyanga palunya tjananya muṯumuṯuṟa aṟangka tjunanyi tjukutjuku tjukutjuku nyura nyakula kulintjaku tjukurpa nyaa puṟunypa ngaṟanyi chapter nyanga palula tjanala.