5
Nyaanguṟuya Pukuḻpa Mulapa Nyinaku?
(Luke-aku 6:20-23)
1 Ka palulanguṟu Jesulu aṉangu tjuṯa mulapa nyakula puḻi paṉṯangka ma-tatiṟa nyinakatingu, kaya palumpa nintintja tjuṯangku waṉaṟa palula tjunguringu. 2 Ka Jesulu palula tjanala tjukurpa wangkara nintiningi alatji,
3 “Kutjupa tjuṯangkuya Godala miṟangka ngaṟala walytjangku unngu kuliṟa kuṉṯaringkupai.
Palu nyanga palunya tjananya Godalu mayatja puḻkangku walytjanmaṟa kanyini, kaya palulanguṟu pukuḻpa mulapa nyinaku.
4 Kutjupa tjuṯaya tjituṟu-tjituṟu puḻka nyinanyi.
Palu nyanga palunya tjananya Godalu ampuṟa pilunmankuku, kaya palulanguṟu pukuḻpa mulapa nyinaku.
5 Kutjupa tjuṯaya purkaṟanytju nyinanyi kaṉany-kaṉanypa wiya.
Ka nyanga palunya tjananya Godalu wiṟu tjuṯa ungkuku kalkuntjatjanungku, kaya palulanguṟu pukuḻpa mulapa nyinaku.
6 Kutjupa tjuṯaya Godala wangaṉarangku kuliṟa tjukaṟuru nyinanytjikitja puḻkaṟa mukuringkupai kurunpa winki.
Ka nyanga palunya tjananya Godalu alatjiṯu palyalku wangaṉara alatjiṯu nyinanytjaku, kaya palulanguṟu pukuḻpa mulapa nyinaku.
7 Kutjupa tjuṯaya ngaḻṯunytju puḻka nyinanyi aṉangu tjuṯaku kurunpa ngaḻṯuringkupai.
Ka nyanga palumpa tjanampa kuḻu Godanya puḻkaṟa ngaḻṯuringkuku, kaya palulanguṟu pukuḻpa mulapa nyinaku.
8 Kutjupa tjuṯaya kurunpa winki mukuringkupai Godanya kutju pukuḻmankunytjikitja.
Munu nyanga paluṟu tjana Godanya nyakuku, munuya palulanguṟu pukuḻpa mulapa nyinaku.
9 Kutjupa tjuṯangkuya pikaringkunyangka kalypaṟa pilunmankupai munuya kanyilpai.
Ka nyanga palunya tjananya Godalu walytjanmankuku palumpa tjitji mulapa nyinanytjaku, kaya palulanguṟu pukuḻpa mulapa nyinaku.
10 Kutjupa tjuṯangkuya Godala wangaṉarangku kuliṟa tjukaṟuru nyinapai, kaya mirpaṉtju tjuṯangku tjananya tjukaṟuru nyinanyangka nyakula kuralpai munu pungkupai.
Palu Godalu tjananya mayatja puḻkangku walytjanmaṟa kanyini, kaya palulanguṟu pukuḻpa mulapa nyinaku.
11 “Panya nyura ngayuku walytja nyinanyangka aṉangu kutjupa tjuṯangku nyuranya warkira kuralku munu pungkuku munuya nyuranya ngunti kuranmankuku tjukurpa ngunti tjuṯa tjunguṟa wangkara. Palu tjana alatjingannyangka nyura wantima munu nyara palulanguṟu nyura pukuḻpa mulapa nyinaku. 12 Uwa, puḻkaṟa pukuḻarima Godanya kuliṟa panya paluṟu nyurampa wiṟu mulapa ungkunytjikitjangku paṯaṟa kanyini ngura nyara ilkaṟingka. Panya nyurala kuwaripangkaya iriti aṉangu tjuṯangku palu puṟunypaṯu kuraningi wati panya wangkatjara ngaṉmanyitja tjuṯa, ka panyaya tungunpungkula wantingi.
