20
1 Nganaṉa Mayatja Godala tjapini, Jacobaku panya Godangka,
paluṟu kura nyuntula utiringkunyangka,
nyuntunya kuliṟa anga-kanyintjaku
2 Palulala tjapini paluṟu ngura nyara Jerusalemalanguṟu*Jerusalemanya ini kutjupa Zionnga ngura miḻmiḻpa panya nyara palula Godaku timpula ngaṟanyi. nyuntumpa alpa iyantjaku ngura panya miḻmiḻṯanguṟu.
3 Uwa, Godalala tjapini nyuntumpa pukuḻarinytjaku nyuntu wiṟu tjuṯa palunya ungkula waḻkunnyangka.
4 Nganaṉa Godala tjapini nyuntu mukuringkunytja uwankara palyantjaku,
munu nyuntumpa kulintja uwankara tjukaṟuru utiringkunytjaku.
5 Munula nyuntu pikaringkula waintarinyangka kuliṟa pukuḻpa mulapa miraku.
Munula Godanya mirawaṉira kuḻaṯa kuṯitji tjuṯinypa winkitjara pukuḻarira para-ngaṟaku.
Uwa, nganaṉa mukuringanyi Godalu nyuntunya palula tjapinnyangka kulintjaku.
6 Uwa, kuwari nyangala nintiringulta, “Munta-uwa! Mulapa Mayatja Godalu kinga nyanga palunya pikaringkula waintarinytjaku palyaṉingi.
Mulapa Godalu kulilpai paluṟu tjapinnyangka.
Munu paluṟu ilkaṟinguṟu kuṉpu puḻkangku palunya wankaṟunanyi.”
7-8 Ngura kutjupitja tjuṯangku kulilpai alatji, “Nganaṉa wakina tjuṯatjara munu nyanytju tjuṯatjara. Palulanguṟula pikaringkula waintarinyi.”
Palu wiya. Tjanaya punkalku puṯu waintarira.
Ka nganaṉa tiṯutjara kuṉpu alatjiṯu ngaṟaku,
panya nganaṉa Mayatja Godaku mulamularingkupai alatji kuliṟa, “Nganampa God Mayatja witulya puḻkanya.”
9 Uwa Mayatja, kinga nyanga palunya wankaṟunama,
munulanya kulinma nyuntula tjapinnyangka.