Lita Paulalu Walkatjuṟa Iyantja Wati Ini Taitatjalakutu
Titus
Nyangatja Ngaṉmanytju Nyakula Wangkanytjaku
Nyangatja lita Godaku tjukurpa Paulalu walkatjuṟa iyantja wati ini Taitatjalakutu. Wati nyanga paluṟu ngaṉmanypa Paulala tjungu waṟkaringi munu Tjukurpa Palya wangkangi. Munu pula tjungu anu manta tjukutjuku ini Kuṟitalakutu uṟungka nguṟurpa, munu pula manta nyara palula ngura tjuṯangka para-ngaṟala Tjukurpa Palya Jesunyatjara aṉangu tjuṯangka tjakultjunangi. Palulanguṟu Paulanya maḻaku anu manta puḻkakutu munu Taitatjanya wantikatingu aṉangu Jesuku kuwari kutju walytjaringkunytja tjuṯangka wangkara nintintjaku.
Ka lita nyangatja Paulalu palulakutu iyaṉu manta nyara Kuṟitala nyinanyangka. Munu paluṟu Taitatjala wangkangu wati nyara palunya nguraṟa maṉkurpa ngurkantankunytjaku tjana Jesuku walytja tjuṯa aṯunymaṟa kanyintjaku. Munu paluṟu piṟuku wangkangi alatji, “Tjanala nintinma wiṟuṟa palyanyku nyinanytjaku pikaringkuwiya munu Jesunya tjukaṟurungku waṉantjaku. Panya Jesunya mantakutu pitjangu aṉangu tjuṯa wankaṟunkunytjikitja tjana palumpa mulamularingkula Kurunpa Miḻmiḻngatjararingkula Godaku walytjaringkula wiṟuṟa nyinanytjaku.” Alatji Paulalu walkatjuṟa iyaṉu Taitatjalakutu paluṟu Kuṟitanya nguraṟa tjuṯangka nintintjaku.
Tjukurpa nyanganpa ngaṟanyi:
1:1-4 Paulalu ngaṉmanytju wangkanytja
1:5-16 Aṯunymankupai tjuṯa ngurkantankunytjaku munu ngunti wangkapai tjuṯa paintjaku
2:1-15 Godaku walytja tjuṯa wangkara tjukaṟuruntjaku
3:1-11 Godalawanu tjukaṟuru palyanyku nyinanytjaku munu tjukurpa kurakura tjuṯa kuliṟa wantinytjaku
3:12-15 Paulalu tjukurpa maḻatja wangkanytja
1
Paulalu Ngaṉmanytju Wangkanytja
1 Uwa Taitatja, ngayuluṉa Paulalu lita nyangatja nyuntumpa walkatjunanyi. Ngayulu panya Mayatja Godaku waṟkaripai, munuṉa tjukurtjara Jesulu Christalu iyantja panya. Godalu aṉangu tjuṯa ngurkantanu palunya waṉantjaku munu panya ngayunya wituṟa iyaṉu palula tjanala tjukurpa tjukaṟuru tjakultjunkunytjaku. Kaṉa palunya tjananya wangkara nintilpai Christaku tjukaṟuru mulamularingkunytjaku. Munuṉa tjanala wangkapai tjukurpa Jesulu wangkanytja uwankaraku tjana nintiringkula tjukaṟurungku uti kulintjaku. Panya tjukurpa nyanga tjukaṟuruku nintiringkulaya tjana kulilku tjukaṟuru nyinanytjikitjangku Godalu nyakula pukuḻarinytjaku.
2-3 Uwa, nganaṉa Jesuku mulamularingkunytjatjanungku aḻa-aḻangku paṯaṉi ngula Godalu nganaṉanya wankaṟa pakaltjingaṟa palula tjunguṟa tiṯutjarangku kanyintjaku. Panya Godalu ngaṉmanytju mulapa uwankara paluntja kuwaripangka kalkuṉu palumpa walytja tjuṯa wankaṟu tiṯutjarangku kanyintjikitjangku. Munu mulapaṯu tjiṉṯu panya paluṟu kalkuntjatjanungku Godalu palumpa tjukurpa wiṟu Jesunyatjara aṉangu tjuṯangka utinu tjiṉṯu panya palula alatjiṯu, panya paluṟu ngunti wangkapai wiya. Munu paluṟu ngayunya wituṟa iyaṉu tjukurpa nyanga palunya Jesunyatjara tjanala tjakultjunkunytjaku, kaṉa mulapaṯu tjanala para-tjakultjunangi Godalu nganampa wankaṟunkupailu witunnyangka.