Tjaltu Mayu Wiṟutjara Puṟunypa Wangaṉara Nyinanytjaku
(Markaku 9:50; Luke-aku 14:34-35)
13 “Panya kutjupangku tjaltu tjunkupai kukangka mayu palya ngaṟanytjaku, kaya aṉangu tjuṯa puḻkaṟa mukuringkupai. Ka palu puṟunypa nyura Godala wangaṉarangku kuliṟa palyannyangkampa aṉangu tjuṯangku nyuranya nyakula puḻkaṟa mukuringkuku tjana kuḻu Godaku walytjaringkula wangaṉarangku kuliṟa palyantjikitja. Palu tjinguṟu tjaltu kuraringkuku, ka kukangka tjunkunyangka mayu kura ngaṟanyi, ka mayu kura arkaṟa wantinyi. Ka tjaltu palunya mantangka waṉinyi aṉangu tjuṯangku paḻtjuṟa tjinangku kantuṟa kurantjaku. Ka palu puṟunypa nyura tungunpungkula Godalanguṟu paṯuringkunyangka aṉangu tjuṯangku nyuranya nyakula Godanya wantiku palula tjunguringkunytjikitja mukuringkunytja wiyangku. Palulanguṟu nyura ngayuku waṟka puṯu wiṟuṟa palyalku.
Tili Puṟunypa Uti Palyanyku Nyinanytjaku
14 “Panya nyura tili puṟunypa nyinanyi aṉangu tjuṯaku. Panya mungangka tilingku iwara irnyaṟa utilpai, kaya nyakula tjukaṟuru ankupai, palu puṟunytju nyura aṉangu manta winkitja iwara nintilpai Godalakutu wirkankunytjaku. Panya tawunu puḻka apungka katu palyantja uti ngaṟala irnyalpai aṉangu tjuṯangku nyakunytjaku. 15 Ka palu puṟunypa aṉangungku waḻi unngu lampa tiliṟa piti anga-pupatjunkupai wiya uti tjunkupai katu tili paluṟu irnyaṟa utintjaku aṉangu tjuṯangku uti nyakunytjaku. 16 Ka palu puṟunypa nyura palyanyku nyinama tjukaṟuru munu mukulyangku wiṟu tjuṯa palyanma aṉangu tjuṯaku, ka palulanguṟulta aṉangu tjuṯangku nyuranya utingku palyannyangka nyakuku tili puṟunypa irnyannyangka, munuya nyurampa Mama Ilkaṟitjanya waintaṟa kuliṟa palunya mirawaṉira waḻkulku.
Moseku Tjukurpa Tjukaṟurungku Kulintjaku
17 “Tjinguṟu nyura ngayunya alatji kulini, ‘Nyangatja-manti pitjangu tjukurpa panya Mosenya ungkunytja munu wati wangkatjara tjuṯa kuḻu ungkunytjanya wiyantjikitjampa.’ Palu wiya, ngayulu tjukurpa palunya tjananya wiyantjikitja pitjanytja wiya, palu panya tjana iriti wangkanytjitja palyantjikitjaṉa pitjangu. 18 Mulamulangkuṉa nyurala wangkanyi, panya manta ilkaṟi ngaṟanyangka, tjukurpa paluṟu tjana uwankaraṯu tiṯutjara ngaṟaku, nyura rawangku wangaṉarangku kulintjaku, tjukurpa puḻka tjuṯa, munu tjukutjuku tjuṯa kuḻu. Palu tjukurpa panya paluṟu tjana wangkanytja uwankara utiringkunyangka kutju, tjukurpa paluṟu tjana wiyaringkuku tjiṉṯu maḻatjangka. 