23
Aipuṟamalu Kuḻpi Payamilantja Tjiiṟanya Tjuṉutjunkunytjikitjangku
1-2 Ka Aipuṟamaku kuri Tjiiṟanya pampa mulararira ilungu yiya panya nampa 127 nyinanytjatjanu. Paluṟu panya nyinara wiyaringu ngura nyara ini Ipuṟanta manta panya Kainanta nguṟurpa. Ka Aipuṟamanya kuri wiyaringkunyangka katuku nyinara ulangi puḻkaṟa tjituṟu-tjituṟurira. 3 Munu palulanguṟu pakaṟa ngura wantikatira anu aṉangu Iitakunu tjuṯaku ngurakutu tawunu panya ititjakutu munu tawunu kaitangka wirkaṟa tjanala mitingiku tjunguringu.* Tjakaya iriti mitingi wangkanytjikitjangku tawunuku kaitangka itingka tjunguringkupai. Munu paluṟu tjanala tjunguringkula tjapiningi nyanga alatji, 4 “Ngayuluṉa malikitja manta nyanga nyurampangka nyinanyi, panya ngayulu iṯi ngaringu ngura parari munuṉa puḻkaringkula kutju pitjangu ngura nyangaku. Wanyuṉiya nyurampa manta tjukutjuku ngayula tjalamilala, kaṉa pala palula ngayuku kuri tjuṉutjura.”
5-6 Kaya wangkangu palula Iitakunu tjuṯangku, “Wiya, nyuntu wati puḻka nganaṉala nyinanyi wiṟu mulapa. Ka nganampa kuḻpi tjuṯa ngaṟanyi miri tjuṉutjunkunytjaku, ka palya nyuntu kutju wiṟu mulapa ngurkantara, munu pala palula nyuntumpa kuri tjuṉutjura. Palya? Panya nganaṉa uwankara mukuringanyi nyuntunya kuḻpi ungkunytjikitja.”
7-9 Ka nyangatja kuliṟa Aipuṟamalu pukuḻarira pakaṟa tjanala kuranyu pupakatira manta ngalyangku pampuṉu, munu wangkangu, “Munta wiṟu tjuṯa nyura! Munuya wanyu piṟuku kulila! Wiṟungkuya-puṯa tjapila wati pala Ipuṟannga panya Tjauwaku katja paluṟu kuḻpi ini Makipilanya ngayula tjalamilantjaku, panya kuḻpi paluṟu palumpa mantangka ngaṟanyi kantilytja. Ka paluṟu mani nampa wangkanyangkaṉa tjukaṟurungku payamilalku nampa panya palunya alatjiṯu, ka kuḻpi panya paluṟu ngayuku alatjiṯu ngaṟaku ngayuku walytja tjuṯa tjuṉutjunkunytjaku.”
10 Ka wati panya Ipuṟannga palula tjanala tjungu nyinangi tawunu pala palula kaitangka, munu paluṟu Aipuṟamalu tjapinnyangka kuliṟa wangkangu aṉangu tjuṯangka miṟangka nyanga alatji, 11 “Uwa, wati wiṟu nyuntu! Kulila! Nyuntunyaṉa nyanga ngayuku walytja tjuṯangka miṟangka unganyi kuḻpi pala palunya nyuntu kuri tjuṉutjunkunytjaku, munuṉanta manta pala kuḻpingka ititja kuḻu unganyi.”
12-13 Ka Aipuṟamalu pukuḻarira piṟuku tjanala kuranyu pupakatira manta ngalyangku pampuṉu, munu paluṟu wangkangu wati panya Ipuṟanta aṉangu tjuṯangka miṟangka, “Wiya wiṟunya, palu ngayulu nyuntula payamilantjikitja mukuringanyi mani nampa panya nyuntu wangkanytjitjangka. Wanyu-puṯa mani mantjila, kaṉa kuḻpi nyara palula ankula ngayuku kuri tjuṉutjura.”
14-15 Ka Ipuṟantu wangkangu, “Wati wiṟu, ngayunya kulila! Manta nyara kuḻpitjaraṉa ngaṉmanytju payamilaṉu tjiilpa tjukutjukungka nampa nyanga alatjiṯu 400-ngka kutju. Ka palya nyuntu mani nampa nyanga tjukutjukungka payamilala, ka kuḻpi nyaratja nyuntumpariku alatjiṯu nyuntu kuri tjuṉutjunkunytjaku.”
16 Ka Aipuṟamalu nampa kuliṟa mapalkungku palyanmanu tjaṟuntjaku wangkanytja wiyangku. Munu mani tjiilpa nampa 400 tjukaṟurungku kantamilaṟa ungu wati panya palunya aṉangu tjuṯangka miṟangka.
17-18 Alatji manta panya paluṟu kuḻpi puṉu winki Aipuṟamakuringu. Manta paluṟu panya ngura ini Makipilanya ngura Mamaṟaila kakaraṟa, ka wati panya Ipuṟantu Aipuṟamala tjalamilaṉu aṉangu Iitakunu tjuṯangka miṟangka tjana tawunuku kaitangka itingka nyinanyangka. Kaya nyangu Aipuṟamalu tjukaṟurungku payamilannyangka. 19 Ka palulanguṟu Aipuṟamalu palumpa kuri Tjiiṟanya katira tjuṉutjunu kuḻpi panya palula, manta panya Kainanta nguṟurpa. 20 Ka kuḻpi panya paluṟu kurulpa ngaṟangi Aipuṟamaku tjanampa palumpa walytja tjuṯaku kuḻu. Panya ngaṉmanytjuya Iitakunu tjuṯangku kanyiningi manta nyara palunya, munuya Aipuṟamalalta tjalamilaṉu ka palumparingu.