4 Uwa Taitatja, lita nyangatjaṉa nyuntumpa walkatjunanyi, panya ngayulu tjukurpa Jesunyatjara nyuntula ngaṉmanytju wangkangu ka panyan kuliṟa mulamularingu, kaṉa nyara palulanguṟu nyuntunya katjanmananyi. Ka Mama Godalu Jesulu Christalu kuḻu nyuntunya pukuḻtju puḻkangku kanyinma munu nyuntunya kurunpa rapaṟa pukuḻmanama.
Aṯunymankupai Tjuṯa Ngurkantankunytjaku
5 Uwa Taitatja, nyuntu panya ngali manta nyara Kuṟitala nyinaralpi Jesuku walytja tjuṯangka waṟkaringi. Palu panya ngayulu ngaṯalnguṟu anu maḻaku manta puḻkakutu munu panyaṉa nyuntunya wantikatingu manta nyara palula Godaku waṟka rawangkuṯu palyantjaku. Panya nyuntunyaṉa wangkangu Jesuku walytja tjuṯa nintintjaku ngura kutjupangka kutjupangka manta nyara Kuṟitala munu tjananya tjukaṟuruntjaku. Munu panyaṉanta piṟuku wangkangu wati aṯunymankupai maṉkurpa ngurkantaṟa tjunkunytjaku ngura panya palula tjanala Jesuku walytja tjuṯa aṯunymankunytjaku.
6 Ka uti wati nyara paluṟu tjana tjukaṟuru nyinama kura palyantja wiya kutjupa tjuṯangku palunya tjananya nyakula kuranmankunytjaku-tawara. Munuya uti paluṟu tjana kuri walytjangka kutju nyinama kutjupaku nyakula mukuringkunytja wiya. Ka uti palumpa tjanampa tjitji tjuṯa kuḻu palu puṟunypaṯu nyinama Jesuku walytja mulapa, munuya ngunytjungka mamangka tungunpungkunytja wiyangku wangaṉarangku kuliṟa palyanyku nyinama, kutjupa tjuṯangku tjananya nyakula kuranmankunytjaku-tawara.
7 Panya Godalu wati aṯunymankupai tjuṯa ngurkantankupai palumpa walytja tjuṯa aṯunymaṟa kanyintjaku, kaya uti palya mulapa tjukaṟuru nyinama aṉangu kutjupa tjuṯangku nyakula anantjaku-tawara. Munuya uti walytjangku tjananku mirawaṉinytja wiyangku wantima munuya aṉangu tjuṯa kutju alpamilantjikitjangku kulinma kaṉany-kaṉanytju wituwituntja wiyangku. Munuya uti mirpaṉarira mapalku waṟuringkunytja wiyangku wantima, munuya wama puḻka tjikiṟa taṟangkarinytja wiyangku wantima.
Uwa, utiya aṯunymankupai paluṟu tjana aṉangu kutjupa tjuṯa pikangku pungkuwiyangku wantima, munuya uti aṉangu kutjupa ngunti kurantja wiyangku wantima mani puḻka mantjintjikitjangku. 8 Munuya uti wiṟuṟa nyinama, munuya ngura kutjupanguṟu pitjala nyinanyangka papulaṟa wantinytja wiyangku aḻṯira tjanampa waḻingka mukulyangku kanyinma. Munuya uti paluṟu tjana wiṟu tjuṯa kutju pukuḻṯu palyantjikitja mukuringama aṉangu tjuṯaku. Munuya uti wala winkingku palyantja wiyangku atatjuṟa kuliṟa palyanma ngunti kura palyantjaku-tawara. Munuya uti Godala tjukaṟuru palyanyku nyinama munu palula kutju kulinma.
9 Uwa, utiya aṯunymankupai paluṟu tjana Tjukurpa Palya Jesunyatjaraku puḻkaṟa mulamularingama, panya tjukurpa paluṟu tjukaṟuru alatjiṯu kampa kutjuparipai wiya. Tjukurpa palunya panyali ngaṉmanytju tjanala wangkara nintinu tjukaṟurungku kulintjaku, kaya uti tjukurpa palunya kuliṟa tiṯutjarangku tjukaṟurungku kulilkatima wantinytja wiyangku. Munu palulanguṟu paluṟu tjana Jesuku walytja tjuṯangka tjukurpa palunya nintingku tjukaṟurungku nintilku, kaya kuliṟa raparingkuku munu kuṉpuringkuku. Ka tjinguṟu aṉangu kutjupangku tjukurpa palunya wiyanmaṟa wantiku, ka uti wati panya aṯunymankupaingku palunya nintingku wangkara tjukaṟurunma.