19 Palulanguṟu tjukurpa palunya tjananya uwankara wangaṉarangku kulintjaku ngaṟanyi, ka tjinguṟu kutjupangku tjukurpa puḻka tjuṯa, munu tjukutjuku tjuṯa kuḻu kulilwiyangku wantinyi, munu aṉangu kutjupa tjuṯa kuḻu nintini palu puṟunytjuṯu wantinytjaku, ka palunya Godalu nyakula pukuḻarinytja wiyangku tjaṟulku, Godaku walytja uwankarangka maḻarku nyinanytjaku. Ka tjinguṟu kutjupangku tjukurpa nyanga palunya tjananya wangaṉarangku kuliṟa palyaṉi munu paluṟu aṉangu kutjupa tjuṯa nintini palu puṟunytjuṯu palyantjaku, ka aṉangu nyara palunya Godalu nyakula pukuḻarira palunya kuranyu tjunkuku Godaku walytja kutjupa tjuṯangka waintaṟa. 20 Palu kulilaya! Nyura Godaku walytja nyinanytjikitja mukuringkulampa, wati nyara Moseku tjukurpa nintilpai tjuṯa, munu Paṟatji tjuṯa kuḻu arkantja wiyangku wantima. Panya paluṟu tjana Moseku tjukurpa kanyiṟa kaṉany-kaṉanyaripai, tjukurpa nyara palulawanu kutju. Palu utiya kurunpa winki Godaku mukuringkula, palula wangaṉarangku kuliṟa, tjukurpa nyara palunya tjananya palyanma, kaṉany-kaṉanyarinytja wiyangku. Ka nyura Godaku walytja nyinanytjikitja mukuringkula palu puṟunypaṯu palyanma kurunpa winki Godaku mukuringkula ka nyara palulanguṟu kutju Godalu nyuranya walytjanmankuku nyura palula tjunguringkula tiṯutjara nyinanytjaku.
Mirpaṉariwiya Nyinanytjaku
21 “Panyatjaya kulila, panya Godalu nyurampa tjamu tjuṯangka iriṯi wangkanytja alatji,
‘Aṉangu kutjupa iluntankuwiyangku wantima, panya nyuntu aṉangu iluntankunyangkampa tjana nyuntunya kuutpangka katira ngaṟatjunkuku kura ngurkantankunytjaku.’
22 Palu kuwariṉa ngayulu nyurala wangkanyi alatji, nyuntu tjinguṟu maḻanypaku unngu kuraringkula mirpaṉarinyangka Godalu nyuntunya kura ngurkantankuku. Munu piṟuku tjinguṟu nyuntu maḻanypa ngunti kuranmankunyangkampa nyuntunya kuutpa puḻkakutu katiku Jewku kantjulpa tjuṯangku ngurkantankunytjaku. Munta nyuntu tjinguṟu maḻanypa anaṟa ngurpanmankunyangkampa Godalu palu puṟunypaṯu nyuntunya kura ngurkantankuku munu nyuntunya waṟu panya tiṯutjara kampapaingka waṉiku. 23-24 Ka palula-tawara nyura uti walytja tjuṯaku kalypa nyinama. Tjinguṟu nyuntu timpula unngu paṯaṟa ngaṟanyi Godanya kutjupa kutjupa ungkunytjikitja munu nyuntu tjinguṟu ngaṟala kulilku, ‘Munta-uwa! Ngayulu panyaṉa ngayuku walytja kuraningi, ka tjinguṟu paluṟu ngayuku kuraringanyi. Wanyu kaṉa ankula palumpa-waraṟa kalypariwa nyanga ungkunytja kuwaripangka.’ Alatji kuliṟa nyuntu uti ankula palumpa kalyparingama munu palulanguṟulta maḻaku pitjala pitjilpangka tjunkula Godanya ungama.
