63
1 Ngayulu nyuntunya kuwari waḻkuṉi, panya nyuntu ngayuku God.
Kaṉa ngayulu nyuntumpa puḻkaṟa mukuringanyi.
Munuṉa kuwari nyuntunya-tjiratja kapi ilu puṟunytju nyinara nyuntunya rawangku puḻkaṟa kulini.
Panya ailuru puḻkangka manta piḻṯiringkupai mina wiyangka, palu puṟunypa ngayulu kurunpa winki uḻiringkupai nyuntula wiyangka,
panya ngayulu nyuntumpa puḻkaṟa alatjiṯu mukuringanyi.
2 Panya ngayulu nyuntunya nyangangi waḻi miḻmiḻṯa nyinanyangka,
munuṉa nyangu nyuntunya witulya puḻkangku palyannyangka munu pitalytji puḻka alatjiṯu irnyannyangka.
3 Palu panya nyuntumpa mukulya puḻka mulapa rawa alatjiṯu ngaṟanyi wanka nyanga mantatjangka waintaṟa mulapa,
kaṉa palulanguṟu nyanga kuwari nyuntunya inkara waḻkuṉi.
4 Munuṉa nyanga alatji kulini, “Utiṉa wanka nyanga nyinaralpi nyuntunya tiṯutjarangku waḻkunma,
munuṉa nyuntunya ini wangkara maṟa katuringkula waḻkuṟa tjapinma.
5 Munuṉa uti kurunpa winki puḻkaṟa pukuḻarima,
panya mai wiṟu ngalkuntjatjanuṉa paḻtjaringkula pukuḻaripai, palu puṟunypa.
Uwa, utiṉa inma tjuṯa pukuḻṯu inkara nyuntunya puḻkaṟa mirawaṉima.”
6 Panya ngayulaṉa mungangka ngarikatira nyuntunya rawangku kulilpai,
munuṉanta kuliṟa alatjiṯu tjiṉṯuringkupai.
7 Panya nyuntu kutjungkun ngayunya tiṯutjarangku alpamilalpai,
kaṉa palulanguṟu nyuntumpa inma tjuṯa pukuḻṯu inkara kulilpai, panya nyuntu ngayula tjungu alatjiṯu nyinanyangka.
8 Uwa, panya ngayulu nyuntumpa puḻkaṟa mukuringkula nyuntula tjungu alatjiṯu nyinaku wantinytja wiya,
kaṉin nyuntu wiṟungku witulya puḻkangku alatjiṯu aṯunytju kanyini.
9-10 Panya kuwariṉiya tjana ngayunya ngurini iluntankunytjikitjangku,
kaṉa mukuringanyi nyuntu palunya tjananya wiyantjaku.
Panya palunya tjananyaya kuwari pika puḻkangka pungkula iluntankuku,
ka inuṟa tjuṯangku tjananya pitjala ngalkuku.
Kaya paluṟu tjana miri tjuṯaku ngurangka tjarpara tiṯutjara alatjiṯu nyinaku.
11 Uwa, panya Godalu ngayunya mulapa Israelku mayatja witulyanu warmaḻa tjuṯa pungkula waintarinytjaku,
kaṉa palulanguṟu palumpa puḻkaṟa pukuḻarinyi.
Kaya aṉangu tjuṯangku panya Godala miṟangka wangkara kalkuntjatjanungku palunya puḻkaṟa mirawaṉiku.
Palu panya aṉangu ngunti wangkapai tjuṯa Godalu tjaa patilku.