51
1 Mayatja God, nyuntu panyan tiṯutjara ngayuku puḻkaṟa mukuringkupai wiyaringkunytja wiya.
Nyanga palulanguṟuṉi ngaḻṯunytjungku wiṟuṟa kanyinma.
Panya nyuntula kuliṟa wantiraṉa kura puḻka palyaṉu,
katju wanyu ngaḻṯuringkula ngayunya kalypangku wantima kura palyantjitjanguṟu pungkunytja wiyangku.
2 Panya kutjupa-aṟaṉa walytjangku kuliṟa kura mukuringkula palyalpai.
Munuṉa kutjupa-aṟa watarkungku palyalpai palya-palku kuliṟa.
Kaṉi kura nyanga uwankaranguṟu ngayunya pungkunytja wiyangku wantima.
3 Uwa, ngayuluṉatju kura palyantjatjanungku kuliṟa walytjangku ngurkantananyi,
munuṉa nyuntula kuliṟa wantinytjatjanungku rawangku kulilpai munuṉa tjituṟu-tjituṟuripai.
4 Mayatja, ngayulu panya kura palyaṟa nyuntunya puḻkaṟa kuraṉu,
panya painuṉin, kaṉa kuliṟa wantira pampuṉu,
kan ngayunya tjukaṟurungku kuranmananyi, munuṉin palya wiyaṉi.
5 Uwa, ngayulu iṯinguṟu alatjiṯu kura nyinangi.
Panya kura alatjiṯuṉi ngunytjungku tjuningka kanyiningi.
6 Ka nyuntu panya mukuringanyi ngayulu tjukaṟurungku unngu kulintjaku.
Palulanguṟuṉi wanyu ngayunya unngu nintila nyuntu kulintjitja tjuṯa,
kaṉa kuliṟa nyuntu mukuringkunytja kutju wangaṉarangku palyalku.
7 Uwa, ngayulu kura palyantjitjanguṟuṉi kalypangku wantima munuṉi tjukaṟurunma.
Kaṉa pala palulanguṟu palya mulapa nyinama.
8 Wanyuṉi tjakultjura nyuntu ngayunya kalypangku wantinytjatjanungku, kaṉa kuliṟa pukuḻari.
Puḻkaṟaṉa kuṉṯaringu, panya kura puḻka mulapa nyuntu ngayula utinu.
Kaṉi wanyu piṟuku pukuḻmanama kura nyanga palula tjanalanguṟu nyuntu ngayunya kalyapangku wantinytjatjanungku.
9 Uwa, nyuntu nintingku ngayunya nyangu kura palyannyangka.
Palu nyakunytjatjanungku wanyu ngayunya kalypangku wantima pungkunytja wiyangku,
munu kura nyanga uwankara ngayulu nyuntula tungunpungkula palyantjitjaku watarkurima rawangku kulintja wiya.
10 Mayatja God, wanyuṉi kulintja kampa kutjupara,
munuṉi tjukaṟurula nyuntula kutju wangaṉarangku kulintjaku.
11 Palu nyuntulanguṟuṉi paiṟa iyantja wiyangku wantima.
Munu Kurunpa Miḻmiḻnga ngayulanguṟu mantjilwiyangku wantima,
panya paluṟu ngayunya wankaṟu kanyini.
12 Panya ngaṉmanypaṉa pukuḻpa mulapa nyinangi nyuntu ngayula tjungu nyinara alpamilannyangka.
Kaṉi wanyu maḻakungku pukuḻmanama panya ngaṉmanyitja puṟunypa nyinanytjaku.
Munuṉi kuṉpula, kaṉa nyuntula kutjungka wangaṉarangku kulinma.
13 Alatji nyuntu ngayunya pukuḻmankunyangkaṉa tjakultjunkuku aṉangu panya nyuntunya wantipai tjuṯangka.
Kaya ngayulu puṟunypaṯu tjana kuliṟa kuṉṯaringkuku munuya aṟuringkula pitjaku nyuntunya tjukaṟurungku waṉantjikitja.
14 Mayatja God, nyuntu kutjungku ngayunya wankaṟunkuku.
Panya ngayulu kurangku iluntanu, katju ngaḻṯuriwa munuṉi kalypangku wantima pungkuwiyangku.
Kaṉa aṉangu tjuṯangka tjakultjura katungku mirara wangkara nyuntu ngayunya wiṟungku tjukaṟuruntja.
15 Uwa Mayatja, ngayunya wangkanytjaku nintila,
kaṉa nyuntunya mirawaṉira waḻkunma.
16 Tjinguṟuṉa ngayuku kuranguṟu kuka tjiipi katima pitjilta pungkula pauṟa muluruṟa ungkunytjikitjangku nyuntunya.
Palu ngayulu ninti panya nyuntu pukuḻarinytja wiya kuka kutju pungkula ungkunyangka.
17 Palu ngayulu kurunpa tjaṟuringkula piiwiyaringkunyangka kutju nyuntu ngayuku pukuḻariku.
Munuṉi paiṟa iyantja wiyangku wantira kanyilku.
18 Palu wanyu ngaḻṯuringkula alpamilala aṉangu nyanga Jerusalemala nyinanytja tjuṯa wall-pa para-ngaṟala waṉantja piṟuku palyantjaku panya ngaṉmanytju piḻuntankunytja.
19 Nyuntu tjinguṟu alatji alpamilannyangkaya nyuntumpa aṉangu tjuṯa tjukaṟuru nyinaku,
munuya mulamulangku kuranguṟu piiwiyaringkula kuka katiku pungkula pauṟa muluruṟa ungkunytjikitjangku nyuntunya.
Ka nyuntu palumpa tjanampa puḻkaṟa pukuḻariku.