25 “Tjinguṟu nyuntu aṉangu kutjupa kurannyangka paluṟu nyuntunya mirpaṉarira kuutpakutu katiku. Ka katinyangka nyuntu uti palunya wiṟuṟa purkaṟangku wangkakatima palumpa kalyparingkunytjikitjangku kuutpangka wirkankunytja kuwaripangka, kanta paluṟu tjinguṟu kalypangku wantiku kuutpangka tjunkunytja wiyangku. Palu tjinguṟu nyuntu wangkara palumpa kalyparingkunytja wiyangku wantinyangkampa paluṟu nyuntunya katiku alatjiṯu wati ngurkantankupaikutu, kanta paluṟu nyuntunya kura ngurkantaṟa wangkaku maningka payamilantjaku munu paluṟu wati pulitjamunu aḻṯiku kanta pitjala nyuntunya witiṟa katira tjailangka tjarpatjunkuku. 26 Mununta nyara palula rawangku kanyilku nyuntu mani uwankara payamilaṟa wiyantjaku paṯaṟa. Nyangatjaṉa mulamulangku wangkanyi.
Kuri Walytjatjarangka Ngariwiyangku Wantinytjaku
27 “Munuya nyangatja kuḻu kulila, panya Godalu nyurala iriti wangkangu nyanga alatji,
‘Nyura uti kutjupangka ngunti ngariwiyangku wantima munuya kuri walytjangka kutju ngarima.’ *Exodus 20:14
28 Palu kuwariṉa ngayulu nyurala wangkanyi alatji, tjinguṟu watingku kungkawaṟa kutjupa nyakula unngu alatji kulini, ‘Kuwariṉatju kungkawaṟa nyara wiṟungka ngarinyi.’ Ka nyura tjinguṟu kulini paluṟu kungkawaṟa pala palula ngarinyangka kutju Godalu palunya kuranmankunytja-palku. Palu wiya, nyara paluṟu nyakula ngarinytjikitja unngu mukuringkunyangka kuḻu Godalu palunya kuranmankuku.
29 “Uwa, uti nyura kura tjuṯa wantinytjikitjangku puḻkaṟa kulinma munu wantima alatjiṯu kuraku piṟuku mukuringkunytja wiyangku. Tjinguṟu nyuntu kuṟungku kutjupa kutjupa nyakula kura palyalku. Palu uti nyuntu kuṟu warpuṟa waṉima kura rawangku palyantjaku-tawara munu palya kuṟutjara nyinama, panya nyuntu tjinguṟu kuṟu winkingku kura rawangku palyannyangkampa Godalu nyuntunya ngura kurangka waṉiku waṟu puḻkangka.
30 “Munu palu puṟunypa tjinguṟu nyuntu maṟangku kura kutjupa kutjupa palyalku. Palu uti nyuntu maṟa kaṯaṟa waṉima kura rawangku palyantjaku-tawara, munu palya maṟa wiya nyinama, panya nyuntu tjinguṟu maṟa winkingku kura rawangku palyannyangka Godalu nyuntunya ngura kurangka waṉiku waṟu puḻkangka.
Kuri Wantikatiwiyangku Wantinytjaku
(Matthew-ku 19:9; Markaku 10:11-12; Luke-aku 16:18)
31 “Munuya nyangatja kuḻu kulila, panya nyiringka iriti walkatjunkunytja ngaṟanyi Godalu wangkanytja nyanga alatji,
‘Wati kuringku minyma kuri wantinytjikitja mukuringkulampa uti nyiringka walkatjunama minyma paluṟu palunya wantinytja nyakula ninti nyinanytjaku.’ *Deuteronomy 24:1
32 Uwa, nyura ninti tjukurpa nyara palumpa, palu kuwariṉa nyurala alatji wangkanyi tjinguṟu watingku minyma kuri nyiri unganyi wantinytjikitjangku paluṟu mukuringkula, ka tjinguṟu minyma palunya wati kutjupangku ngula aḻṯinyi, ka nyara palulanguṟu wati panya kuri ngaṉmanyitjangku minyma palunya wantira Godala tungunpungkunytjaku palyaṉi, panya Godalu wangkangu kuri walytjangka kutju ngarinytjaku. Ka wati panya kuri maḻa aḻṯinytjanya kuḻu Godala tungunpunganyi minyma panya palula tjunguringkula. Palulanguṟu nyura uti minyma kuri kanyinma alatjiṯu wantinytja wiyangku, palu wati kutjupangka kampangkaṯu ngarinyangka nyakula kutju palya mukuringkula wantima.
