1 Munu Moselu wati panya Pitjalilta pulala Awu-liyapala wangkangu munu waṟkaripai kutjupa tjuṯangka kuḻu nyanga alatji, “Uwa, Mayatja Godalu nyuranya kutjupa kutjupa tjuṯa nintinu Tiinta Miḻmiḻpa wiṟu mulapa palyantjaku. Ka nyura kuwari Godalu wangkanytjitja uwankara tjukaṟurungku palyantjaku ngaṟanyi.”

2 Munu Moselu Pitjalilnga pulanya Awu-liyapanya aḻṯingu wati panya nintipukangku palyalpai kutjupa tjuṯa kuḻu tjana kuḻu pitjala tiinta panya miḻmiḻpa palyantjaku. Kaya uwankara wangaṉara pitjala waṟkaringi. 3 Kaya Israelkunu tjuṯangku kutjupa kutjupa tjuṯa katingu Moselakutu Tiinta Miḻmiḻpa palyantjaku. Ka Pitjaliltu tjana Moselanguṟu mantjiṟa palyaningi tiinta panya palunya. Ka Israelkunu tjuṯangku mungawinki kutjupa mungawinki kutjupa tjana kanyintjatjanungku katira Mosenya ungkupai. 4-5 Ka Pitjaliltu tjana waṟkarira nyangangi rawangku katinyangka, munuya Mosenya wangkangu, “Nyawa, aṉangu nyanga tjuṯangkuya tjuṯa mulapa katinyi, palu nyangatja alatjiṯu nganaṉa uwankara palyantjaku, panya Godalu palyantjaku wangkanytjitja.”

6 Ka Moselu wangka iyaṉu aṉangu uwankarakutu tjana kutjupa kutjupa tjuṯa piṟuku Tiinta Miḻmiḻku katira ungkuwiyangku wantinytjaku. Kaya kuliṟa wantingu piṟuku katiwiyangku. 7 Panya paluṟu tjana katira tjunkunytja tiinta panya palunya palyantjaku waintaṟa ngaringi tjuṯa mulapa waṟka panya palunya palyaṟa wiyantjaku.

8-38 Kuwari nyuntu chapter 36-ngka verse 8-nguṟu puṯu nyanganyi nyiri nyangangka panya nganaṉa chapter 36, 37, 38 munu 39 kuḻu Pitjantjatjara walkatjunkunytja wiyaṯu kuwaripa.