1 Ka palulanguṟu Josephanya mapalku mamangka punkaṟa ngarikatingu munu palunya ampuṟa mitamita kutjara nyunytjuṉu puḻkaṟa ulara. 2 Munu paluṟu wangkangu palumpa wati waṟka ngangkaṟi tjuṯa palumpa mama mantjiṟa puntu palyantjaku ngula tjuṉutjunkunytjikitjangku. 3 Kaya mantjiṟa waṟkaringi miri panya palula rawa mulapa tjiṟirpi 40 aṟa. Panya tjakaya Itjipanya nguraṟa tjuṯangku miri ngaṉmanytju palyalpai. Paluṟu tjana nyiṯilpai uwilangka kutjupa kutjupa tjuṯangka kuḻu, munuya karpilpai raikingka rawa palya ngarinytjaku uṉaringkunytjaku-tawara. Kaya alatji Josephaku mama miri palyaṟunguningi. Kaya aṉangu Itjipanya nguraṟa tjuṯa kuḻu Josephala tjanala tjunguringkula tjituṟu-tjituṟurira ulangi tjanampa mamaku rawa mulapa tjiṟirpi 70 aṟa, piṟa kutjara.

4-5 Palula maḻangka tjana ulara wiyaringkunyangka Josephalu wangkangu Piiṟaku waṟka kutjupa tjuṯangka, “Wiṟu ngana, ankula Piiṟala wangka nyanga alatji, ‘Mamaluṉi ilunytjikitjangku ngaṉmanytju wangkangu palunya ngura nyara Kainanta katira tjuṉutjunkunytjaku. Kaṉa kuliṟa kalkuṉu palumpa katinytjikitjangku, panya ngura nyara palula panya paluṟu ngaṉmanytju ngura palyaṉu kuḻpingka tjuṉutjunkunytjaku. Kaṉi wanyu wiṟungku wantir'iyanma palunya katira tjuṉutjunkunytjaku. Kaṉa palunya tjuṉutjuṟa maḻaku pitjanyi.’ Alatjiya tjapila Piiṟala.” Kaya anu Piiṟalakutu munuya tjapinu Josephaku.

6 Ka Piiṟalu palyanmanu palula ankula wangkanytjaku alatji, “Uwa palya, ma-katiraya tjuṉutjura ngura nyara palula panya nyuntu kalkuntjitjangka.”

7-8 Ka Josephalu nyangatja kuliṟa mama panya miri mantjiṟa ma-pakaṉu ngura nyara Kainanku palumpa maḻanypa munu kuṯa tjuṯa munu walytja uwankara kuḻu. Palu tjana ngunytju tjuṯa tjitji tjukutjuku tjuṯatjara wantikatingu ngura panya Katjinta, puluka, tjiipi, nanikuta tjuṯa kuḻu. Kaya Piiṟaku maḻpa tjuṯa mayatja panya tjukutjuku tjuṯa kuḻu Josephala tjanala tjunguringkula anu munu wati kuranyitja tjuṯa ngura Itjipala winkinguṟu kuḻu. 9 Ka wati tjaultji tjuṯa kuḻuya anu nyanytjungka tjinkangka tjananya aṯunymankunytjikitja. Alatjiya tjunguringkula anu winki mulapa.

10 Munuya ankula ankula ngula karu panya ini Jordanta kakaraṟa wirkanu manta nyara Kainanta itingka. Munuya ngura tjunkula nyinangi tjiṟirpi 7 ngura panya mai uṉinypa mantjiṟa araṟangkupaingka itingka ini Atatala. Munuya nyinara ngura pala palula puḻkaṟa ulangi Jacobanya-tjiratja. Ka Josephalu mama-tjiratjangku tjituṟu-tjituṟurira inma palyaningi tjiṟirpi kutjupa tjiṟirpi kutjupa 7 aṟangku.

11 Kaya Kainannga nguraṟa tjuṯangku itipikutuṟa nyangangi puḻkaṟa ulara waṉinyangka. Munuya wangkangu, “Ngaḻṯutjara tjuṯaya nyaratja Itjipalanguṟu pitjangu munuya puḻkaṟa ulanyi.” Palulanguṟuya ngura pala palunya ininu Apila Mitjuṟaimanya. Alatjiya ininu tjanampa wangkangka.

12-13 Kaya ulara wiyaringkula Jacobaku katja tjuṯangku palunya miri ma-katingu ngura panya Makipilakutu munuya nyara palula kuḻpingka tjuṉutjunu kuḻpi panya paluṟu ngaṉmanytju wangkanytjitjangka. (Panya kuḻpi nyara palunya Aipuṟamalu ngaṉmanytju payamilaṉu wati Iitakunungka ini Ipuṟanta palumpa kuri tjuṉutjunkunytjikitjangku.)