Kalkuntjatjanungku Tjukaṟurungku Palyantjaku
33 “Munuya nyangatja kuḻu kulinma, panya Godalu nyurampa tjamu tjuṯangka iriti wangkangu nyanga alatji,
‘Nyura tjinguṟu Mayatja Godaku kutjupa kutjupa palyantjikitjangku kalkuntjatjanungku palyanma alatjiṯu maḻa wantinytja wiyangku.’
34-37 Ka nyura kalkuntjikitja mukuringkulampa kalkunma alatjiṯu ini kutjupa kutjupa-waraṟa wangkara kalkuntja wiyangku. Panya nyura aṉangu kutjupa kalkuntjikitjangku ini kutjupa kutjupa-waraṟa wangkapai tjinguṟu ini ilkaṟitja, tjinguṟu ini mantatja, tjinguṟu Jerusalemanya, ka aṉangu nyara paluṟu ini palu puṟunypa wangkanyangka kuliṟa nyurampa mulamularingkupai. Palu kuwariṉa ngayulu nyurala wangkanyi alatji, nyura kalkuntjikitja mukuringkula tjukaṟurungku wangkama ini kutjupa kutjupa tjuṯa tjunguṟa wangkanytja wiyangku. Panya nyangatja mamu Satantu wituwituṉi ini tjuṯawanungku kalkuntjaku. Kaya ilkaṟitjawanungku kalkuntja wiyangku wantima panya ngura nyara palulanguṟu Godalu uwankara mayatjangku kanyini. Munuya palu puṟunypaṯu mantawanungku kalkuntja wiyangku wantima panya manta nyangatja palumpa alatjiṯu. Munuya Jerusalemalawanungku kuḻu kalkuntja wiyangku wantima panya ngura nyara paluṟu kuḻu Godaku ngaṟanyi mayatja panya puḻkaku. Palu nyura kalkuntjikitja mukuringkulampa kalkunma alatjiṯu ini kutjupa kutjupa wangkanytja wiyangku, munu kalkuntjatjanungku tjukaṟurungku alatjiṯu palyanma maḻa wantinytja wiyangku.
Ngapartji Pikaringkula Pungkunytja Wiyangku Wantinytjaku
(Luke-aku 6:29-30)
38 “Munuya nyangatja kuḻu kulila! Panya Moselu iriti walkatjunu alatji,
‘Aṉangu kutjupangku nyuntunya kuṟu pungkunyangkampa palunya ngapartji kuṟu kutju pungama, munu tjinguṟu kaṯiṯi pungkula kaṯantankunyangkampa palunya ngapartji kaṯiṯi kutju pungkula kaṯantanama.’ *Exodus 21:24
39 Palu kuwariṉa ngayulu nyurala alatji wangkanyi, aṉangu kutjupangku nyuntunya kurannyangkampa ngapartji kuralwiyangku wantima. Tjinguṟu kutjupangku nyuntunya mitamita kampa waku pungkunyangkampa mitamita kampa kutjupa nintinma piṟuku pungkunytjaku. 40 Ka tjinguṟu aṉangu kutjupangku nyuntunya kuutpakutu katiku nyuntu palula ngaṉmanytju ngatjintjatjanungku palunya maḻakungku ungkunytja wiyangka. Ka wati panya ngurkantankupaingku tjinguṟu nyuntunya wangkaku tjata araltjaṟa aṉangu panya palunya ungkunytjaku, ka nyuntu uti palunya tjata kutju ungkunytja wiyangku nyuntumpa upukuta kuḻu ungama panya mani puḻkatja. 41 Ka tjinguṟu tjaultjingku nyuntunya pauntjingaṟa wangkaku palumpa yakutja tjaḻiṟa katira palula tjungu ankunytjaku. Ka nyuntu uti wangaṉarangku tjaḻiṟa katima munu ngula maḻakungku ungkunytjaku wangkanyangka palula wangka, ‘Wiya, palyaṉa piṟuku katinyi.’ Munu nyuntu muṉkara nguwanpa palula tjungu anama palumpa yakutja katira. 42 Ka tjinguṟu aṉangu kutjupangku nyuntunya kutjupa kutjupaku ngatjilku, ka palunya wantinytja wiyangku ngatjinnyangkampa ungama alatjiṯu.