Ngunti Wangkapai Tjuṯa Paintjaku
10 Panya ngura nyara palula aṉangu tjuṯangku Tjukurpa Palya wangkanyangka tjana wiyanmaṟa wantipai munuya kampa kutjupaṟa tjukurpa ngunti wangkapai aṉangu kutjupa tjuṯa ngunti kurantjikitjangku. Kutjupa tjuṯangkuya ngunti wangkapai alatji, “Utiya malikitja tjuṯangku Jesuku mulamularingkula Jew tjuṯaku aṟa kuliṟa waṉanma.” Alatjiya Jesuku walytja tjuṯa ngunti wituwitulpai. 11 Ka Taitatja, nyuntu munu wati aṯunymankupai kutjupa tjuṯangku kuḻu uti Jew palunya tjananya wangkara markunma ngunti nintintja wiyangku wantinytjaku, panya alatji wangkara tjana aṉangu kutjupa tjuṯa ngunti kuraṟa kawantjingaṉi manikitjangku ngunytju mama tjitji kuḻukuḻu. Ka nyura nyanga palulanguṟu uti tjananya markunma.
12 Panya wati wangkatjara kutjungku ngura pala Kuṟitanya nguraṟangku tjukaṟurungku wangkangu alatji, “Kuṟitanya nguraṟa tjuṯangkuya ngunti wangkapai. Paluṟu tjana kura puḻka palyalpai munuya paluṟu tjana inuṟa puṟunypa pikaṯi alatjiṯu. Munuya pakuringkula waṟka palyantja wiya wantira nyinapai munuya rawangku manyungku mai kuka puḻka ngalkupai.” 13-14 Alatji wati panya wangkatjarangku nintingku tjukaṟurungku wangkangu. Ka nyuntu tjananya Jesuku walytja tjuṯa puḻkaṟa painma tjukurpa kampa kutjupaṟa wangkawiyangku wantinytjaku. Munu tjananya wangkara tjukaṟurunma Tjukurpa Palya Jesunyatjara tjukaṟurungku kulintjaku. Panya Jew kutjupa tjuṯangku aṟa ngunti tjuṯa walytjangku kulintjitja wangkapai. Tjana panya tjukurpa tjukaṟuru Jesunyatjara wantingu munuya tjukurpa ngunti tjuṯa tjana walytjangku kulintja wangkanyi munuya aṉangu Jesuku walytja tjuṯa ngunti wangkara wituwitulpai palula tjanala kutju kulintjaku. Ka nyuntu tjanala wangkama tjukurpa palumpa tjanampa kulilwiyangku wantinytjaku munu tjukurpa tjukaṟuru Jesunyatjara kutju kulintjaku.
15 Panya aṉangu palyanyku nyinapai tjuṯangku mai kutjupa kutjupa uwankara ngalkupai palya kuliṟa. Palu aṉangu ngunti kulilpai tjuṯangku Jesunya wantira mai kutjupa kutjupa uwankara kanpanmankupai. Panya nyara paluṟu tjana kulintja kawakawa kura mulapa, munuya puṯu tjukaṟurungku ngurkantankupai kura munu palya, munuya puṯu tjukaṟuru nyinapai.
16 Uwa, paluṟu tjana wangkapai alatji, “Nganaṉa Godaku ninti puḻka munula palunya tjukaṟurungku waṉalpai.” Palu wiya, tjana kura kutju rawangku palyalpai, kala nyara palulanguṟu tjananya palyannyangka nyakula mapalku ngurkantankupai munula alatji kulilpai, “Wiya, nyanganpa Godaku ninti wiya ngurpa, munuya palunya wiyanmankupai alatjiṯu.” Uwa, tjana Godala tungunpungkupai munuya puṯu alatjiṯu kulilpai wiṟuṟa palyanyku nyinanytjikitjangku. Nyara palulanguṟula tjananya ngurkantankupai tjana Godaku ngurpa nyinanyangka.