14 Palula maḻangkaya Josephanya tjana uwankara maḻaku anu Itjipalakutu.

15 Palu Josephaku kuṯa tjuṯangkuya ngunti kuliningi Josephanya palumpa tjanampa kuraringkunyangka-palku aṟa panyanguṟu, panya palunyaya ngaṉmanytju kuraningi. Munuya mama wiyaringkunyangka kuliningi, “Kuwari-mantilampa maḻanyngampa mirpaṉarikulta nyanga mantangka kutjumpa.” 16-17 Munu palula tjanalanguṟu wati kutju anu Josephalakutu tjapiṟa kulintjikitja. Munu wirkaṟa alatji wangkangu, “Mamalu panya ngaṉmanytju wangkangu nganaṉala alatji, ‘Nyura kura tjuṯangku iriti Josephaku kuraringkula palunya iyaṉu ngura kutjupakutu. Palu nyura uti Josephala tjapila nyuranya kalypangku wantinytjaku ngapartji pungkuwiyangku.’ Alatji Mamalu nganaṉanya wangkangu. Kala kuwari nyuntula tjapini nganaṉa kura palyantjitjanguṟu kalypangku pungkuwiyangku wantinytjaku. Wanyu nganampa kalyparingama munu ngapartji kulilwiyangku wantima, panya nyuntu nganaṉa Mayatja Godanya waḻkulpai nganampa panya mamangku puṟunytju.”

Ka Josephalu kulinu, “Nyaakuṉiya nyangantu tiṯutjarangku nyanga alatji kuliṟa wangkanyi? Ngura iritiṉa kalypangku wantira watarkuringu.” Munu nyanga palunya kuliṟa ulangi.

18 Palulanguṟuya kuṯa panya tjuṯa nguḻu-nguḻu pitjangu Josephalakutu munuya palula kuranyu tultjungaṟakatingu waḻkuntjikitja. Munuya wangkangu, “Nganaṉala pitjangu mani wiyakitja nyuntula waṟkarinytjikitja.”

19 Palu Josephalu wangkangu tjanala, “Wiya, nguḻu wiyaya nyinama. Ngayulu ngapartji nyuranya pungkuwiyangku wantinyi, panya ngayuluṉa Godanya wiya. 20 Nyara Kainanta panya nyuranku ngaṉmanytju walytjangku kulinu ngayunya kuraṟa pungkunytjikitjangku. Palu Godalu aṟa kutjupa kuliṟa palyaṉu nyura ngayunya kuranytjitjanguṟu, munuṉi Itjipalakutu iyaṟa mayatja puḻka tjunu ailuru puḻkangka aṉangu uwankara maingka wankaṟu kanyintjaku. Kaya palulanguṟu kuwari aṉangu uwankara wanka nyinanyi ilunytja wiya. 21 Ala, ngayukuya nguḻuringkunytja wiya nyinama. Ngayulu nyuranya palyanyku kanyilku nyurampa tjitji tjuṯa kuḻu.” Alatji kalypangku wangkara Josephalu tjananya kurunpa rapaṉu, kaya kuliṟa puḻkaṟa pukuḻaringu.

22-24 Munu nyara palulanguṟu Josephanya rawa nyinangi Itjipala palumpa walytja tjuṯangka tjungu. Ka palumpa katja Ipuṟaimanya tjitji tjuṯatjararingu, ka paluṟu tjana puḻkaringkula tjana ngapartji tjitji tjuṯatjararinguṯu. Ka Josephaku katja kutjupangku Manatjalu katja utinu ini Makirnga, ka paluṟu puḻkaringkula palu puṟunypaṯu tjitji tjuṯatjararingu. Ka Josephalu rawaṯu nyinara nyangangi tjitji nyanga palunya tjananya iṯi ngarinyangka palumpa pakaḻipiti munu kulypalpiti, munu tjananya paluṟu pukuḻṯu ampuṟa kanyiningi.

Palulanguṟu yiya tjuṯa nampa 110 nyinanytjatjanungku paluṟu kuṯa tjuṯangka maḻanypangka kuḻu aḻṯira wangkangu, “Alatjiṯultaṉa wiyaringanyilta. Ka nyuranya Godalu rawangkuṯu kanyini munu nyuranya ngula Itjipalanguṟu ma-katinyi ngura panya ngaṉmanytju Aipuṟamanya Isaacanya Jacobanya ungkunytjitjakutu.” 25 Munu Josephalu palumpa walytja tjuṯangka tjapinu tjukaṟurungku kalkuntjaku alatji wangkara, “Ngula Godalu nyuranya ngura panya palulakutu ma-katinyangka miri ngayunya kuḻu ma-katima, munuṉi nyara palula tjuṉutjura. Palya?” Kaya mulapaṯu kalkuṉu katinytjikitjangku.

26 Ka palulanguṟu paluṟu wiyaringu tjiḻpi mulararira yiya nampa panya 110 nyinanytjatjanu. Ka palumpa walytja tjuṯangku miri palunya nyiṯiṟa palyaṟunguṟa karpiṉu munu pakutjangka tjarpatjunu paṯaṟa ngarinytjaku.