Aṉangu Uwankaraku Mukulya Nyinanytjaku
(Luke-aku 6:27-28,32-36)
43 “Nyura ninti panya kutjupangku iriti wangkangu alatji,
‘Walytja tjuṯaku kutjuya mukulya nyinama munuya nyurampa mirpaṉtju tjuṯaku kuraringama.’
44 Palu kuwariṉa ngayulu nyurala nintini tjukurpa kutjupa alatji,
‘Nyurampa mirpaṉtju tjuṯakuya mukulya nyinama, munuya palumpa tjanampa Godala tjapinma nyuranya kuralpai tjuṯaku tjananya ngaḻṯunytjungku aṯunymaṟa kanyintjaku.’
45 Ka nyura alatji palyannyangka Mama God ilkaṟitjangku nyuranya nyakula alatji kulilku, ‘Munta mulapa nyanganpa ngayuku walytja mulapa nyinanyi ngayunya arkaṟa.’ Uwa, nyura mirpaṉtju tjuṯaku Godala tjapinnyangka paluṟu tjananya ngaḻṯunytjungku kulilku, panya paluṟu tjiṉṯu pakaltjingalpai aṉangu palya tjuṯa munu kura tjuṯa kuḻu irnyantjaku. Munu panya mina wiṟu iyalpai aṉangu wiṟu palyalpai tjuṯaku munu aṉangu ngunti palyalpai tjuṯaku kuḻu. 46 Tjinguṟu nyura aṉangu kutjupaku mukulyangku wiṟuṟa palyalku paluṟu nyurampa wiṟuṟa palyannyangka kutju. Ka Godanya wanyu nyakula puḻkaṟa pukuḻariku nyurampa? Wiya, panya wati kamantaku mani mantjilpai tjuṯa palu puṟunypaṯu nyinanyi munuya ngapartji wiṟuṟa palyannyangka kutju aṉangu kutjupaku mukulyangku wiṟuṟa palyalpai.*Wati nyanga paluṟu tjana aṉangu Jew tjuṯa, palu tjana wati nyara Rome-aku mayatjaku waṟkaringi, munuya aṉangu Jew tjuṯangka tax mani mantjiningi mayatja panya palulakutu iyantjikitjangku. Kaya Jew tjuṯa palumpa tjanampa kuraringkupai waṟka nyanga palunya mayatja panya Jew wiyaku palyannyangka. Ka nyura uti kutjarakuṯu mukulya nyinama walytja tjuṯaku munu nyuranya kuralpai tjuṯaku kuḻu. 47 Ka nyura walytja tjuṯangka kutju wirkaṟa pukuḻṯu wangkanyangka nyakula wanyu Godanya nyurampa pukuḻariku? Wiya, aṉangu Godaku ngurpa tjuṯangku kuḻuya walytja kutjupa tjuṯangka wiṟuṟa wangkapai. Ka nyura uti kutjarakuṯu nyakula pukuḻarima walytja tjuṯaku munu walytja wiya tjuṯaku kuḻu. 48 Uwa, nyura uti palya mulapa nyinama, panya nyurampa Mama Ilkaṟitjanya palya mulapa nyinanyi, palu puṟunypa.”
*5:31 Deuteronomy 24:1
*5:46 Wati nyanga paluṟu tjana aṉangu Jew tjuṯa, palu tjana wati nyara Rome-aku mayatjaku waṟkaringi, munuya aṉangu Jew tjuṯangka tax mani mantjiningi mayatja panya palulakutu iyantjikitjangku. Kaya Jew tjuṯa palumpa tjanampa kuraringkupai waṟka nyanga palunya mayatja panya Jew wiyaku palyannyangka.